ބާސެލޯނާ ބަލިކޮށް ރެއާލް އަށް މުހިންމު ތިން ޕޮއިންޓް

Read Time:5 Minute, 4 Second

ސްޕެނިޝް ލަލީގާގައި ރޭ ރެއާލް މެޑްރިޑް އާއި ދެކޮޅަށް ބާސެލޯނާ ކުޅުނު މެޗު 2-1 ގެ ނަތީޖާއަކުން ރެއާލް މެޑްރިޑް މޮޅުވެ ތާވަލުގެ ކުރީގައި ހަމަޖެހިލައިފިއެވެ. މި މެޗުން ރެއާލް މެޑްރިޑް މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 10 މެޗުން ލިބިފައިވާ 27 ޕޮއިންޓާއެކު އެއްވަނަ މަގާމް ލިބިފަ އެވެ. ދެވަނައިގައި އޮތް ބާސެލޯނާ އަށް 10 މެޗުން ލިބިފައިވަނީ 22 ޕޮއިންޓެވެ. ރެއާލް މެޑްރިޑްގެ ސެންޓިއާގޯ ބަރނަބައު ސްޓޭޑިއަމްގައި 78 ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގައި ރެއާލް މެޑްރިޑް އިން ވަނީ މޮޅު ކުޅުމެއް ދައްކާ ގިނަ ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ 12 ވަނަ މިނިޓުގައި ކިލިއަން އެމްބާޕޭ ލަނޑެއް ޖެހި ނަމަވެސް ވީޑިއޯ އެސިސްޓެންޓް ރެފްރީ އިން ނިންމާފައިވަނީ އެއީ އޮފްސައިޑް ލަނޑެއް ކަމަށެވެ.

ނަމަވެސް އޭގެ 10 މިނިޓު ފަހުން ޖޫޑް ބެލިންހަމްގެ ޕާހަކުން އެމްބާޕޭ ވަނީ ލަނޑެއް ޖަހާ ރެއާލް މެޑްރިޑަށް ކުރި ހޯދަދީފައެވެ. މި މެޗަށް ބާސެލޯނާ ނިކުތްއިރު އެ ޓީމުގެ ކޯޗު ހެންސީ ފްލިކް ސަސްޕެންޑް ކޮށްފައިވާތީ އޭނާ އަށް ޓީމަށް އިރުޝާދު ދިނުމަށް ބެންޗުގައި ހުރެވޭ ގޮތް ވަނީ ނުވެފައެވެ. އަދި އަނިޔާގެ ސަބަބުން ރަފީނިއާ އާއި ރޮބަޓް ލެވަންޑޯސްކީގެ އިތުރުން ޑެނީ އޮލްމޯ މި މެޗުގައި ކުޅެފައެއް ނުވެއެވެ. މެޗުގެ ފުރަތަމަ ހާފުގެ ކުޅުން ނިމުމުގެ ކުރިން ބާސެލޯނާ އިން ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ މާކަސް ރަޝްފޯޑް ދިން ޕާހަކުން ފަރމިން ލޮޕޭޒްއެވެ.

ނަމަވެސް ފުރަތަމަ ހާފުގެ ކުޅުން ނިމެން ދެ މިނިޓަށް ވެފައިވަނިކޮށް ޖޫޑް ބެލިންހަމް ވަނީ ލަނޑެއް ޖަހާ ރެއާލް މެޑްރިޑަށް ދެވަނަ ފަހަރަށް ލީޑު ނަގައިދީފައެވެ. މެޗުގެ ދެވަނަ ހާފުގެ ކުޅުން ފެށުނުތާ ހަތްވަނަ މިނިޓުގައި ރެއާލް މެޑްރިޑަށް ވަނީ އިތުރު ލަނޑެއް ޖަހަން ރަގަޅު ފުރުސަތެއް ލިބިފައެވެ. އެގޮތުން ޕެނަލްޓީ އޭރިޔާ ތެރެއިން ބާސެލޯނާގެ ކުޅުންތެރިއެއްގެ އަތުގައި ބޯޅަ ޖެހުމާއި ގުޅިގެން ރެފްރީ ޕެނަލްޓީ އެއް ދިން ނަމަވެސް ކިލިއަން އެމްބާޕޭ ފޮނުވާލި ޕެނަލްޓީ ބާސެލޯނާގެ ކީޕަރު ވޮޒްޝިއޭ ޝެޒްނީ ވަނީ މަތަކޮށްފައެވެ.

މި މެޗުގެ 72 ވަނަ މިނިޓުގައި ރެއާލް މެޑްރިޑްގެ ވިނިޝިއަސް ޖޫނިއަރ ބަދަލު ކުރުމާއިއެކު އޭނާ ވަނީ އެ ނިންމުމާއިމެދު ވަރަށް ބޮޑަށް ހިތްހަމަ ނުޖެހުން ފާޅުކޮށްފައެވެ. އަދި މެޗަށްފަހުވެސް އޭނާގެ ރުޅިގަނޑު މަތަ ނުކުރެވިގެން އުޅުނު މަންޒަރުވަނީ ފެނިފައެވެ. މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ކުޅުމުގައި ބާސެލޯނާގެ ޕެޑްރީ އަށް ދެވަނަ ރީނދޫ ކާޑަކާއިއެކު ރަތް ކާޑެއް ދައްކާފައިވާއިރު ރެއާލް މެޑްރިޑްގެ ލުނިން އަށް ވެސް އޭގެ މިނިޓެއް ފަހުން ރެފްރީ ވަނީ ރަތް ކާޑު ދައްކާފައެވެ.