Read Time:6 Minute, 15 Second
(ފޮޓޯ ކްރެޑިޓްސް: އެމްއޭސީއެލް)
ރާއްޖޭގެ ފަތުރުވެރިކަން ފެށުނީ މީގެ 53 އަހަރު ކުރިން ކަމަށާއި، މިހާރު ފަތުރުވެރިކަމަކީ ރާއްޖޭގެ އިޤްތިޞާދުގެ މައިނާރު ކަމަށް ސަރުކާރުން ބުނެއެވެ. މި ސިނާޢަތް ކުރިއެރުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވުމަށްފަހު ވަނީ ގިނަ މަސައްކަތްތަކެއް ފައްޓަވާފައެވެ. އެގޮތުން، ފަތުރުވެރިކަން ތަރައްޤީވެފައިނުވާ ހއ، ހދ، ށ، ކ، ލ އަދި އައްޑޫ ސިޓީ ފަދަ އަތޮޅުތަކުގައި ރިސޯޓު ހެދުމަށް ޝައުޤުވެރިވާ ފަރާތްތަކަށް ލުއިތަކެއް ދިނުމަށް ނިންމަވާފައިވާއިރު، ‘ހަލާލް ޓުއަރިޒަމް’ ކޮންސެޕްޓަށް ތަރައްޤީކުރާ ރިސޯޓުތަކަށް އިތުރު ލުއިތަކެއް ދިނުމަށްވެސް ވަނީ ނިންމާފައެވެ. މީގެ ދަށުން 5 ރަށެއް ހަލާލް ފަތުރުވެރިކަމަށް ވަނީ ހުޅުވާލާފައެވެ.
ފާއިތުވި އަހަރު ބައިނަލްއަޤްވާމީ ފަރާތްތަކާއެކު ގުޅުންތައް ބަދަހިކޮށްފައިވާއިރު، މި 2025 ވަނަ އަހަރު ރާއްޖޭގައި ފަތުރުވެރިންނަށް ޚިދުމަތް ދިނުމަށް މުޅިން އަލަށް 122 ތަނެއް ރަޖިސްޓްރީކޮށްފައިވެއެވެ. މި ތަންތަނުގެ ތެރޭގައި 2 ރިސޯޓާއި، ޓޫރިސްޓް ހޮޓަލަކާއި، 87 ގެސްޓްހައުސްއާއި، 20 ހޯމް ސްޓޭ ޓޫރިސްޓް ގެސްޓްހައުސް އަދި 12 ޓޫރިސްޓް އުޅަނދު ހިމެނެއެވެ. މިއާއެކު މިވަގުތު ރާއްޖޭގައި 172 ރިސޯޓާއި، 16 ޓޫރިސްޓް ހޮޓަލާއި، 851 ޓޫރިސްޓް ގެސްޓްހައުސްއާއި، 366 ހޯމް ސްޓޭ ޓޫރިސްޓް ގެސްޓްހައުސްއާއި، 163 ޓޫރިސްޓް އުޅަނދު އަދި 3 ޔޮޓް މެރީނާ ހިންގަމުންދާއިރު، މުޅި ޖުމްލަ 65,439 އެނދު ވެއެވެ. ރާއްޖެއަށް މިދިޔަ އަހަރު މުޅިން އަލަށް 2 މިލިޔަން ފަތުރުވެރިން ޒިޔާރަތްކޮށްފައިވާއިރު، މިއަހަރަށް ސަރުކާރުން އަމާޒު ހިފާފައިވަނީ 2.3 މިލިޔަން ފަތުރުވެރިން ގެނައުމަށެވެ. މިހާތަނަށް 1.9 މިލިޔަން ފަތުރުވެރިން ޒިޔާރަތްކޮށްފައިވާއިރު، އެންމެ ގިނައިން ފަތުރުވެރިން އަންނަނީ ޗައިނާ، ރަޝިއާ، އިނގިރޭސިވިލާތް، ޖަރުމަނުވިލާތް އަދި އިޓަލީވިލާތުންނެވެ.
މިއަހަރުގެ ތެރޭގައި ވެލާނާ އިންޓަނޭޝަނަލް އެއަރޕޯޓްގެ އައު ޕެސެންޖަރ ޓާމިނަލް ހުޅުވާފައިވާއިރު، މިއީ އަހަރަކު 7 މިލިޔަން ފަތުރުވެރިންނަށް ޚިދުމަތްދެވޭ ވަރުގެ ޓާމިނަލެކެވެ. މީގެ އިތުރުން، 2020 ވަނަ އަހަރުން ފެށިގެން ބަންދުކޮށްފައިވާ ޝަންގްރިއްލާ ރިސޯޓު މި ޑިސެމްބަރ މަހުގެ 31 ވަނަ ދުވަހު ހުޅުވުމަށް ސަރުކާރުން މަސައްކަތް ކުރަމުންދާއިރު، ރައީސުލްޖުމްހޫރިއްޔާ ވަނީ އެތަނުގެ އެންމެ ފަހުގެ ތައްޔާރީތައް ބައްލަވާފައެވެ.
ފަތުރުވެރިކަމުގެ ސިނާޢަތުގެ އެންމެ ބޮޑު ގޮންޖެހުމަކީ މަތީ ފަންތީގައި މަސައްކަތްކުރާ ދިވެހިންގެ އަދަދު މަދުކަމެވެ. މިކަމަށް ޙައްލެއް ހޯދުމަށް ސަރުކާރުން ވަނީ މި ދާއިރާއިން ބޭނުންވާ ތަމްރީންތައް ލިބޭނެ މަގު ތަނަވަސްކޮށްދިނުމުގެ މަސައްކަތް ފަށާފައެވެ. އެގޮތުން، ރައީސުލްޖުމްހޫރިއްޔާ ވެވަޑައިގެންނެވި ވަޢުދުފުޅާ އެއްގޮތަށް ލ. މާމެންދޫ ކައިރީގައި އޮންނަ ހުޅިމެންދޫގައި 5 ތަރީގެ ރިސޯޓެއް ތަރައްޤީކޮށް ހޮޓެލް ސްކޫލެއް ޤާއިމްކުރުމަށް ޤައުމީ ޔުނިވަރސިޓީއާއެކު ވަނީ ފަހުމުނާމާއެއްގައި ސޮއިކޮށްފައެވެ. ސަރުކާރުން ކުރައްވަމުން ގެންދަވާ މި މަސައްކަތްތަކުގެ ސަބަބުން ރާއްޖެ އަންނަ ފަތުރުވެރިންގެ އަދަދު އިތުރުވެ، މި ސިނާޢަތުގައި އިންވެސްޓްކުރަން ބޭނުންވާ ފަރާތްތަކުގެ އަދަދުވެސް ދަނީ އިތުރުވަމުންނެވެ. އެހެންކަމުން ކުރިއަށް އޮތްތަނުގައި ރާއްޖޭގެ ފަތުރުވެރިކަމުގެ ސިނާޢަތުގެ މުސްތަޤްބަލު ވަރަށް އުޖާލާ ކަމަށް ފެނެއެވެ.
Happy
0 %
Sad
0 %
Excited
0 %
Sleepy
0 %
Angry
100 %
Surprise
0 %
0
0