ފަޅު ރަށްރަށާއި ފަޅުތަކުގެ ތެރެއިން ޓޫރިޒަމަށް ދޫކުރާ ތަންތަން ރައީސަށް ކަނޑައެޅޭ ބިލެއް

Read Time:4 Minute, 54 Second

މީހުން ދިރިއުޅޭ ރަށްރަށުގެ ކައުންސިލްތަކުގެ އިހްތިސާސުގެ ތެރޭގައި ހިމެނޭ ފަޅު ރަށްރަށާއި ފަޅުތައް ޓޫރިޒަމްގެ ބޭނުމަށް ބޭނުންކުރަން ކަނޑައެޅުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް ޓޫރިޒަމާބެހޭ ގާނޫނަށް އިސްލާހެއް ހުށަހަޅައިފިއެވެ. ސަރުކާރުގެ ފަރާތުން މި ބިލަށް އިސްލާހު ރައްޔިތުންގެ މަޖިލީހަށް ހުށަހެޅުއްވީ ތިމަރަފުށީ ދާއިރާގެ ޕީއެންސީގެ މެންބަރު އަހުމަދު ރިޔާޒެވެ. މިހާރު އޮންނަ ގޮތުން މީހުން ދިރިއުޅޭ ރަށްރަށާއި ސިޓީތަކުގެ އިހްތިސާސްގެ ތެރޭގައި ހިމެނޭ ބިންތަކުގެ ޓޫރިޒަމް ޕްލޭން ހަދައި، އެތަންތަން ޓޫރިޒަމްގެ ބޭނުމަށް ދޫކުރުމުގެ ބާރު އޮންނަނީ ކައުންސިލްތަކަށެވެ.

މި ބިލްގެ އިސްލާހުގައިވާގޮތުން މީހުން ދިރިއުޅޭ ރަށްރަށް ނުވަތަ ސިޓީތައް ނިސްބަތްވާ ރަށު ނުވަތަ ސިޓީ ކައުންސިލްގެ އިހްތިސާސްގައި ހިމެނޭ ފަޅު ރަށްރަށާއި ފަޅުތައް ޓޫރިޒަމް ބޭނުމަށް ތަރައްގީ ކުރެވޭ ސަރަހައްދުތަކުގައި ގޮތުގައި ކަނޑައަޅާނީ ރައީސުލްޖުމްހޫރިއްޔާއެވެ. މި ބިލްގެ ފުރަތަމަ ކިޔުން މިއަދު އިއްވާފައިވާއިރު ސަރުކާރަށް ތާއިދުކުރާ މެމްބަރުން ވަނީ މި ބިލްގައި މިގޮތަށް އިސްލާހު އޮތުމުން އެއީ ރަނގަޅު ކަމެއްކަން ފާހަގަކުރައްވާފައެވެ. އަދި މިފަދައިން އޮތަސް އެއީ ކައުންސިލްތަކުގެ ބާރު ހަނިވެގެންދާނެ ކަމެއް ނޫން ކަމަށާއި މިފަދައިން ކަނޑައެޅުމުން މިކަމުގެ ފައިދާ އެންމެންނަށް ކުރާނެކަން މެމްބަރުން ވަނީ ފާހަގަކުރައްވާފައެވެ.

ރައީސް ޑރ. މުއިއްޒު ވަނީ ކައުންސިލްތައް ބާރުވެރިކުރުވުމަށް އެ ރަށެއްގެ އިހުތިސާސްގެ ތެރޭގައި ހިމެނޭ ފަޅުރަށްތައް ދެއްވަން ނިންމަވާފައެވެ. ރައީސް މުއިއްޒު އިއުލާންކުރެއްވި ސިޔާސަތުގެ ދަށުން ފަޅުރަށް ހޯދުމަށް އެދި ހުށަހެޅި ކައުންސިލްތަކަށް ފަޅުރަށް ހަވާލުކުރަންވެސް ނިންމާފައިވެއެވެ. ރަށްރަށަށް އާމްދަނީ ލިބޭގޮތަށް ކައުންސިލްތަކުން ކުރިއަށްގެންދާ ވިޔަފާރީގެ މަސައްކަތްތަކަށް ފަސޭހައިން ހުއްދަ ލިބޭނެ އިންތިޒާމް ހަމަޖައްސަވައިދެއްވާނެކަން ރައީސް ޑރ. މުއިއްޒު އިއުލާންކުރެއްވީ މިދިޔަ އަހަރުގެ މާރޗް މަހުއެވެ. ރައީސް ވިދާޅުވީ ކޮންމެ ރަށަކީ އަދި އެ ރަށެއްގައި ދިރިއުޅޭ ރައްޔިތުންނަކީ އަމިއްލަ ފައިމައްޗަށް ތެދުވެފައިވާ ފުދުންތެރި ބަޔަކަށް ހެދުމަކީ ސަރުކާރުގެ އެންމެ ބޮޑު އެއް އަމާޒުކަމަށެވެ.

ރައީސް ވިދާޅުވީ ކައުންސިލްތަކަށް ފަޅު ރަށް ދޫކުރާ މުއްދަތު 10 އަހަރުން 25 އަހަރަށް އިތުރުކުރުމަށް މިހާރު ނިންމަވާފައިވާކަމަށެވެ. އަދި އިޚްތިސާސުގައި ހިމެނޭ ރަށްތަކުން ފަޅު ރަށެއް ހޯދުން ނުވަތަ ކައިރީގައި ފަޅު ރަށް ނެތް ރަށްތަކަށްވެސް ފަޅު ރަށް ހޯދުމުގެ ފުރުސަތު އޮންނާނެކަމަށް ރައީސް ވަނީ ވިދާޅުވެފައެވެ.