އިމިގްރޭޝަން ކޮންޓްރޯލާގެ މަގާމަށް ކުރީގެ ސީޕީ ފަސީހު

Read Time:3 Minute, 17 Second

އިމިގްރޭޝަން ކޮންޓްރޯލާގެ މަގާމަށް ކުރީގެ ޕޮލިސް ކޮމިޝަނަރު (ރިޓަޔަރޑް) އަހުމަދު ފަސީހު ރައީސުލް ޖުމްހޫރިއްޔާ އައްޔަން ކުރައްވައިފިއެވެ. ރައީސް ޑރ. މުހައްމަދު މުއިއްޒު، އިމިގްރޭޝަން ކޮންޓްރޯލާގެ މަގާމަށް ފަސީހު އައްޔަން ކުރެއްވީ ކުރިން މަގާމު ފުރުއްވަމުން ގެންދެވި މުހައްމަދު ޝަމްއާން ވަހީދު ކުއްލި ގޮތަކަށް އިއްޔެ ވަކިކުރެއްވުމަށް ފަހު ގައެވެ. ޝަމްއާން މަގާމުން ވަކިކުރެއްވި ސަބަބެއް ސަރުކާރުން އަދި ހާމައެއް ނުކުރެއެވެ. ރައީސް އޮފީހުން ވިދާޅުވީ، ކޮންޓްރޯލާގެ މަގާމަށް ފަސީހު ރައީސް އައްޔަން ކުރައްވާފައިވާ ކަަމަށެވެ.

ފުލުހުން ނެރުނު ބަޔާނެއްގައި ވިދާޅުވީ، މޯލްޑިވްސް އިމިގްރޭޝަންގެ ބައެއް މުވައްޒަފުން، މަގާމުގެ ނުފޫޒު ނަހަމަ ގޮތުގައި ބޭނުންކޮށް، ބިދޭސީ މަސައްކަތްތެރިންގެ އަތުން ނާޖާއިޒު މަންފާ ހޯދަމުންދާ ކަމަށް މައުލޫމާތު ލިބުމުން އެ މައްސަލަ ތަހުގީގުކުރަމުންދާ ކަމަށެވެ. މި މައްސަލައާ ގުޅިގެން 2025 މާރިޗް 20 ވަނަ ދުވަހުގެ ރޭ ހިންގި އޮޕްރޭޝަނެއްގައި ގެއެއް ބަލައި ފާސްކޮށް 3 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އިމިގްރޭޝަނުގައި 14 އަހަރު މަސައްކަތް ކުރެއްވި ޝައްމާނަށް އިމިގްރޭޝަން ކޮންޓްރޯލަރުކަން ދެއްވީ މި ސަރުކާރު ވެރިކަމަށް އައިސް ނޮވެމްބަރު 19، 2023ވަނަ ދުވަހުގައެވެ.

އޭރު އޭނާ ހުރީ އިމިގްރޭޝަންގެ އޮފިސަރުކަމުން ވަކިކޮށްފައެވެ. ނަމަވެސް 2022 ގައި ވަޒީފާއާ ބެހޭ ޓްރައިބިއުނަލުން އޮތީ ޝަމްއާން ވަޒީފާ އިން ވަކިކުރީ ގާނޫނާ ހިލާފަށް ކަމަށް ނިންމައި، އަލުން ވަޒީފާ ރުޖޫއަކޮށްދިނުމަށް އަންގައިފައެވެ. ކުރީގެ ޕޮލިސް ކޮމިޝަނަރު (ރިޓަޔަރޑް) އަހުމަދު ފަސީހު ވަނީ ފުލުހުންގެ ހިދުމަތުގައި 23 އަހަރު ހޭދަ ކުރައްވާފައެވެ. ފަސީހު ރިޓަޔަރ ކުރައްވާ ފައިވަނީ 2012 ވަނަ އަހަރުއެވެ.