ރެއާލް މެޑްރިޑް އަތުން މެންޗެސްޓަރ ސިޓީ ބަލިވެއްޖެ

Read Time:5 Minute, 38 Second

(ފޮޓޯ ކްރެޑިޓްސް: ރޮއިޓާރސް)

ޔޫއެފާ ޗެމްޕިއަންސް ލީގުގެ ދެވަނަ ބުރުގެ ޕްލޭއޮފްގެ ފުރަތަމަ ލެގުގައި ރޭ މެންޗެސްޓަރ ސިޓީ އާއި ދެކޮޅަށް ރެއާލް މެޑްރިޑް ކުޅުނު މެޗުން 3-2 ގެ ނަތީޖާއަކުން މެންޗެސްޓަރ ސިޓީ ބަލިވެއްޖެ އެވެ. މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ފަންސާސް ދެ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި މެންޗެސްޓަރ ސިޓީ އިން ބޯޅަ ހިފަހައްޓައިގެން ގިނައިރު ކުޅެފައިވީ ނަމަވެސް ރެއާލް މެޑްރިޑްއިން ވަނީ ސިޓީގެ ގޯލަށް ގިނަ ހަމަލަތަކެއް ފޮނުވާލާފަ އެވެ.

މެންޗެސްޓަރ ސިޓީ އިން މެޗު ފަށައިގެން ރަގަޅު ކުޅުމެއް ދައްކާފައިވާއިރު މެޗުގެ 19 ވަނަ މިނިޓުގައި އެ ޓީމުން ވަނީ ލަނޑެއް ޖަހާ ކުރި ހޯދާފަ އެވެ. މި ލަނޑަކީ ޖޮސްކޯ ގްވަޑިއޯލް ދިން ބޯޅައަކުން އާލިން ހާލާންޑު ކާމިޔާބުކޮށްފައިވާ ލަނޑެކެވެ. ސިޓީން ލަނޑު ޖަހާ ކުރި ހޯދިތާ ގިނައިރުތަކެއް ނުވަނީސް ޖެކް ގްރީލިޝް އަށް އަނިޔާވެ ކޯޗު ޕެޕް ގަޑިއޯލާ އަށް ވަނީ އޭނާގެ ބަދަލުގައި ފިލް ފޯޑެން ކުޅެން އަރުވަން މަޖުބޫރުވެފަ އެވެ. އަދި ދެވަނަ ހާފަށް ނިކުތްއިރު މެންޗެސްޓަރ ސިޓީގެ އަކަންޖީގެ ބަދަލުގައި ރިކޯ ލެވިސް ވަނީ ކުޅެން އަރުވާފަ އެވެ.

ދެވަނަ ހާފުގެ ކުޅުން ފެށުނުތާ ގިނައިރުތަކެއް ނުވަނީސް މެޗުގެ ފަރަގު ބޮޑު ކުރުމަށް ސިޓީއަށް ވަނީ ރަގަޅު ފުރުސަތެއް ލިބިފަ އެވެ. ނަމަވެސް އާލިން ހާލަންޑް ފޮނުވާލި ހަމަލާ އަމާޒުވެފައިވަނީ ގޯލުގެ ދަނޑިއަށެވެ. މެޗުގެ ދެވަނަ ހާފުގައި ރެއާލް މެޑްރިޑް އިން ވަނީ އެ ޓީމުގެ ކުޅުން ރަގަޅުކޮށް މެޗުގެ ކޮންޓްރޯލް އަތުލާފަ އެވެ. އެގޮތުން އެ ޓީމުން ވަނީ މެޗުގެ 60 ވަނަ މިނިޓުގައި ލަނޑެއް ޖަހާ މެޗުގެ ނަތީޟާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ކިލިއަން އެމްބާޕޭ އެވެ.

ރެއާލް މެޑްރިޑް އިން މެޗުގެ ނަތީޖާ އެއްވަރުކުރި ފަހުން އެ ޓީމަށް ވަނީ ލީޑު ނަގަން ގިނަ ފުރުސަތުތަކެއް ލިބި ބޭކާރުވެފަ އެވެ. އޭގެ ތެރެއިންވެސް ބެލިއަންހަމް އަށް ލިބުނު ފުރުސަތުތައް ފާހަގަ ކުރެވެއެވެ. މި މެޗުގައި ދެވަނަ ފަހަރަށް މެންޗެސްޓަރ ސިޓީ އިން ކުރި ހޯދާފައިވަނީ މެޗުގެ 80 ވަނަ މިނިޓުގައި އެ ޓީމަށް ލިބުނު ޕެނަލްޓީ އަކުން އާލިން ހާލާންޑް އެވެ. މި ޕެނަލްޓީ އަކީ ޑެނީ ކަބަޔޯސް ސިޓީގެ ފިލް ފޯޑެން އަށް ފައުލް ކުރުމާއި ގުޅިގެން އެ ޓީމަށް ލިބިފައިވާ ޕެނަލްޓީ އެކެވެ.

ނަމަވެސް އޭގެ ހަތަރު މިނިޓު ފަހުން ރެއާލް މެޑްރިޑްގެ މެންޗެސްޓަރ ސިޓީގެ ކުރީގެ ކުޅުންތެރިޔާ ބްރާހިމް ޑިއާޒް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. އަދި މެޗުގެ ފުރިހަމަ ވަގުތު ހަމަވަ އިތުރު ވަގުތުގެ ދެވަނަ މިނިޓުގައި ޖޫޑް ބެލިންހަމް ވަނީ ވިނިޝިއަސް ޖޫނިއަރ ދިން ބޯޅަ އަކުން އިތުރު ލަނޑެއް ޖަހާ މެޗުގެ ނަތީޖާ 3-2 އަށް ބަދަލުކޮށްފަ އެވެ. މި ނަތީޖާ އާއިއެކު ޗެމްޕިއަންސް ލީގުގެ ދެވަނަ ބުރުގެ ޖާގައެއް ހޯދުމަށް މެންޗެސްޓަރ ސިޓީއަށް ވަނީ އުނދަގޫ މަރުހަލާއެއް ކަޑައްތު ކުރަން ޖެހިފަ އެވެ. އެގޮތުން މި މަހުގެ 19 ވަނަ ދުވަހު މެޑްރިޑްގެ ސެންޓިއާގޯ ބަރނަބިއު ސްޓޭޑިއަމްގައި ކުޅޭ މެޗުން އެ ޓީމަށް ޖެހޭނީ ދެ ލަނޑުގެ ތަފާތަކުން ރެއާލް މެޑްރިޑް ބަލިކުރުމަށެވެ.