އައްޑޫގެ ކަރަންޓު މައްސަލަ: އާ ޖެންސެޓް ހިފައިގެން އިންޑިއާގެ ބޯޓު މި މަހު 13ގައި ރާއްޖެއަށް

Read Time:3 Minute, 41 Second

(ފޮޓޯ ކްރެޑިޓްސް: ވަގުތު)

އައްޑޫއަށް ދިމާވެފައިވާ ކަރަންޓްގެ މައްސަލަ ހައްލު ކުރުމުގެ ގޮތުން އާ ޖެންސެޓެއް ހިފައިގެން އިންޑިއާގެ ބޯޓު މި މަހުހެ 13 ވަނަ މާލެ ބަނދަރު ކުރާނެ ކަމަށް ފެނަކަ ހިތަދޫ ބްރާންޗްއިން ވިދާޅުވެއްޖެއެވެ. އައްޑޫއަށް ކަރަންޓު ފޯރުކޮށްދޭ ފެނަކަ ހިތަދޫ ބްރާންޗުން ވިދާޅުވީ އައްޑޫ ސެންޓްރަލް ޕަވަރ ސްޓޭޝަންގެ ޖެނެރޭޝަންގެ ކެޕޭސިޓީ އިތުރު ކުރުމަށް ކުރެވެމުންދާ މަސައްކަތުގެ ތެރެއިން ގެންނަ 1،800ކވ ލޯޑް ކުރެވިފައިވާ އުޅަނދު މިހާރު އިންޑިއާގެ ޓުޓިކުރިން ޕޯޓުން ފުރާފައިވާ ކަމަަށެވެ.

އަދި އެ އުޅަނދު މި މަހުގެ 13 ވަނަ ދުވަހު މާލެއަަށް ބަނދަރު ކުރުމަަށް ތާވަލު ކުރެވިފައިވާ ކަމަށްވެސް ވިދާޅުވެފައި ވެއެވެ. ފެނަކަ އިން މީގެ ކުރިން ހާމަކޮށްފައިވާ ގޮތުގައި، އައްޑޫ ސިޓީގެ ހިތަދޫ އާ ގުޅިފައިވާ ރަށްރަށަށް ކަރަންޓުގެ ޚިދުމަތް ފޯރުކޮށްދޭ ސެންޓްރަލް ޕަވާ ސްޓޭޝަންގެ ޖެނެރޭޓަރުތަކަށް މައްސަލަ ދިމާވެފައިވެއެވެ. މީގެ ސަބަބުން އެ ސަރަހައްދުތަކަށް ބޭނުންވާ ވަރަށް ކަރަންޓު އުފެއްދުމުގައި ދަތިތަކާ ކުރިމަތިލާންޖެހި، އެކި ވަގުތުތަކުގައި އެކި ސަރަހައްދުތަކުން ކަރަންޓު ކަނޑަމުންދާ ކަމަށް ފެނަކައިން ހާމަކޮށްފައިވެއެވެ.

ފެނަކައިން ވިދާޅުވީ ރޯދަމަހަކީ ކަރަންޓުގެ ބޭނުންކުރުން އާންމުކޮށް އިތުރުވާ މަހެއްކަމާއި، އައްޑޫގައި ހިނގަމުންދާ ތަރައްގީގެ މަޝްރޫޢުތަކާ ގުޅިގެން ކަރަންޓުގެ ޑިމާންޑް އިތުރުވަމުންދާ ކަމަށެވެ. އަދި އައްޑޫގެ ކަރަންޓުގެ މައްސަލައަކީ ޒަމާންތަކަކަށް ދިގުލައިގެން ގޮސްފައިވާ އިހުމާލުތަކެއްގެ ނަތީޖާއެއްކަންވެސް ފެނަކައިން ފާހަގަކޮށްފައިވެއެވެ.

ފެނަކައިން ވަނީ ރައްޔިތުންނަށް މެދުކެނޑުމެއްނެތި ކަރަންޓުގެ ޚިދުމަތް ފޯރުކޮށްދިނުމަށް ކުރަންޖެހޭ ހުރިހާ ކަމެއްގެ ފުރިހަމަ ޒިންމާ ނަގައިގެން މަސައްކަތްކުރާނެ ކަމުގެ ޔަގީންކަން ދީފައެވެ. މި މައްސަލައަށް ދާއިމީ ހައްލެއް ހޯދުމަށް ކުންފުނިން މަސައްކަތްކުރަމުންދާ ކަމަށްވެސް ފެނަކައިން ހާމަކޮށްފައިވެއެވެ.