ޑްރޯނުން އަތުލައިގަތް ލަންކާގެ ބޯޓުގައި 300 ކިލޯ ޑްރަގް!

Read Time:3 Minute, 54 Second

(ފޮޓޯ ކްރެޑިޓްސް: އެމްއެންޑީއެފް)

ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ އުޅެނިކޮށް، ދިވެހި އަސްކަރިއްޔާގެ ޑްރޯންގެ އެހީގައި އިއްޔެ އަތުލައިގަތް ސްރީލަންކާގެ ބޯޓުގައި 300 ކިލޯއާ ގާތް ކުރާ އަދަދަކަށް މަސްތުވާތަކެތި ހުރި ކަމަށް ލަންކާގެ ނޫހަކުން ރިޕޯޓުކޮށްފިއެވެ.

ފުލުހުން ވެސް މިހާރު ވަނީ އެ ބޯޓުން މަސްތުވާތަކެތި އަތުލައިގަތް ކަން ކަށަވަރުކޮށްދީފައެވެ. އެކަމަކު، އަތުލައިގަތް އަދަދެއް ހާމައެއް ނުކުރެއެވެ. ލަންކާގެ ނޫހެއްގައި ރިޕޯޓުކޮށްފައިވާ ގޮތުގައި ލަންކާގެ ހަ މަސްވެރިން ތިބި އެ ބޯޓުން އަތުލައިގަތީ ގާތްގަނޑަކަށް 300 ކިލޯގެ ހެރޮއިން އާއި އައިސް (ކްރިސްޓަލް މެތު) އެވެ. އެކަމަކު، މި ބޯޓަކީ ރާއްޖެ އައި ބޯޓެއް ކަމެއް ނޫނީ އެހެން ގައުމަކަށް ދިޔަ ބޯޓެއް ކަމެއް އެ ނޫހުން ސާފުކޮށް ދީފައެއް ނުވެއެވެ. މި ބޯޓު އެމްއެންޑީއެފުން އަތުލައިގަތީ ލަންކާގެ ކޯސްޓްގާޑުން ފޯރުކޮށްދިން އިންޓަލިޖެންސް މައުލޫމާތަކާ ގުޅިގެން ކަމަށް ނޫހުގައިވެއެވެ.

ލަންކާގެ ސަލާމަތީ ބާރުތަކަށް މިހާތަނަށް ލިބިފައިވާ މައުލޫމާތަށް ބަލާއިރު، ބޯޓުގައި ހުރި މަސްތުވާތަކެއްޗަކީ މަސްތުވާތަކެތީގެ ވިޔަފާރިކުރާ ނެޓްވޯކެއް ކަމަށްވާ “ދެހިބަލޭ މައްލީ” އާ ގުޅުން ހުރި ތަކެތި ކަމަށް ވެސް އެ ނޫހުގައި ބުނެފައިވެއެވެ. ޑްރޯންގެ އެހީގައި ރާއްޖޭގެ ކަނޑުގެ ސަރަހައްދުން ބޭރުގެ ބޯޓެއް ހޯދައި، ސިފައިންގެ ބާރުގެ ދަށަށް ގެނައީ ހުކުރު ދުވަހުގެ ވަގުތެއްގައެވެ. އެމްއެންޑީއެފުން ވިދާޅުވީ އެމްއެންޑީއެފް އެއާ ކޯއިން ޑްރޯން ބޭނުންކޮށްގެން ހިންގި ސަވެއިލަންސެއްގައި ބޭރުގެ ބޯޓެއް ގާނޫނާ ހިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތެރިވާކަން ފާހަގަކުރެވިގެން ކޯސްޓްގާޑު ސްޕެޝަލް ބޯޓް ސްކޮޑްރަނުން އެ ބޯޓާ އިންޓަސެޕްޓްކޮށް އެމްއެންޑީއެފްގެ ބާރުގެ ދަށަށް ގެނެސްފައިވާ ކަމަށެވެ.

އޭގެކުރިން ރާއްޖޭގެ ހާއްސަ އިގުތިސާދީ ސަރަހައްދުގައި ގާނޫނާ ޚިލާފަށް ހަރަކާތްތެރިވަމުންދިޔަ ސްރީލަންކާގެ ދެ މަސްބޯޓެއް ވެސް ވަނީ އަތުލައިގެންފައެވެ. މި ދެ މަސްބޯޓު ވެސް އަތުލައިގަތީ އެމްއެންޑީއެފްގެ ޑްރޯން ބޭނުންކޮށްގެންނެވެ.