ޒަޔާން އިސްތިއުފާ ނުދެއްވާ، ފަތުރަނީ ދޮގު ހަބަރު: ފިނޭންސް މިނިސްޓްރީ

Read Time:3 Minute, 59 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

މަރުކަޒީ ބޭންކް، އެމްއެމްއޭގެ ބޯޑުގައި ފިނޭންސް މިނިސްޓްރީ ތަމުސީލުކުރައްވާ އަހުމަދު ޒަޔާން މުހައްމަދު އިސްތިއުފާ ނުދެއްވާ ކަމަށާއި، ބައެއް މީޑިއާތަކުން ދޮގު ހަބަރު ފަތުރަމުންދާ ކަމަށް ފިނޭންސް މިނިސްޓްރީން ވިދާޅުވެއްޖެއެވެ. އެކަހަލަ އެއްވެސް ކަމެއް ނުހިނގާ ކަމަށް މިނިސްޓްރީން ވިދާޅުވެފައިވާއިރު، މީހުން އޮޅުވާލާ ހަމަނުޖެހުން ނަގާލުމުގެ ނިޔަތުގައި ބައެއް މީޑިއާތަކުން ދޮގު ވާހަކަތައް ދަނީ ފަތުރަމުން ކަމަށް ވިދާޅުވިއެވެ.

ފިނޭންސް މިނިސްޓްރީގެ އޮފިޝަލަކު ވިދާޅުވީ އެއީ މުޅިން ދޮގު ހަބަރު ކަމަށާއި އެކަން އެ މީޑިއާތަކަށް ވެސް އަންގާފައިވާ ކަމަށެވެ.

“އަޅުގަނޑުމެން ދެންނެވިން އެހަބަރު ޖެހުމުގެ ކުރިން ވެސް މިނިސްޓްރީގެ ފަރާތުން ޔަޤީންކަމޭ މިދެނީ ޒަޔާން އިސްތިއުފާ ނުދެއްވައޭ.” އޮފިޝަލް ވިދާޅުވިއެވެ.

މިކަމާ ގުޅޭ ގޮތުން މިނިސްޓްރީގެ ބަހެއް މިހާތަނަށް ލިބިފައެއް ނުވާ ކަމަށް ބައެއް މިޑިއާތަކުން ވަނީ ޝާއިއުކޮށްފައެވެ. އަޙްމަދު ޒަޔާން މުޙައްމަދަކީ ދިވެހިރާއްޖޭގެ އިޤްތިޞާދީ ދާއިރާގައި ފާހަގަކޮށްލެވޭ ތަޖުރިބާކާރެކެވެ. އޭނާ ވަނީ ބައިނަލްއަޤްވާމީ ފެންވަރުގެ މާލީ އިދާރާތަކުގައި މަސައްކަތްކުރައްވާފައެވެ. މީގެ ތެރޭގައި ވޯލްޑް ބޭންކް އަދި އިންޓަރނޭޝަނަލް މަނިޓަރީ ފަންޑް (އައިއެމްއެފް) ހިމެނެއެވެ.

ޒަޔާން މިހާރު ފިނޭންސް މިނިސްޓްރީގެ ފިސްކަލް އެފެއާޒް ޑިވިޜަންގެ ހެޑްގެ އިތުރުން، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑުގައި ފިނޭންސް މިނިސްޓްރީ ތަމްސީލުކުރައްވާ މެންބަރެއްގެ ގޮތުގައި ވެސް ހުންނެވި ބޭފުޅާއެވެ. އޭނާގެ ތަޢުލީމީ ފެންވަރާއި ތަޖުރިބާއަށް ބަލާއިރު، ރާއްޖޭގެ އިޤްތިޞާދީ ސިޔާސަތުތައް އެކަށައެޅުމުގައި މުހިންމު ދައުރެއް އަދާކުރައްވާ ބޭފުޅެއްގެ ގޮތުގައި ފާހަގަކުރެވެއެވެ.

މިފަދަ މަޤާމެއްގައި ހުންނެވި ބޭފުޅަކާ ގުޅޭ ގޮތުން ދޮގު މަޢުލޫމާތު ފެތުރުމަކީ ޤައުމުގެ އިޤްތިޞާދީ ސިޔާސަތުތަކަށް އޮޅުން އަރާފަދަ ކަމަކަށް ވެދާނެތީ، މިފަދަ ޚަބަރުތައް ޝާއިޢުކުރުމުގައި މީޑިއާތަކުން ވަރަށް ބޮޑަށް ސަމާލުވާންޖެހޭ ކަމަށް ވެސް ފާހަގަކުރެވެއެވެ.