ގެރިމަސް ނުކާ ތިން ކާޅު: ނޫސްވެރިކަމުގެ މިނިވަންކަމުގެ ޗެމްޕިއަނުންނަށް ވެވޭނެ؟

Read Time:3 Minute, 0 Second

(ފޮޓޯ ކްރެޑިޓްސް: ޙުލާސާ ނިއުސް)

ރާއްޖޭގެ ކުރީގެ ތިން ރައީސުން ކަމަށްވާ މުހައްމަދު ނަޝީދާއި، އަބްދުﷲ ޔާމީނާއި، އިބްރާހީމް މުހައްމަދު ސޯލިހު، ނޫސްވެރިކަމުގެ މިނިވަންކަމުގެ ދިފާއުގައި އެއްގަލަކަށް އެރުމަކީ ސިޔާސީ އޮޅުވާލުމެކެވެ. މިއީ ބާރު ގެއްލުމުން އަމިއްލަ މާޒީ ހަނދާން ނައްތާލައި، ސިޔާސީ މަންފާއަށްޓަކައި ދައްކާ ވާހަކަތަކެކެވެ.

ރައީސް ނަޝީދުގެ ދައުރުގައި ޑިމޮކްރަސީގެ ނަމުގައި ސިފައިން ފޮނުއްވައިގެން ދައުލަތުގެ މީޑިއާ ހިސާރުކޮށް، ސަރުކާރަށް ފާޑުކިޔާ މީޑިއާތަކަށް ހަމަލާދީ ބިރުދެއްކިއެވެ. ރައީސް ޔާމީންގެ ވެރިކަމަކީ ނޫސްވެރިކަމުގެ އެންމެ އަނދިރި ޒަމާނެވެ. އަބުރުގެ ގާނޫނު މެދުވެރިކޮށް މީޑިއާތައް ބޮޑެތި އަދަދުތަކުން ޖޫރިމަނާކޮށް، ނޫސްވެރިން ހައްޔަރުކޮށް އަނިޔާކުރުމުގެ ރެކޯޑެއް އެމަނިކުފާނުގެ އޮތެވެ. ރައީސް ސޯލިހުގެ ދައުރުގައިވެސް ނޫސްވެރިންގެ މަސްދަރު ހާމަކުރަން މަޖުބޫރުވާ ގޮތަށް ހެކީގެ ގާނޫނު ތަސްދީގުކޮށް، އިދިކޮޅު ހަރަކާތްތައް ކަވަރުކުރި ނޫސްވެރިންނަށް ފުލުހުން އަނިޔާކޮށްފައިވެއެވެ.

މި ތިން ބޭފުޅުންގެ ވެރިކަމުގައިވެސް ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ވަނީ ވަރަށް ބޮޑަށް ދަށަށް ގޮސްފައެވެ. މިއަދު މި ތިން ބޭފުޅުން އެއް ޕޯޑިއަމަކުން ފެނުމަކީ، ބާރު ހޯދުމަށްޓަކައި ރައްޔިތުންގެ ޖަޒުބާތާ ކުޅުމަށް ކުރާ ކަމެކެވެ. ނޫސްވެރިކަމުގެ މިނިވަންކަމަކީ ހަމައެކަނި ބާރު ނެތް ދުވަހު ދައްކަންޖެހޭ ވާހަކައެއް ނޫނެވެ. މާޒީގައި ކަންކޮށްފައިވާ ގޮތުން، މި ބޭފުޅުންނަކީ ނޫސްވެރިކަމުގެ ހަގީގީ ޗެމްޕިއަނުން ނޫންކަން ތާރީހުން އެނގެން އެބައޮތެވެ.