Read Time:3 Minute, 54 Second
(ފޮޓޯ ކްރެޑިޓްސް: ރަައްޔިތުންގެ މަޖިލިސް)
ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި މާލެ ސަރަހައްދުން ހިލޭ ދިން ގޯތިތަކަކީ ވަރަށް ބޮޑު ބޭއިންސާފެއް ކަމަށާއި، އެ ގޯތިތައް ދައުލަތަށް އަނބުރާ ނަގަން ޖެހޭ ކަމަށް ވެރިކަންކުރާ ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު މިއަދު ރައްޔިތުންގެ މަޖިލީހުގައި ވިދާޅުވެއްޖެ އެވެ. ފަލާހު މި ވާހަކަ ދެއްކެވީ ދިވެހި ރައްޔިތެއްގެ ހައިސިއްޔަތުން ކަމަށް ވިދާޅުވެ އެވެ.
އޭނާ ވިދާޅުވީ، ހިލޭ ދީފައި ހުރި ބިންތައް، އެ ބިންތަކުގައި ފާރެއް ރާނާފައި ހުރި ނަމަ ފާރުގެ ބަދަލު ދީފައި އަދި ގޯއްޗެއް ރާނާފައި ހުރި ނަމަ ގޯތީގެ ބަދަލު ދީފައި، ހުރިހާ ގޯއްޗެއް ދައުލަތަށް ނެގުމަށް ދިވެހި ރައްޔިތުންގެ 99 ޕަސެންޓް މީހުން ތާއީދު ކުރާނެ ކަމަށެވެ. އެއީ އެކަކަށް ފައިސާ ދައްކާ ގޮތަށް ފްލެޓް ދެމުން އަނެއް ބަޔަކަށް 1200 އަކަފޫޓުގެ ބިމެއް ހިލޭ ދިނުމަކީ ބޭއިންސާފެއް ކަމަށް އޭނާ ސިފަކުރެއްވި އެވެ. ފަލާހު އިތުރަށް ވިދާޅުވީ، ބިޑް އުސޫލުން އެ ގޯތިތައް ވިއްކާ ނަމަ ކޮންމެ ގޯއްޗަކަށް 12 މިލިޔަން ރުފިޔާ ލިބޭނެ ކަމަށާއި، އެ ގޯތިތައް ދައުލަތަށް އަނބުރާ ނެގުމުން ގާތްގަނޑަކަށް 10 ބިލިޔަން ރުފިޔާ ސަލާމަތް ކުރެވޭނެ ކަމަށެވެ.
ކުރީގެ ސަރުކާރުން މާލެ ސަރަހައްދުން ހިލޭ ގޯތި ދޭން ނިންމުމުން އޭރުގެ މަޖިލީހުގެ މެޖޯރިޓީ ޕާޓީ އެމްޑީޕީގެ ބައެއް މެންބަރުން ވެސް ނުރުހުން ފާޅުކުރެއްވި އެވެ. އޭރު އެމްޑީޕީގެ މެންބަރެއްގެ ގޮތުގައި ހުންނެވި ފޮނަދޫ ދާއިރާގެ މޫސާ ސިރާޖު މި މައްސަލަ މަޖިލީހަށް ހުށަހެޅުއްވި އެވެ. ސިރާޖު އޭރު ވިދާޅުވެފައިވަނީ ހުޅުމާލެ ހިޔާ ފްލެޓްތަކުގެ ބައެއް ކެޓަގަރީތަކަށް ފައިސާ ދައްކާ ގޮތަށް ފްލެޓް ދީފައިވާއިރު، އަދި އެޗްޑީސީން ބިން ވިއްކާއިރު އަކަފޫޓެއް 7000ރ. އަށް ވުރެ މަތީގައި ހުންނަ އިރު، ދައުލަތުގެ ދަރަނި 100 ބިލިޔަން ރުފިޔާއަށް އަރާފައިވާ ހާލަތެއްގައި 5،000 އާއިލާއަށް 48 ބިލިޔަން ރުފިޔާގެ އަގު ހުރި ބިން ހިލޭ ދިނުމަކީ ބޮޑު ބޭއިންސާފެއް ކަމަށެވެ. އަދި އެ ގޯތިތައް ބީލަމަށް ލައިގެން ވިއްކައިފިނަމަ ދައުލަތަށް ލިބޭނެ އާމްދަނީ ބެލުމަށް ވެސް އޭނާ ގޮވާލެއްވި އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0