“ސްޕޯޓްސް ކޮމްޕްލެކްސް މަޝްރޫއުގެ ތެރެއިން ފުވައްމުލައްސިޓީއަށް ބޮޑު ކުރިއެރުމެއް އަންނާނެ”

Read Time:4 Minute, 6 Second

(ފޮޓޯ ކްރެޑިޓްސް: ރައީސް އޮފީސް)

ފުވައްމުލައް ސިޓީގައި ގާއިމުކުރާ ޒަމާނީ ސްޕޯޓްސް ކޮމްޕްލެކްސް މަޝްރޫއުގެ ތެރެއިން އެ ސިޓީއަށް ބޮޑު ކުރިއެރުމެއް އަންނާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ފުވައްމުލައްސިޓީއަށް ކުރެއްވި ދަތުރުފުޅުގައި އެރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ. ރައީސް ވިދާޅުވީ ޒުވާނުންނަށް ބޭނުންވާ އެކި ކަހަލަ ފުރުސަތުތައް ހޯދައިދިނުމަށްޓަކައި، ތަރޑް ސްޕޭސް ކޮންސެޕްޓްގެ ދަށުން ރާއްޖޭގައި ހިންގާ ދެވަނަ މަޝްރޫޢު ކުރިޔަށް ގެންދާނީ ފުވައްމުލައްސިޓީގައި ކަމަށެވެ. އޭގެ ފުރަތަމަ މަޝްރޫއު އެދަނީ މާލޭގައި ނިމެމުންކަން ފާހަގަ ކުރައްވައި ރައީސް ވިދާޅުވީ އަދި އިތުރު ރަށްރަށުގައި ކުރިޔަށް އޮތްތަނުގައި މިފަދަ މަޝްރޫއުތައް ހިންގަވާނެކަމަށެވެ.

“އެހެންވީމާ މީގެ ތެރެއިން ޒުވާނުންނަށް ވަގުތުތައް ހޭދަކުރުމަށް، ބިނާކުރަނިވި ކަންކަމުގައި ވަގުތު ހޭދަކުރުމުގެ ހުރިހާ ފެސިލިޓީއެއް ހަމަޖެހިގެންދާ ޒަމާނީ ބިނާއެއް މީގެ ތެރެއިން ކުރެވިގެންދާނެ” ކަމަށް ރައީސް ވިދާޅުވިއެވެ. ރައީސް ވިދާޅުވީ އިއްޔެ ސޮއި ކުރި ސްޕޯޓްސް ކޮމްޕްލެކްސް މަޝްރޫއަކީ ކުޅިވަރުގެ ދާއިރާއިން ފުވައްމުލައް ސިޓީއަށް ވަރަށް މުހިންމު މަޝްރޫއެއް ކަމަށެވެ. އެ ތަނަކީ އިންޑޯ ހުރިހާ ކުޅިވަރެއް ކުޅެވޭ ގޮތަށް 1200 މީހުންގެ ޖާގައިގެ ފުރިހަމަ ޒަމާނީ ސްޕޯޓްސް ކޮމްޕްލެކްސްއެއް ކަމަށް ރައީސުލްޖުމްހޫރިޔާ ވިދާޅުވިއެވެ.

ރައީސުލްޖުމްހޫރިއްޔާގެ މި ދަތުރުފުޅުގެ ތެރެއިން ފައްޓަވައިދެއްވި ކުޅިވަރު މަޝްރޫއުއުތަކުގެ ތެރެއިން ސްޕޯޓްސް ކޮމްޕްލެކްސްގެ މަސައްކަތް ހަވާލުކޮށްވާފައިވަނީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއެވެ. އަދި ފުވައްމުލައް ސިޓީގައި ސްކޭޓް ޕާކެއް ތަރައްޤީކުރުމުގެ މަޝްރޫއު ހަވާލުކުރެއްވީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއިއެވެ. މީގެ އިތުރުން ޔޫތު ތަރޑް ސްޕޭސް ތަރައްޤީކުރުމަށް ވަނީ އެއްބަސްވުމެއްގައި ސޮއިކޮށްފައެވެ. މީގެ އިތުރުން ރައީސުލްޖުމްހޫރިއްޔާ ވަނީ މާދަނޑު އަވަށުގެ ފުޓްސަލް ދަނޑު ވެސް ހުޅުއްވައިދެއްވާފައެވެ.