Read Time:4 Minute, 25 Second
(ފޮޓޯ ކްރެޑިޓްސް: ރައީސް އޮފީސް)
ޢާންމު ޞިއްޙަތުގެ ނިޒާމު ވަރުގަދަކުރެއްވުމުގެ ގޮތުން ސަރުކާރުން މާލެ ސަރަޙައްދުގައި ޤާއިމުކުރެއްވި ފުރަތަމަ އަރބަން ޕްރައިމަރީ ހެލްތުކެއަރ ސެންޓަރ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރަސްމީކޮށް ހުޅުއްވައިދެއްވާފައެވެ. މި ސެންޓަރު ހުޅުވައިދެއްވީ މިއަދު ހަވީރު މާފަންނުގައި ބޭއްވެވި ރަސްމިއްޔާތެއްގައެވެ. ރައީސުލްޖުމްހޫރިއްޔާގެ ޞިއްޙީ ސިޔާސަތާ އެއްގޮތަށް ފަރުމާކުރެވިފައިވާ މި ސެންޓަރުގެ މަޤުޞަދަކީ ބަލިމަޑުކަމުން ސަލާމަތްވެ، ދުޅަހެޔޮ މުޖުތަމަޢެއް ބިނާކުރުމަށް ބޭނުންވާ ޚިދުމަތްތައް ފޯރުކޮށްދިނުމެވެ.
(ފޮޓޯ ކްރެޑިޓްސް: ރައީސް އޮފީސް)
މި ސެންޓަރުގެ ޚިދުމަތްތަކުގެ ތެރޭގައި ޢާންމު ބަލިތަކުގެ ޑޮކްޓަރުންނަށް ދެއްކުމާއި، ޚާއްޞަ ޑޮކްޓަރުންގެ ލަފާ ހޯދުމުގެ އިންތިޒާމް ހަމަޖެއްސުން ހިމެނެއެވެ. މީގެ އިތުރުން، ޢާންމު ޞިއްޙަތު ކުރިއެރުވުމަށް ހިންގާ ޤައުމީ ޕްރޮގްރާމްތައް، ޚާއްޞަ ގޮތެއްގައި ޗައިލްޑް ހެލްތު ކްލިނިކް މެދުވެރިކޮށް ކުދިންގެ ހެދިބޮޑުވުން މޮނިޓަރކުރުމާއި ވެކްސިން ދިނުންފަދަ ޚިދުމަތްތައް ވެސް ދެވޭނެއެވެ. ޞިއްޙީ ރަނގަޅު އާދަތަކަށް ހޭލުންތެރިކަން އިތުރުކުރުމާއި ނަފްސާނީ ދުޅަހެޔޮކަމާއި ދުންފަތާ ދުރުވުމަށް އެހީވެދޭ ކުލިނިކްތަކުގެ ޚިދުމަތް ވެސް މި ސެންޓަރުން ލިބޭނެއެވެ.
މާލޭ ސިޓީ ގުރޫޕް އޮފް ހޮސްޕިޓަލްސްގެ ސީއީއޯ ޢަބްދުލްރައްޒާޤް ޙަލީމް ވަނީ މިފަދަ ސެންޓަރުތަކެއް ހުޅުވުމުން ރައްޔިތުންނަށް ލިބޭނެ ފައިދާތަކަށް އަލިއަޅުވާލައްވާ، ރައީސުލްޖުމްހޫރިއްޔާއަށް ޝުކުރު އަދާކުރައްވާފައެވެ. މި ސެންޓަރުގެ މަސައްކަތް ނިންމާ، ރަސްމީކޮށް ހަވާލުކުރުން ވެސް ހުޅުވުމުގެ ރަސްމިއްޔާތުގައި އޮތެވެ. މި މަޝްރޫޢުގެ ކޮންޓްރެކްޓަރަކީ ވޭސްޓްމެނޭޖުމަންޓް ކޯޕަރޭޝަން ލިމިޓެޑެވެ. ބަލިޖެހުމުގެ ކުރިން، ބަލިތަކުން ދިފާޢުވުމަށް ރައީސުލްޖުމްހޫރިއްޔާ އިސްކަންދެއްވާ އިރު، މިފަދަ އިތުރު 5 ސެންޓަރު މާލެ ސަރަޙައްދުގައި ތަރައްޤީކުރެއްވުމަށް ވަނީ ހަމަޖެހިފައެވެ. އެގޮތުން މާލޭގައި 3 ސެންޓަރާއި ހުޅުމާލޭގައި 2 ސެންޓަރު ހިމެނެއެވެ. ޞިއްޙީ ދާއިރާ ހަރުދަނާކުރުމަށް ރައީސުލްޖުމްހޫރިއްޔާ ޚާއްޞަ އިސްކަމެއް ދެއްވާކަން ފާހަގަކުރެވޭއިރު، ކުރިއަށް އޮތް 2026 ވަނަ އަހަރުގެ ބަޖެޓުގައި އެއް ދާއިރާއަކަށް އެންމެ ބޮޑު އިސްކަމެއް ދެއްވާފައިވަނީ ވެސް ޞިއްޙީ ދާއިރާއަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0