Read Time:4 Minute, 43 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ޑިސެމްބަރު 1 ގައި ފެށި އެފްއޭއެމް ވިމެންސް ލީގު 2025 އަކީ 10 އަހަރަށްފަހު އަންހެން ފުޓުބޯޅައަށް ލިބުނު ފުރުސަތެކެވެ. މިއީ އަތޮޅުތަކުގައި ފުޓުބޯޅަ ކުޅުމުގެ ޝައުގު ހުރި އަންހެން ކުޅުންތެރިންނަށް އުންމީދެއް ގެނެސްދިން މުބާރާތެކެވެ. ލީގުގައި ވާދަކުރި ކުލަބުތަކާއި ކުޅުންތެރިންގެ އުންމީދަކީ އަންނަ އަހަރު މި ލީގު މާބޮޑަށް، މާލެއިން ބޭރުގައިވެސް މެޗުތައް ކުޅެގެން ބޭއްވުމެވެ. ‘ޕީއެސްއެމް ނިއުސް’ އާއި ވާހަކަ ދެއްކި ބައެއް އަތޮޅު ކުޅުންތެރިން ބުނީ އަތޮޅުތަކުގައި ފުޓުބޯޅައިގެ ފުރުސަތު މަދުކަމަށާއި، މި ލީގަކީ ގައުމީ ޓީމަށް ކުޅުމުގެ އުންމީދުގައި ތިބި ކުޅުންތެރިންނަށް ލިބުނު ރަނގަޅު ފުރުސަތެއް ކަމަށެވެ.
މިގޮތުން، މާޒިޔާއަށް ކުޅޭ އދ. އޮމަދޫގެ ފާތިމަތު އިނާޔާ ބުނީ ގައުމު ތަމްސީލުކުރުމުގެ އުންމީދުގައި މި ފުރުސަތުގެ ބޭނުން ހިފަނީ ކަމަށެވެ. ބ. ކިހާދޫގެ ފާތިމަތު ނިހާމާ ބުނީ އަންހެން ފުޓުބޯޅަ ފެށުމަކީ ފުރުސަތެއް ނުލިބި ތިބި ކުޅުންތެރިންނަށް ލިބުނު މުހިންމު ފުރުސަތެއް ކަމަށާއި، އޭނާވެސް ގައުމީ ސްކޮޑުން ޖާގަ ހޯދަން މަސައްކަތްކުރާނެ ކަމަށެވެ. އަދި އަތޮޅުތެރޭގައި ޚާއްސަ މުބާރާތްތައް ބޭއްވުމަށް އެފްއޭއެމްއަށް އެދިފައިވެއެވެ. މާޒިޔާގެ ކޯޗުވެސް އުންމީދުކުރަނީ ގައުމީ ޓީމަށް ކުޅުންތެރިން އުފެއްދުމަށާއި، ލީގު އިތުރަށް ފުޅާކުރުމަށެވެ. ރާއްޖޭގެ އަންހެން ފުޓުބޯޅަ ކުރިއަށް ގެންދެވޭނެކަމަށް އޭނާ ގަބޫލުކުރެއެވެ.
މި ލީގުގައި ޖުމްލަ 6 ޓީމު ބައިވެރިވިއެވެ. އެއީ ޓީސީ، ވިކްޓްރީ، އޮޑި، ނިއުރޭޑިއަންޓް، މާޒިޔާ އަދި ބިސްބުރުއެވެ. މުބާރާތް ނިންމާލިއިރު، އެންމެ ގިނަ ޕޮއިންޓް ހޯދައި، ފޯރިގަދަ މެޗަކަށްފަހު އޮޑި ސްޕޯޓްސް ކުލަބު 2-0 އިން ބަލިކޮށް ލީގު ކާމިޔާބުކުރީ މާޒިޔާ ސްޕޯޓްސް އެންޑް ރެކްރިއޭޝަނުންނެވެ. އެފްއޭއެމްގެ އުންމީދަކީ ކުރިޔަށް އޮތް އަހަރުތަކުގައި ޓީމުތަކުގެ އަދަދު އިތުރުކޮށް އަތޮޅުތެރެއިންވެސް ކުޅުންތެރިން ބައިވެރިކޮށްގެން އަންހެން ފުޓުބޯޅަ ލީގު ބޭއްވުމެވެ. ފީފާގެ ރައީސް ޖިއާނީ އިންފަންޓީނޯ ރާއްޖެއަށް ކުރެއްވި ދަތުރުފުޅަށްފަހު އަންހެން ފުޓުބޯޅައަށް އެހީވުމަށް ނިންމާފައިވާއިރު، އަތޮޅު މުބާރާތާއި އަންހެން ލީގަށް ފައިސާގެ އެހީތެރިކަން ފޯރުކޮށްދީފައިވެއެވެ. މިހާރު ދުނިޔޭގެ އަންހެން ރޭންކިންގައި ރާއްޖެ އޮތީ 165 ވަނައިގައެވެ. ސަރަހައްދީ ޓީމުތައް ކުރިއަރަމުންދާ ދަނޑިވަޅެއްގައި މިފަދަ ފެށުމަކީ ރާއްޖޭގެ އަންހެން ފުޓުބޯޅައަށް އިތުރު ކުރިއެރުންތަކަށް މަގުފަހިކޮށްދޭނެ ކަމެއް ކަމަށް ކުޅުންތެރިން ގަބޫލުކުރެއެވެ.
Happy
0 %
Sad
0 %
Excited
0 %
Sleepy
0 %
Angry
100 %
Surprise
0 %
0
0