މަހަލްދީބުން އެއްކުރި 3.8 ޓަނުގެ މުދާ މޯލްޑިވިއަނުން ލަންކާއަށް ފޮނުވައިދީފި

Read Time:5 Minute, 48 Second

(ފޮޓޯ ކްރެޑިޓްސް: ޕީއެސްއެމް ނިއުސް)

މިމަހުގެ 6 ވަނަ ދުވަހާ ހަމައަށް ރާއްޖެއަށް 2،059،962 ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރާ އަޅާބަލާއިރު %10.1 އިތުރު އަދަދެކެވެ. ފަތުރުވެރިންގެ ތެރެއިން 1.5 މިލިޔަނަށް ވުރެ ގިނަ މީހުން ނުވަތަ %73.6 ޗުއްޓީ ހޭދަކޮށްފައިވަނީ ރިސޯޓުތަކުގައެވެ. ގެސްޓްހައުސްތަކުގައި 4 ލައްކައަށް ވުރެ ގިނަ ފަތުރުވެރިން ތިބި އިރު، ހޮޓެލްތަކުގައި 53,000 އަށް ވުރެ ގިނަ ފަތުރުވެރިން ވަނީ ޗުއްޓީ ހޭދަކޮށްފައެވެ. ރާއްޖެއަށް އެންމެ ގިނައިން ފަތުރުވެރިން އައި ފަސް ޤައުމަކީ ޗައިނާ، ރަޝިއާ، އިނގިރޭސިވިލާތް، ޖަރުމަނުވިލާތް އަދި އިޓަލީވިލާތެވެ. މި ކޮންމެ ޤައުމަކުން ވެސް 1 ލައްކައަށް ވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިހާރު ރާއްޖޭގައި 1313 ފަތުރުވެރިކަމުގެ ތަން ހިންގަމުންދާއިރު، އެތަންތަނުގައި 66,805 އެނދު އެބަހުއްޓެވެ.

ހުޅުމާލެ ތަރައްޤީކުރުމުގެ މަސައްކަތްތަކާ ބެހޭގޮތުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފައިވަނީ، އަންނަ އަހަރު ހުޅުމާލެ ދެވަނަ ފިޔަވަހީގައި ނުހަދާ ހުރި މަގުތައް ތަރައްޤީކުރުމުގެ މަސައްކަތް ފަށާނެ ކަމަށެވެ. އެޗްޑީސީގެ މެނޭޖިން ޑިރެކްޓަރ އަލީ ޒުހައިރު ވިދާޅުވީ، ދެވަނަ ފިޔަވަހީގައި ދިރިއުޅޭ މީހުންނަށް ބޭނުންވާ ޚިދުމަތްތައް އިތުރުކޮށް، އެ ސަރަހައްދު ޒީނަތްތެރިކުރުމަށް މަސައްކަތް ކުރައްވަމުން ގެންދަވާ ކަމަށެވެ. މީގެ އިތުރުން، ހުއްޓިފައި ހުރި ބައެއް މަޝްރޫއުތައް ކޯޓު މަރުހަލާގައިވާތީ، އެކަންކަން ހައްލުކުރުމަށް މަސައްކަތް ކުރަމުންދާ ކަމަށް ވެސް ޒުހައިރު ވިދާޅުވިއެވެ. ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހީގެ ބައެއް މަގުތައް ތަރައްޤީކުރުމަށް މިމަހުގެ ތެރޭގައި ޗައިނާގެ ރޯޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑާ ވަނީ ހަވާލުކޮށްފައެވެ. މި މަސައްކަތުގެ ތެރޭގައި ފޭސް 1 ގައި ނުނިމި ހުރި 5 މަގު، އަދި ފޭސް 2 ގެ ވިނަރެސް ފްލެޓްތައް ކައިރިން އޮތް މަގު ހިމެނެއެވެ. ޖުމްލަ 1.1 ކިލޯމީޓަރުގެ މަގުތައް ތާރު އަޅައިގެން ތަރައްޤީކުރެވޭނެއެވެ. މީގެ އިތުރުން، މީގެ ކުރިން ހަދާފައިވާ މަގުތަކުގެ ތެރެއިން ހަލާކުވެފައިވާ ފިތުރޯނު މަގު ފަދަ މަގުތައް މަރާމާތުކުރުމުގެ މަސައްކަތް ވެސް މި މަޝްރޫޢުގެ ތެރެއިން ހިމެނެއެވެ. މި މަޝްރޫޢުގެ މަސައްކަތް 6 މަސް ދުވަހުގެ ތެރޭގައި ނިންމުމަށް ވަނީ އެއްބަސްވެފައެވެ.

އަވަށްޓެރި ސްރީލަންކާއަށް ކުރިމަތިވި ކާރިސާއަށް އެހީތެރިކަން ފޯރުކޮށްދިނުމަށް މަހަލްދީބް ފައުންޑޭޝަނުން އެއްކުރި 3.8 ޓަނުގެ މުދާ މޯލްޑިވިއަންގެ ފްލައިޓްގައި ސްރީލަންކާއަށް ފޮނުވައިފިއެވެ. ތޫފާން ދިތުވާއިން ސްރީލަންކާއަށް ލިބުނު ގެއްލުމުން އަރައިގަނެ އެހީތެރިކަން ފޯރުކޮށްދިނުމަށް އެންމެ ފުރަތަމަ އިސްނެގި ޤައުމަކީ ރާއްޖެއެވެ. “ސިލޯނާއެކު ދިވެހީން” ގެ ނަމުގައި ޕަބްލިކް ސަރވިސް މީޑިއާއިން އިސްނަގައިގެން ކުރިއަށްގެންދިޔަ ޚާއްސަ ޓެލެތޯނަކުން ޖުމުލަ 834,843.98 ޑޮލަރު ލިބިފައިވާއިރު، މި ފައިސާ މިހާރު ވަނީ ސްރީލަންކާގެ ސަރުކާރަށް ހަވާލުކޮށްފައެވެ. ރާއްޖެއިން ދިން މި އެހީތެރިކަމަށް ސްރީލަންކާގެ ގިނަ ރައްޔިތުން ވަނީ ޝުކުރު އަދާކޮށްފައެވެ.