ޗައިނާގެ ފޮރިން މިނިސްޓަރު ދެއްވީ މަޝްރޫއުތައް އަވަސްކޮށްދެއްވާނެ ކަމުގެ ޔަގީންކަން

Read Time:4 Minute, 32 Second

(ފޮޓޯ ކްރެޑިޓްސް: ރައީސް އޮފީސް)

ޗައިނާގެ އެހީގައި ރާއްޖޭގައި ފެށުމަށް ހަމަޖެހިފައިވާ މަޝްރޫއުތައް އަވަސްކޮށްދެއްވާނެ ކަމުގެ ޔަގީންކަން، ޗައިނާގެ ފޮރިން މިނިސްޓަރު، ވާންގް ޔީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒަށް ދެއްވައިފިއެވެ. ޗައިނާގެ ފޮރިން މިނިސްޓަރ ވާންގް ޔީ ރައީސުލްޖުމްހޫރިއްޔާއާ ބައްދަލުކުރެއްވީ، އަމިއްލަ ދަތުރުފުޅެއްގައި ރާއްޖެ ވަޑައިގެން މިއަދު ހަވީރުގެ ވަގުތެއްގައި ރައީސް އޮފީހުގައެވެ. މި ބައްދަލުކުރެއްވުމުގައި ރައީސް ޑރ. މުއިއްޒު ވަނީ ޗައިނާއިން ރާއްޖެއާ މެދު ބަހައްޓަވާ ގާތްކަން ފާހަގަކުރައްވައި، ފާއިތުވި އަހަރުތަކުގައި އެގައުމުން ރާއްޖޭގެ ތަރައްގީއާއި ކުރިއެރުމަށް ވެދެއްވާފައިވާ އެހީތެރިކަން ފާހަގަކޮށް ޝުކުރު ދަންނަވާފައެވެ.

މީގެ އިތުރުން، ރައީސް ޑރ. މުއިއްޒު ޗައިނާއަށް ކުރެއްވި ދަތުރުފުޅުގައި ދެގައުމުގެ ދެމެދުގައި ވެފައިވާ ތަރައްގީގެ އެއްބަސްވުންތަކުގައި ހިމެނޭ މަޝްރޫއުތައް އަވަސްކުރުމުގެ މުހިއްމު ކަމަށް އެމަނިކުފާނު ވަނީ އަލިއަޅުއްވާފައެވެ. މިގޮތުން، ސޯޝަލް ހައުސިން އާއި މަގުތައް ޒަމާނީ ފެންވަރަށް ތަރައްގީ ކުރުމަކީ ދިވެހި ރައްޔިތުންނަށް މި ވަގުތު ދިމާވެފައިވާ އެންމެ ބޮޑު އިޖުތިމާއީ މައްސަލަތައް ކަން ފާހަގަ ކުރައްވައި، އެކަން ހައްލު ކުރުމަށް ޗައިނާގެ އެހީތެރި ކަމަށް ވާންގް އަރިހުން ރައީސް އެދިވަޑައިގަތެވެ.

މީގެ އިތުރުން، މަސްވެރިކަމާއި ދަނޑުވެރިކަން އިތުރަށް ފުޅާކޮށް، ތަރައްގީ ކުރުމުގައި ޗައިނާގެ އެހީތެރިކަން ވަރަށް ބޮޑަށް ބޭނުންވާ ކަމަށްވެސް އެމަނިކުފާނު ވިދާޅުވިއެވެ. ވާންގް ވަނީ ރައީސް މުއިއްޒުގެ ސަރުކާރުގެ އިގްތިސާދީ ސިޔާސަތަށް ތައުރީފް ކުރައްވައި، ރާއްޖޭގެ ތަަރައްގީއަށް އެގައުމުން ވެދެއްވަމުން އަންނަ އެހީތެރިކަމާއި އެއްބާރުލުން ދަމަހައްޓާނެ ކަމުގެ ޔަގީންކަން ދެއްވާފައެވެ. ވާންގް ވަނީ ޗައިނާގެ އެހީގައި ކުރިއަށް ގެންދާ އުމްރާނީ ތަރައްގީގެ މަޝްރޫއުތައް އަވަސް ކުރުމުގައި އެހީތެރިވެދިނުމަށް ތައްޔާރަށް ހުންނެވި ކަމުގެ ޔަގީންކަންވެސް ދެއްވައިފަ އެވެ.

ވާންގް ވިދާޅުވީ ސައިޒުގެ ގޮތުން ދެ ގައުމުގެ ކިތަންމެ ތަފާތުވި ނަމަވެސް، ދެ ގައުމު ގުޅިގެން ތަރައްގީ އާއި ކުރިއެރުމަށް މަސައްކަތް ކުރެވޭނެ ކަން ރާއްޖެ އާއި ޗައިނާ އިން ސާބިތުކޮށްދީފައިވާ ކަމަށެވެ. މި ބައްދަލުވުމުގައި ދެ ގައުމު ގުޅިގެން މަސައްކަތް ކުރެވޭނެ އިތުރު ދާއިރާތަކާ ގުޅޭގޮތުން ވެސް ދެ ބޭފުޅުން ވަނީ މަޝްވަރާ ކުރައްވައިފަ އެވެ.