އަލޮންސޯ ހީކުރަނީ އޭނާ އަކީ ގާޑިއޯލާ ކަމަށްތަ؟

Read Time:5 Minute, 23 Second

ރެއާލް މެޑްރިޑް ވަނީ މި ސީޒަނުގައި ރަނގަޅު ކުޅުމެއް ދައްކަމުންނެވެ. މިހާތަނަށް ކުޅުނު 15 މެޗުގެ ތެރެއިން 13 މެޗުން ވަނީ މޮޅުވެފަ އެވެ. ނަމަވެސް ޗެމްޕިއަންސް ލީގުގައި ލިވަޕޫލް އަތުން ބަލިވުމާއެކު ކުޅުންތެރިންގެ ތެރޭގައި ކޯޗު ޒަބީ އަލޮންސޯއާ މެދު ވަރަށް ބޮޑު ހިތްހަމަނުޖެހުމެއް އުފެދިފައިވާ ކަމަށް ސްޕޭނުގެ މީޑިއާތަކުން ބުނަން ފަށައިފި އެވެ. ބައެއް މީޑިއާތަކުން ބުނަނީ ލިވަޕޫލް އަތުން ބަލިވި މެޗަށް ފަހު ބައެއް ކުޅުންތެރިން “އޭނާ ހީކުރަނީ އޭނަ އަކީ (ދުނިޔޭގެ އެންމެ މޮޅު އެއް ކޯޗު ޕެޕް) ގާޑިއޯލާ ކަމަށް،” ބުނެފައިވާ ކަމަށެވެ.

ކުރިން ހީކުރެވިފައި އޮތީ އަލޮންސޯއާ މައްސަލަ އުޅެނީ ފޯވަޑް ވިނީޝިއުސް ޖޫނިއާގެ އެކަނި ކަމަށެވެ. ނަމަވެސް ގިނަ މީޑިއާތަކުން ބުނަނީ ޓީމުގެ ތެރޭގައި އަލޮންސޯގެ މަގުބޫލުކަން ކުޑަ ކަމަށެވެ.

އެންމެ ބޮޑު ސަބަބަކީ އޭނާ އަށް ކުޅުންތެރިން މެނޭޖްކުރަން ނޭނގުން ކަމަށެވެ. ހާއްސަކޮށް ރެއާލް މެޑްރިޑަކީ ގިނަ ތަރިންތަކެއް ތިބި ކުލަބަކަށްވާއިރު ވަކިވަކި ކުޅުންތެރިން ރުއްސައިގެން ގެންގުޅެން އަލޮންސޯ އަށް ނޭނގޭ ކަމަށެވެ. އަދި ގިނަ ކުޅުންތެރިން މިހާރު ވެސް ތިބީ ކުރީގެ ކޯޗު ކާލޯ އަންޗެލޯޓީގެ ޕްލޭނުގެ ތެރޭގައި ކަމަށާއި އަލޮންސޯގެ ރޭވުންތެރިކަމަށް ހޭނެން ކުޅުންތެރިން އުނދަގޫވެފައިވާ ކަމަށެވެ.

ކުޅުންތެރިން ވަނީ ލިވަޕޫލް މެޗުގެ ފަހު ނުވަ މިނިޓް ކުޅެން ކަނާތު ބެކް ޓްރެންޓް އެލެގްޒެންޑާ އާނޮލްޑް އެރުމުވުމުން ވެސް ހިތްހަމަ ނުޖެހުން ފާޅުކޮށްފަ އެެވެ. ރެއާލްގެ ގިނަ ކުޅުންތެރިންގެ ނަޒަރުގައި އާނޮލްޑް އޭނާގެ ކުރީގެ ޓީމާ ދެކޮޅަށް ކުޅުނު ފުރަތަމަ މެޗުގައި ސަޕޯޓަރުން އިންތިހާ އަށް އޭނާއަށް މަލާމާތް ކުރަމުންދަނިކޮށް ކުޅެން އެރުވުމަކީ ގޯހެކެވެ. ހާއްސަކޮށް އަނިޔާގައި ދޮޅު މަސް ހޭދަކޮށްފައި ޓީމާ ގުޅުނު ކުޅުންތެރިއަކު ލިވަޕޫލް ފަދަ ވަރުގަދަ ޓީމަކާ ދެެކޮޅަށް އެފަދަ ވާދަވެރި މެޗެއްގައި ކުޅެން އަރުވަންވާނީ އޭނާގެ ބޭނުން ހިފޭނެ ގޮތަކަށް އަދި ކުޅުންތެރިޔާ އަށް ވެސް ދަނޑުމަތީގައި އެކަށީގެންވާ ކަމެއް ކުރުމުގެ ވަގުތު ލިބޭނެ ގޮތަކަށް ކަަމަށް ރެއާލްގެ ގިނަ ކުޅުންތެރިން ދެކޭ ކަމަށް މީޑިޔާތަކުން ބުނެ އެވެ.

ރެއާލް އެންމެ ކާމިޔާބު އެއް ކޯޗަކީ ތަޖުރިބާކާރު ކޯޗު އަންޗެލޯޓީ އެވެ. އޭނާ ކޯޗުކަމުން ވަކިވީ ހުސްވި ސީޒަނުގައި ތައްޓެއް ނުލިބި ނިންމާލަން ޖެހުމުންނެވެ. ނަމަވެސް އޭގެ ފަހުން ބްރެޒިލްގެ ގައުމީ ޓީމާ ހަވާލުވި ކޯޗުގެ މަގުބޫލުކަން ކުޅުންތެރިންގެ ތެރޭގައި ބޮޑު ކަމަށް ވެސް ސްޕޭނުގެ މީޑިއާތަކުން ބުނެ އެވެ. އޭގެ ސަބަބަކީ އަންޗެލޯޓީ އާއި ވަކިވަކި ކުޅުންތެރިންގެ ގުޅުން ބޮޑުވުމާއި އޭނާ އަށް ކުޅުންތެރިން ރުއްސައިގެން ގެންގުޅެން މާމޮޅަށް އެނގޭތީ ކަމަށެވެ.

ނަމަވެސް މިކަމާ ބެހޭ ގޮތުން ރަސްމީކޮށް އަދި އެއްވެސް ފަރާތަކުން ބަހެއް ނުބުނެ އެވެ. އެކަމަކު ވިނީޝިއުސް އާއި އަލޮންސޯ ވަނީ މީގެ ކުރިން ވެސް ދަނޑުމަތީގައި އެކަކު އަނެކަކަށް ހިތްހަމަ ނުޖެހުން ފާޅުކޮށްފަ އެވެ.