ބައިނަލް އަޤުވާމީ ކޮންފަރެންސްއަކަށް ވަޒީރު ޝަހީމު ޕާކިސްތާނަށް

Read Time:4 Minute, 1 Second

މުސްލިމް ވޯލްޑް ލީގް (ރާބިޠަތުލް ޢާލަމިލްއިސްލާމީ) އިން އިންތިޒާމުކޮށްގެން ބާއްވާ ބައިނަލްއަޤްވާމީ ކޮންފަރެންސެއްގައި ބައިވެރިވެވަޑައިގަތުމަށް އިސްލާމީ ކަންތައްތަކާއި ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ޕާކިސްތާނަށް ވަޑައިގެންފިއެވެ. މި ކޮންފަރެންސްގެ މައުޟޫއަކީ އިސްލާމީ މުޖުތަމަޢުތަކުގައި އަންހެންދަރީންނަށް ތަޢުލީމު ދިނުމެވެ. ދެ ދުވަހުގެ މިދަތުރުފުޅުގައި ކޮންފަރެންސްގެ އިލްމުވެރިންގެ ސެޝަންގައި ޑރ. ޝަހީމް ވާހަކަފުޅު ދައްކަވާނެ ކަމަށް އެ ވުޒާރާއިން މަޢުލޫމާތު ދީފައިވެއެވެ.

ޑރ. ޝަހީމަކީ މުސްލިމް ވޯލްޑް ލީގްގެ ސުޕްރީމް ކައުންސިލްގެ މެންބަރެއްވެސް މެއެވެ. މި ކޮންފަރެންސްގައި ވަޒީރު ޝަހީމު ބައިވެރިވެވަޑައިގަތުމަކީ އިސްލާމީ ޢާލަމުގައި ދިވެހިރާއްޖޭގެ ދައުރު އިތުރަށް ފުޅާކުރުމަށް ލިބޭ ފުރުޞަތެކެވެ. ރާބިޠަތުލް ޢާލަމިލް އިސްލާމީ (މުސްލިމް ވޯލްޑް ލީގް) ގެ އެންމެ މަތީ މަޖިލީހަކީ އިސްލާމީ ދުނިޔޭގެ ފާހަގަކޮށްލެވޭ އިލްމީ ޝަޚްޞިއްޔަތުތައް ހިމެނޭ މަޖިލީހެކެވެ. މި ޖަމްޢިއްޔާގެ ހެޑް އޮފީސް ހުންނަނީ ސަޢޫދީ ޢަރަބިއްޔާގެ މައްކާގައެވެ.

ވަޒީރު ޑރ. ޝަހީމް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ އިސްލާމީ ތަޞައްވުރު ރާބިޠާއާ ހިއްސާކުރައްވާފައެވެ. އަދި ރާބިޠާއާއި ރާއްޖެއާ ދެމެދު ގުޅުން އިތުރަށް ވަރުގަދަކުރުމަށް ގިނަ މަޝްވަރާތަކެއް ސަރުކާރުން ވަނީ ކޮށްފައެވެ. މި މަޝްވަރާތަކުގެ ތެރޭގައި، އިސްލާމީ ކަންތައްތަކާބެހޭ ވުޒާރާއާއި ރާބިޠާއާ ދެމެދު 2012 އިން 2015 އަށް ސޮއިކޮށްފައިވާ ތިން އެއްބަސްވުމަށް ޢަމަލުކުރަން ފެށުމަށާއި، ރާއްޖޭގައި ރާބިޠާގެ އޮފީހުގެ މަސައްކަތްތައް އަލުން ފެށުމަށް ވަނީ ނިންމާފައެވެ.

އިސްލާމީ މުޖުތަމަޢުތަކުގައި އަންހެންދަރީންގެ ތަޢުލީމީ ޙައްޤުތައް ކަށަވަރުކުރުމާއި، އެކަމަށް ހުރި ގޮންޖެހުންތައް ދެނެގަނެ ހައްލުކުރުމަށް މަގުފަހިކުރުމަކީ މި ކޮންފަރެންސްގެ މައިގަނޑު މަޤްޞަދު ކަމަށް ބެލެވެއެވެ. މި ކޮންފަރެންސްގައި ބައިވެރިވެވަޑައިގަންނަވާ އެހެން ޤައުމުތަކުގެ އިސް ފަރާތްތަކާއެކު މަޝްވަރާކުރުމުގެ ފުރުޞަތު ޑރ. ޝަހީމަށް ލިބިވަޑައިގަންނަވާނެއެވެ.