ހައްގުތައް ކަށަވަރު ކޮށްދޭނީ އިސްލާމްދީނާ ހިލާފު ނުވާ ގޮތަށް: އޭޖީ

Read Time:3 Minute, 30 Second

(ފޮޓޯ ކްރެޑިޓްސް: ބަންޑާރަ ނައިބު އޮފީސް)

ބަންޑާރަ ނައިބު އަހުމަދު އުޝާމް ވިދާޅުވެފައިވަނީ، ރާއްޖޭގައި އިންސާނީ ހައްގުތައް ކަށަވަރުކޮށްދިނުމުގައި އިސްލާމްދީނާ ހިލާފު ނުވާނެ ކަމަށާއި، ރާއްޖޭގެ ދީނީ އަސާސްތަކަކީ ގައުމުގެ އަގުތަކާއި ގާނޫނުތަކުގެ ބިންގާ ކަމަށެވެ. އދ. ގެ ޔުނިވާސަލް ޕީރިއަޑިކް ރިވިއު (ޔޫޕީއާރު) ގެ ސެޝަންގައި ވާހަކަފުޅު ދައްކަވަމުން އޭނާ ފާހަގަކުރެއްވީ، ވިސްނުމާއި ހިޔާލުފާޅުކުރުމުގެ މިނިވަންކަން ދިނުމުގައި ވެސް އިސްލާމީ އުސޫލުތަކާ ހިލާފުނުވާނެ ކަމަށާއި، މަދަނީ މިނިވަންކަން ބޭނުންކުރަންވާނީ ގައުމުގެ ހަމަޖެހުމަށް ބުރޫނާރާނެ އަދި ނަފުރަތު ނުފެތުރޭ ގޮތަށް ކަމަށެވެ.

Attorney General Uz. Ahmed Usham at the 50th Session of Universal Periodic Review #UPR pic.twitter.com/VjXlU9gKPH

— AG Office Maldives (@AGOmv) November 5, 2025

މި ރިވިއު ސެޝަންގައި، އިންސާނީ ހައްގުތައް ރައްކާތެރިކުރުމުގައި ރާއްޖެއިން ހާސިލްކޮށްފައިވާ ކާމިޔާބީތަކާއި، ގާނޫނު ތަންފީޒުކުރުން ހަރުދަނާކުރުމަށް ކުރެވިފައިވާ މަސައްކަތްތައް ހިމެނޭ ގޮތަށް، މަދަނީ، ސިޔާސީ، އިގްތިސާދީ، އިޖުތިމާއީ އަދި ސަގާފީ ހައްގުތަކާ ގުޅޭ ސިޔާސަތުތައް ޔޫޕީއާރު ވޯކިން ގްރޫޕާ ހިއްސާކޮށްފައިވެއެވެ. އަދި ހާއްސަ އަޅާލުން ބޭނުންވާ މީހުންނާއި އަންހެނުންނާއި ކުޑަކުދިންގެ ހައްގުތައް ރައްކާތެރިކުރުމަށް ކުރެވޭ މަސައްކަތްތަކާއި، ގާނޫނުގެ ވެރިކަން ދެމެހެއްޓުމަށް އަދުލު އިންސާފުގެ ނިޒާމު ހަރުދަނާކުރުމަށް ކުރެވޭ މަސައްކަތްތަކުގެ މައުލޫމާތު ވެސް ދީފައިވެއެވެ. މޫސުމީ ބަދަލުތަކާ ގުޅޭގޮތުން ރާއްޖެއިން ކުރާ މަސައްކަތްތަކަށް ބައިނަލްއަގުވާމީ މުޖުތަމައުން ތައުރީފުކޮށް، ރާއްޖެއިން ހޯދާ ތަރައްގީ ބަލައިގެންފައިވާ ކަމަށް ވެސް ފާހަގަކުރެވިފައިވެއެވެ.

ޔޫޕީއާރަކީ އދ. ގެ މެންބަރު ގައުމުތަކުގައި އިންސާނީ ހައްގުތައް ރައްކާތެރިކުރާ މިންވަރު ކޮންމެ ހަތަރު އަހަރަކުން އެއްފަހަރު ވަޒަންކުރާ އުސޫލެކެވެ. ރާއްޖޭގެ ދެން އޮންނާނީ 2030 ގައެވެ.