އެމްއެމްއޭގެ ޑެޕިއުޓީ ގަވަރުނަރު ވަކިކުރުމުގެ މަސައްކަތް މަޖިލީހުން ފަށަައިފި

Read Time:3 Minute, 36 Second

(ފޮޓޯ ކްރެޑިޓްސް: މިހާރު)

މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު، އަހުމަދު އިމާދު އެ މަގާމުން ވަކިކުރަން ރައީސް، ޑރ. މުހައްމަދު މުއިއްޒުއަށް ލަފާދިނުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހަޅައިފިއެވެ. ޑެޕިއުޓީ ގަވަރުކަމުން އިމާދު ވަކި ކުރަން ރައީސްއަށް ލަފާދޭން މާލިއްޔަތު ކޮމިޓީއަށް ހުށަހެޅުއްވީ ޕީއެންސީއަށް ނިސްބަތްވެވަޑައިގަންނަވާ މަޖިލީހުގެ ދިއްދޫ ދާއިރާގެ މެމްބަރު، އަބްދުއްލަތީފު މުހައްމަދެވެ. އޭނާގެ ހުށަހެޅުއްވުމަށް ހެންވޭރު އުތުރު ދާއިރާގެ މެމްބަރު، އަހުމަދު އައިފާން ވަނީ ތާއިދު ކުރައްވާފައެވެ.

އަބްދުއްލަތީފު ކޮމިޓީއަށް ހުށަހެޅި މައްސަލައިގައި ވިދާޅުވީ، އެމްއެމްއޭގެ ކުރީގެ ގަވަރުނަރު، އަލީ ހާޝިމް މަގާމުގައި ހުންނަވައިގެން، އޭނާއަށް ޤާނޫނުން މަތިކޮށްފައިވާ ޒިންމާތައް އަދާނުކޮށް އިހުމާލުވެފައިވާއިރު، އެކަންކަން ފާހަގަކުރުމަށް ޤާނޫނުން ޒިންމާތައް މަތިކޮށްފައިވާ ޑެޕިއުޓީ ގަވަރުނަރު، އިމާދު އެކަށީގެންވާ މަސައްކަތެއް ކޮށްފައި ނުވާ ކަމަށެވެ. ހާޝިމްގެ ނިންމެވުންތަކުގައި އިމާދު ވެސް ބައިވެރިވެފައިވާ ކަމަށާއި އެކަންކަމުގެ ޒިންމާ އިމާދު ވެސް ނަންގަވަން ޖެހިވަޑައިގަންނަވާނެ ކަމަށް އެމައްސަލައިގައި ވަނީ ވިދާޅުވެފައެވެ.

އަބްދުލަތީފް ވިދާޅުވީ، އިމާދު ވަކިކުރުމަށް ރައީސަށް ލަފާ ދިނުމަށް ނިންމީ، ޤާނޫނުން އޭނާއަސް މަތިކޮށްފައިވާ ޒިންމާތައް އަދާކުރުމުގައި ފަސްޖެހި، އިހުމާލުވެފައިވާތީ ކަމަށެވެ. ކޮމިޓީގައި މިކަމާއި ގުޅިގެން ކުރިއަށް ދިޔަ ބަހުސަށް ފަހު މި ހުށަހެޅުން ފާސްވެފައިވަނީ ކޮމިޓީގެ އަގުލަބިއްޔަތުންނެވެ. މި ހުށަހެޅުން ފާސް ކުރުމާއި ދެކޮޅު ހެއްދެވީ ދެ މެމްބަރުންނެވެ. އިމާދު ޑެޕިއުޓީ ގަވަރުނަރު ކަމަށް އައްޔަން ކޮށްފައިވަނީ 2020 ވަނަ އަހަރުއެވެ.

އެމްއެމްއޭގެ ޑެޕިއުޓީ ގަވަރުނަރުގެ މަގާމަށް މީހަކު އައްޔަން ކުރާނީ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ.