Read Time:2 Minute, 57 Second
މޯލްޑިވްސް އިންޓަރނޭޝަނަލް ފައިނޭންޝަލް ސަރވިސަސް އޮތޯރިޓީ (މިފްސާ) ގެ ޗީފް އެގްޒެކެޓިވް އޮފިސަރގެ މަޤާމަށް ދާތޯ އިސްކަންދަރު މުޙައްމަދު ނޫލީ ޢައްޔަންކުރައްވައިފިއެވެ. އޭނާއަކީ މާލީ ޚިދުމަތް ބަލަހައްޓާ އިދާރާތަކުގައި، ޚާއްސަގޮތެއްގައި އޮފްޝޯ މާލީ ޚިދުމަތްތަކުގެ ދާއިރާއިން 30 އަހަރަށްވުރެ ދިގު ތަޖުރިބާއެއް ލިބިފައިވާ ބޭފުޅެކެވެ. މެލޭޝިއާގެ މާލީ އިދާރާތަކުގައި އިސް މަޤާމުތައް ފުރުއްވައި، ލަބުއާން ފައިނޭންޝަލް ސަރވިސް އޮތޯރިޓީ އުފެއްދުމުގައި އިސްކޮށް ހަރަކާތްތެރިވެފައިވެއެވެ.
މިފްސާއަކީ މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރ (އެމް.އައި.އެފް.ސީ) ތަރައްޤީކޮށް އެހީތެރިކަން ފޯރުކޮށްދިނުމަށް ސަރުކާރުން އުފައްދާފައިވާ އިދާރާއެކެވެ. މި އަހަރުގެ ކުރީކޮޅު ސަރުކާރާއި އެމްބީއެސް ގްލޯބަލް އިންވެސްޓްމަންޓްސް ގުޅިގެން ފެށި އެމް.އައި.އެފް.ސީ. އަކީ ފަތުރުވެރިކަމުގެ ދާއިރާގެ އިތުރުން ރާއްޖޭގެ އިޤްތިސާދު ތަފާތު ދާއިރާތަކަށް ފުޅާކުރުމަށް 8.8 ބިލިއަން އެމެރިކާ ޑޮލަރުގެ އިންވެސްޓްމަންޓެއް ހިމެނޭ ތާރީހީ މަޝްރޫއެކެވެ. މުޅިން ދެމެހެއްޓެނިވި ގޮތެއްގައި ހިންގުމަށް ފަރުމާކޮށްފައިވާ މި ފައިނޭންޝަލް ފްރީޒޯނުގެ މަޤްސަދަކީ ދުނިޔޭގެ މާލީ އިދާރާތަކާއި، ފިންޓެކް ދާއިރާގެ އީޖާދީ ފަރާތްތަކާއި، ވިޔަފާރިވެރިންނާއި، ޑިޖިޓަލް ހުނަރުވެރިން ރާއްޖެއަށް ގެނައުމެވެ. ސަރުކާރުން ވިދާޅުވަނީ މީގެ ސަބަބުން މާލެއަކީ އިންޑިއާ ކަނޑުގެ ސަރަހައްދުގައިވާ އެންމެ ކުރިއަރާފައިވާ ބައިނަލްއަޤުވާމީ ވިޔަފާރީގެ އަދި މާލީ މަރުކަޒަށް ވެގެންދާނެ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0