ރާއްޖޭގެ ފަތުރުވެރިކަމުގެ ސިނާއަތުގައި ދިވެހި ކުންފުނިތަކުގެ ދައުރު ފުޅާވަމުންދޭ: ވަޒީރު ޠާރިޤު

Read Time:7 Minute, 44 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ރާއްޖޭގެ ފަތުރުވެރިކަމުގެ ސިނާއަތުގައި ދިވެހި ކުންފުނިތަކުގެ ދައުރު ފުޅާވެފައިވާ ކަމަށާއި، މިވަގުތު ރާއްޖޭގައި އެންމެ ގިނަ ބެޑްސް ހިންގާ ދިވެހި އުފެއްދުމަކީ ކްރައުންސް އެންޑް ޗަމްޕާ ރިސޯޓްސް ކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ، ނަލަ މޯލްޑިވްސް ރިސޯޓު ހުޅުއްވާދެއްވުމަށް ބޭއްވި ރަސްމިއްޔާތަށްފަހު ޕީއެސްއެމް ނިއުސްއަށް ދެއްވި ޚާއްސަ އިންޓަރވިއުއެއްގައެވެ. ޅ. އަތޮޅުގައި ހިންގި އިންނަހުރާ މޯލްޑިވްސް ރިސޯޓު ފަސް ތަރީގެ ފެންވަރަށް ތަރައްގީކޮށް “ނަލަ މޯލްޑިވްސް ބައި ޖާވާކަރަ” އަށް ރީބްރޭންޑް ކުރުމަށްފަހު އަލުން ވަނީ ހުޅުވާފައެވެ. ފަސް ތަރީގެ މި ރިސޯޓު ހުޅުއްވައިދެއްވީ ފަތުރުވެރިކަމާއި ތިމާވެށްޓާ ބެހޭ ވަޒީރު ޠާރިޤު އިބްރާހީމް އާއި ޗަމްޕަރ ބްރަދާރސްގެ ޗެއަރމަން މުޙައްމަދު މޫސާއެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

“ނަލަ މޯލްޑިވްސް” ރިސޯޓު ހުޅުއްވާދެއްވުމަށް ޕީއެސްއެމް ނިއުސްއަށް ދެއްވި ހާއްސަ އިންޓަރވިއުއެއްގައި ފަތުރުވެރިކަމާ ބެހޭ ވަޒީރު ޠާރިޤު އިބްރާހީމް ވިދާޅުވީ، ކްރައުންސް އެންޑް ޗަމްޕާ ރިސޯޓްސްއަކީ މިވަގުތު ރާއްޖޭގައި އެންމެ ގިނަ ބެޑްސް ހިންގާ ދިވެހީންގެ އުފެއްދުމެއް ކަމަށެވެ. އަދި ދިވެހި ކުންފުންޏަކުން ރާއްޖޭގެ ފަތުރުވެރިކަމަށް ބެޑްސްތައް އިތުރުކުރުމަކީ ފަހުރުވެރިވާންޖެހޭ ވަރުގެ ކާމިޔާބީއެއްގެ ގޮތުގައި ވަޒީރު ސިފަކުރެއްވިއެވެ. “އަޅުގަނޑުމެން ވަރަށް ބޮޑަށް ފަހުރުވެރިވާކަމެއް. އެއީ އަސްލު ރާއްޖޭގައި އެންމެ ގިނަ އަދަދެއްގެ ބެޑްސް ހިންގާ ރިސޯޓުތަކުގެ ތެރޭގައި ރާއްޖޭގެ ދިވެހި އުފެއްދުމެއްގެ ރިސޯޓުތައް މީގެ ތެރޭގައި ހިމެނޭތީ. އެއީ އަޅުގަނޑުމެން ބޭނުންވާ ގޮތް. އަޅުގަނޑު ދަންނަވާނީ މިހާރުވެސް ރާއްޖޭގައި އެންމެ ގިނައީ ދިވެހި ކުންފުނިތަކުން ހަދާފައިވާ ނުވަތަ ތަރައްޤީކޮށްފައިވާ ހޮޓެލްތަކާއި ރިސޯޓުތައް.” ފަތުރުވެރިކަމާ ބެހޭ ވަޒީރު ޠާރިޤު އިބްރާހީމް ވިދާޅުވިއެވެ.

މި ސަރުކާރުން ރާއްޖޭގެ ފަތުރުވެރިން އިތުރަށް ފުޅާކުރުމަށް ކުރަމުންދާ މަސައްކަތްތަކުން ކާމިޔާބީތައް ހާސިލްވަމުންދާ ކަމަށްވެސް ވަޒީރު ވިދާޅުވިއެވެ. އެގޮތުން، މިދިޔަ އަހަރާ އަޅާ ބަލާއިރު މިއަހަރުގެ މިހާތަނަށް ރާއްޖެއަށް ޒިޔާރާތްކުރި ފަތުރުވެރިންގެ އަދަދު ވަނީ 10 އިންސައްތައިގެ އިތުރުވުމެއް ހާސިލްކޮށްފައެވެ. މިއީ ފަތުރުވެރިކަމުގެ ސިނާއަތަށް ލިބުނު ވަރަށް ބޮޑު ކުރިއެރުމެއްކަމަށް ވަޒީރު ފާހަގަކުރެއްވިއެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

މީގެ އިތުރުން، ވޭތުވެދިޔަ 2 އަހަރު ދުވަހުގެ ތެރޭގައި 6223 އެނދު ފަތުރުވެރިކަމަށް އަލަށް ނެރެވިފައިވާ ކަމަށާއި، މިއަންނަ އަހަރުވެސް ވަރަށް ގިނަ އަދަދެއްގެ ރިސޯޓުތައް ހުޅުވުމަށް ހަމަޖެހިފައިވާ ކަމަށް ވަޒީރު ވިދާޅުވިއެވެ. އަދި މިކަމުގެ ސަބަބުން ފަތުރުވެރިކަމަށް ނެރޭ އެނދުގެ އަދަދު އިތުރަށް ބޮޑުވެގެންދާނެ ކަމަށް ލަފާކުރެވޭކަމެއްކަން ފާހަގަކުރައްވާ ވަޒީރު ވިދާޅުވީ، މިއީ ރާއްޖޭގެ އިޤްތިޞާދަށް ފައިދާ ކުރާނެ ކަމެއްކަމަށެވެ. “މިއާއެކު ރާއްޖޭގެ ފަތުރުވެރިކަން ވަރަށް ބޮޑަށް ކުރިއަރައިގެންދާއިރު އަޅުގަނޑުމެން ކުރަންޖެހޭ އެންމެ މުހިންމު އެއް ކަމަކީ ފަތުރުވެރިކަމުން ލިބޭ ނަފާ ނުވަތަ ޓޫރިޒަމް ރިސިޕްޓްސް އިތުރުކުރުން. އެގޮތަށް ބަލާއިރު މިދިޔަ އަހަރު ޓޫރިޒަމް ރިސިޕްޓްސް ހުރީ 4.79 ބިލިޔަން ޔޫއެސް ޑޮލަރުގަ. މިއަަހަރު އަޅުގަނޑުމެންގެ ފޯރކާސްޓަކީ 5.45 ބިލިޔަން ޔޫއެސް ޑޮލަރަށް އަރާނެކަމަށް.” ފަތުރުވެރިކަމާ ބެހޭ ވަޒީރު ޠާރިޤު އިބްރާހީމް ވިދާޅުވިއެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

ޅ. އަތޮޅުގެ ޖާވާ ފަޅުގައި ތަރައްޤީކޮށްފައިވާ މި ރިސޯޓަކީ 80 ވިލާއާއެކު ތަރައްޤީކޮށްފައިވާ ރިސޯޓެކެވެ. މީގެ ތެރޭގައި 20 ސަންރައިޒް ވިލާ، 22 ސަންސެޓް ވިލާ، 30 އޯވަރ ވޯޓަރ ވިލާ އަދި 8 ރޮމޭންޓިކް ވިލާ ހިމެނެއެވެ. ވެލާނާ އިންޓަރނޭޝަނަލް އެއަރޕޯޓުން ސީޕްލޭންގައި 35 މިނެޓުގެ ދަތުރަކުން ދެވޭ މި ރިސޯޓުން ފަތުރުވެރިންނަށް ތަފާތު ގިނަ ތަޖުރިބާތަކެއް ކުރެވޭނެކަމަށާއި، ރިސޯޓް ތަރައްޤީކޮސްފައިވަނީ ރާއްޖޭގެ ގުދުރަތީ ރީތި މަންޒަރުތަކާއި، ސަޤާފަތް ދައްކުވައިދޭފަދަ ގޮތަކަށްކަމަށް މި ރިސޯޓުން ބުނެއެވެ.