Read Time:3 Minute, 15 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ބަންޑާރަނައިބު އަލްއުސްތާޛު އަޙްމަދު އުޝާމް ވިދާޅުވެފައިވަނީ ލާމަރުކަޒީ ޤާނޫނަށް ސަރުކާރުން ހުށައަޅާފައިވާ އިޞްލާޙުތަކުގެ ސަބަބުން ކައުންސިލްތަކުގެ ތަރައްޤީގެ މަސައްކަތްތައް އަވަހަށް ނިންމައި، ޢަމަލީކުރުމަށް މަގުފަހިވާނެ ކަމަށެވެ. އެމަނިކުފާނު މިހެން ވިދާޅުވީ ސަރުކާރަށް ދެ އަހަރު ފުރުމުގެ މުނާސަބާގައި ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.
ބަންޑާރަނައިބު ފާހަގަކުރެއްވި ގޮތުގައި، މިހާރު ކައުންސިލަރުންގެ އަދަދު ގިނަވުމުގެ ސަބަބުން ނިންމުންތައް ނިންމުމަށް ލަސްވެ، ޚަރަދު އިތުރުވެއެވެ. އެހެންކަމުން ކައުންސިލަރުންގެ އަދަދު މަދުކުރުމާއި އަތޮޅު ކައުންސިލްތައް އުވާލުމަކީ ނިންމުންތައް އަވަސްކޮށް، ބޭކާރު ޚަރަދު ކުޑަކުރާނެ ކަމެކެވެ. އޭގެ ސަބަބުން ލޯކަލް ގަވަރމަންޓް އޮތޯރިޓީ (އެލްޖީއޭ) އާއި ރަށު ކައުންސިލްތަކާ ދެމެދު އުފެދޭ ހުރަސްތައް ނައްތާލެވޭނެއެވެ.
މީގެ އިތުރުން، އެމަނިކުފާނު ވިދާޅުވީ މި ސަރުކާރުގެ މި ދެ އަހަރުގެ ތެރޭގައި 65 ބިލު މަޖިލީހަށް ހުށައަޅާފައިވާއިރު، އޭގެ ތެރެއިން 50 ބިލު ފާސްވެ ޤާނޫނަށް ވެފައިވާ ކަމަށެވެ. އަދި ކުރިއަށް އޮތް މަހެއްހާ ދުވަހުގެ ތެރޭގައި އިތުރު 10 ބިލު މަޖިލީހަށް ހުށައެޅުމުގެ މަސައްކަތް ކުރަމުންދާ ކަމަށް ވެސް ވިދާޅުވިއެވެ. ބަންޑާރަނައިބު ވަނީ ގޭންގު ކުށްތަކާއި މަސްތުވާތަކެތީގެ ވަބާއިން ޤައުމު ސަލާމަތްކުރުމަށް ސަރުކާރުން ޚާއްސަ އަހަންމިއްޔަތުކަމެއް ދީފައިވާކަން ފާހަގަކުރައްވައި، އެކަންކަމާ ގުޅޭ ހަރުކަށި ބިލުތައް ފާސްވެ ޤާނޫނަކަށްވެފައިވާ ކަމަށާއި، ފުލުހުންނަށް އިތުރު ބާރުތައް ދިނުމަށް ޖިނާއީ އިޖުރާއަތުގެ ޤާނޫނަށް އިސްލާޙު ގެނެސްފައިވާކަން ވެސް ފާހަގަކުރެއްވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0