އޯއައިސީގައި އުފެދުންތެރި މަޝްވަރާތަކުގައި ބައިވެރިވުމުގެ ފުރުސަތު ލިބުނު: ހަލީލް

Read Time:6 Minute, 21 Second

(ފޮޓޯ ކްރެޑިޓްސް: ފޮރިން މިނިސްޓްރީ)

އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ.) ގައި ގިނަ ބޭފުޅުންނާއެކު އުފެދުންތެރި މަޝްވަރާތަކުގައި ބައިވެރިވުމުގެ ފުރުސަތު ލިބުނު ކަމަށް ރާއްޖޭގެ ފޮރިން މިނިސްޓަރު، ޑރ. އަބްދުﷲ ހަލީލް ވިދާޅުވެއްޖެއެވެ. އެކްސްގައި ކުރެެއްވި ޕޯސްޓެއްގައި ފޮރިން މިނިސްޓަރު ވިދާޅުވީ ޖިއްދާގެ ޚާރިޖީ ވަޒީރުންގެ މަޖިލީހުގެ އެކްސްޓްރާ އޯޑިނަރީ ސެޝަންގައި ބައިވެރިވެވަޑައިގަތުމަށްފަހު ޖިއްދާއިން ފުރާވަޑައިގަންނަވާއިރު އަޅުގަނޑުގެ ވަރަށް ގިނަ ބޭފުޅުންނާ އެކު އުފެއްދުންތެރި މަޝްވަރާތަކުގައި ބައިވެރިވުމުގެ ފުރުޞަތު ލިބުނު ކަމަށެވެ.

އަދި އޯއައިސީގެ ބައްދަލުކުރެއްވުމުގައި، ފަލަސްޠީނުގެ ރައްޔިތުންނަށް ވަރަށް ބޮޑަށް ތާއީދު ކުރައްވާކަން ތަކުރާރުކޮށް، އިޒްރޭލުގެ ޙަމަލާތަކާއި، ފަލަސްޠީނުގެ ވަޒަނުން ރައްޔިތުން އެކަހެރިކުރުމަށް ގޮވާލާ ގޮވާލައްވަމުން ކުށްވެރިކަމަށް ވެސް ވިދާޅުވިއެވެ. ޣައްޒާ އާރާސްތުކުރުމަށް އަރަބި ގައުމުތަކުން ހުށަހަޅައިފައިވާ މަގުޗާޓަށް ރާއްޖޭގެ ޚާރިޖީ ވަޒީރު، ޑރ. އަބްދުﷲ ހަލީލް ވަނީ ތާއީދު ކުރައްވާފައެވެ.

އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ.) އިން ސައުދީ ޢަރަބިއްޔާގެ ޖިއްދާގައި ޚާރިޖީ ވަޒީރުންގެ ފެންވަރުގައި ބޭއްވި އެކްސްޓްރާއޯޑިނަރީ ސެޝަންގައި ބައިވެރިވެވަޑައިގެން ޚަލީލް ދެއްވި ތަޤްރީރުގައި، އިސްރާއީލުން ހަނގުރާމަ ހުއްޓާލުމުގެ އެއްބަސްވުމާ ހިލާފުވެފައިވާކަން ފާހަގަކޮށް، މެދުކެނޑުމެއްނެތި އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ އަނިޔާވެރިކަން ކުށްވެރިކުރައްވައި އެކަމާ ކަންބޮޑުވުން ފާޅުކުރެއްވިއެވެ. އަދި ފަލަސްތީނުގެ ރައްޔިތުން އެމީހުންގެ ބިމުން ފޭބުމަށް ގޮވާލާ ގޮވާލުންތައް ކުށްވެރިކޮށް، ޣައްޒާގެ ހުރިހާ ސަރަޙައްދަކަށް ރައްކާތެރިކަމާއެކު، ދެމެހެއްޓެނިވި ގޮތެއްގައި އަދި ހުއްޓުމެއްނެތި އިންސާނީ އެހީތެރިކަން ފޯރުކޮށްދިނުމަށް ގޮވާލެއްވިއެވެ. އަދި އަރަބް ލީގް ސަމިޓްގައި ފާސްކުރެވުނު ޣައްޒާ އާރާސްތުކުރުމުގެ މަގުޗާޓަށް ދިވެހިރާއްޖެއިން ފުރިހަމައަށް ތާއީދުކުރާކަމަށްވެސް ހާމަކުރެއްވިއެވެ.

މީގެ އިތުރުން، ފަލަސްތީނުގެ މައްސަލައަށް ހައްލެއް ހޯދުމަށް ކުރާ މަސައްކަތުގައި ދިވެހިރާއްޖެއިން އަބަދުވެސް އެއްބާރުލުން ދޭނެކަމުގެ ޔަގީންކަން ދެއްވިއެވެ. އަދި ފަލަސްތީނަށް ފޯރުކޮށްދެމުންދާ އިންސާނީ އެހީތެރިކަމަށް ހުރަސްއެޅޭ ގޮތަށް އިސްރާއީލުން ހިންގަމުންދާ ޢަމަލުތަކާ ގުޅިގެން އިންޓަރނޭޝަނަލް ކޯޓް އޮފް ޖަސްޓިސް (އައިސީޖޭ) ގެ އިސްތިޝާރީ ލަފައެއް ހޯދުމަށް ހުށަހަޅާފައިވާ މައްސަލައިގައި ދިވެހިރާއްޖެއިން ބައިވެރިވެ، އެ ކޯޓަށް ބަޔާނެއް ހުށަހެޅިކަން ފާހަގަކުރެއްވިއެވެ. އަދި މި ހަނގުރާމައަށް އޮތް ހަމައެކަނި ދެމެހެއްޓެނިވި ހައްލަކީ 1967 ވަނަ އަހަރުގެ ކުރިން ކަނޑައެޅިފައި އޮތް އިންތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްޠީނުގެ ވެރިކަންކުރާ ރަށްކަމުގައި ކަނޑައަޅައި، މިނިވަން އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްޠީނުގެ ދައުލަތް ޤާއިމުކުރެވުމުންކަމުގައި އެ މަނިކުފާނު ވިދާޅުވިއެވެ.

އޯއައިސީއަކީ 57 ގައުމުގެ މައްޗައް އެކުލެވިގެންވާ ފަލަސްތީނުގެ ހައްގުގައި އަބަދުސް ވަކާލާތުކުރަމުން އަންނަ ޖަމުއިއްޔާއެކެވެ. ރާއްޖެ އަކީ 1976 މި ޖަމުއިއްޔާގެ މެމްބަރަކަށް ވުމަށްފަހު މި ޖަމުޢިއްޔާގައި އިސްކޮށް ހަރަކާތްތެރިވަމުން އަންނަ ގައުމެކެވެ.