Read Time:3 Minute, 23 Second
(ފޮޓޯ ކްރެޑިޓްސް: މިހާރު)
އައްޑޫގެ ހުޅުދޫ އާއި މީދޫން އިއްޔެ ނެގި ފެންނަ ނުފެންނަ ވޯޓުގައި ނިންމާފައިވަނީ އައްޑޫ ސިޓީ ކައުންސިލްގެ ދަށުން ވަކިވެ، ވަކި ކައުންސިލެއް އުފެއްދުމަށެވެ. މިއީ “އައްޑޫ ސިޓީ ކައުންސިލްގެ އަޅުވެތިކަމުން” ސަލާމަތްވެ ލިބުނު ފުރިހަމަ ކާމިޔާބީއެއް ކަމަށް އެ ދެ ދާއިރާގެ މަޖިލިސް މެމްބަރުން ވިދާޅުވެއްޖެއެވެ. ފޭދޫން ނިންމާފައިވަނީ ސިޓީ ކައުންސިލްގައި ދެމިތިބުމަށެވެ. މީދޫ ދާއިރާގެ މެމްބަރު އަބްދުއްރަހްމާން ވިދާޅުވީ މި ނިންމުމަކީ ކަނޑާއި ފަޅު ފަދަ ތަންތަން ބޭނުންކުރުމުގެ ފުރުސަތު މީދޫއަށް ފަހިކޮށްދީ، ރަށުގެ ތަރައްގީއަށް ރަނގަޅު ކަންކަން ކުރެވޭނެ މިނިވަންކަން ލިބުނު ކަމެއް ކަމަށެވެ. ސަރުކާރުން ދޭ ގްރާންޓުން ބޮޑު އެއްޗެއް ބާކީވެ، ތަރައްގީގެ މަސައްކަތްތައް ކުރެވޭނެ ކަމަށް އޭނާ ފާހަގަކުރެއްވިއެވެ. ކައުންސިލުން އެއްބާރުލުން ނުލިބުމުގެ ސަބަބުން ރަށުގައި ޕްރޮޖެކްޓްތަކާއި ޓޫރިޒަމް ހިންގުމަށް ހުރަސްތައް ހުރި ކަމަށާއި، މި ބަދަލާއެކު ރަނގަޅު ތައުލީމާއި އާމްދަނީގެ ފުރުސަތުތައް އިތުރުވެ، ރަށް ދޫކޮށް ދިޔަ މީހުން އަނބުރާ ރަށަށް އައުމުގެ އުއްމީދު އެބައޮތް ކަމަށްވެސް އޭނާ ވިދާޅުވިއެވެ.
ހުޅުދޫ ދާއިރާގެ މެމްބަރު މުހައްމަދު ޝާހިދު ވިދާޅުވީ ލާމަރުކަޒީ ގާނޫނު އައިފަހުން، ހުޅުދޫ އައްޑޫގެ އެހެން ރަށްރަށާ ދުރުގައި އޮންނާތީ، ހިދުމަތްތައް ހޯދުމުގައި ބާކީވެ، ރައްޔިތުން ވަކިވުމަށް ވަކާލާތުކުރަމުން އައި ކަމަށެވެ. ކުރީގެ ސަރުކާރުތަކަށް މިކަން ނުކުރެވުނު ނަމަވެސް، ރައްޔިތުން އެދިގެން މިހާރު ގާނޫނަށް އިސްލާހު ގެނެސްގެން މި ފުރުސަތު ދިނީތީ އޭނާ އުފާކުރެއްވިއެވެ. ރަށަށް ބާރުތައް ލިބުމަކީ ބޮޑު ކާމިޔާބީއެއް ކަމަށް އޭނާ ސިފަކުރެއްވިއިރު، ސިޓީ ކައުންސިލްގެ ދަށުން ވަކިވިއަސް ހުޅުދޫއަކީ އަދިވެސް އައްޑޫގެ ބައެއްކަން އޭނާ ފާހަގަކުރެއްވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0