Read Time:5 Minute, 32 Second
(ފޮޓޯ ކްރެޑިޓްސް: މިހާރު)
އޮޑިޓާ ޖެނެރަލްގެ އޮފީހުން ބ. އަތޮޅު ބަޔޮސްފިއާ ރިޒާވްގެ ތެރޭގައި ހިމެނޭ ބަތަލާ ރަށް ރިސޯޓެއްގެ ގޮތުގައި ތަރައްގީކުރުމަށް ދޫކުރުމުގައި އުސޫލާ ހިލާފަށް އަމަލުކޮށްފައިވާ ކަމަށް ބުނެފި އެވެ. ޓޫރިޒަމް މިނިސްޓްރީން ބަތަލާ 20 އަހަރަށް ކުއްޔަށް ދޭން އެއްބަސްވުން ހެދީ ރައީސުލްޖުމްހޫރިއްޔާ އެރަށަކީ ޓޫރިޒަމް ބޭނުމަށް ދޫކުރާ ރަށެއް ކަމަށް ކަނޑައެޅުމުގެ ކުރިން ކަމަށް ތިމާވެށީގެ އޮޑިޓް ރިޕޯޓުގައި ވެއެވެ. އެރަށް ކުއްޔަށް ދީފައިވަނީ އަކަމީޓަރަކަށް ހަތަރު ޑޮލަރުގެ ރޭޓުންނެވެ. އެކަމަކު ރަށުގެ ސައިޒް މީރާއަށް އަންގާފައިނުވާތީ އެއްބަސްވުން އުވާލިއިރުވެސް ކުލި ހިސާބު ނުކުރެވުނު ކަމަށް އޮޑިޓް އޮފީހުން ބުންޏެވެ. ބަތަލާ ހިމެނޭ ސަރަހައްދު ޖޫން 2011 ގައި ރައްކާތެރި ސަރަހައްދެއްގެ ގޮތުގައި ކަނޑައެޅިއިރުވެސް އެރަށަކީ ފިޝަރީޒް މިނިސްޓްރީގެ ދަށުން ވަރުވާއަށް ދޫކޮށްފައި އޮތް ރަށެކެވެ. ފިޝަރީޒް މިނިސްޓްރީން ކުއްޔަށް ދިން ފަރާތަށް އެއްބަސްވުން އުވާލިކަން އަންގާފައިވަނީ ގާތްގަނޑަކަށް ތިން އަހަރު ފަހުންނެވެ.
ރަށް ރައްކާތެރި ސަރަހައްދަކަށް ކަނޑައެޅުމަށްފަހު ތިން އަހަރާއި ދެ މަސް ވަންދެންވެސް އެހެން ފަރާތަކުން ކުލި ދައްކާ ބޭނުންކޮށްފައިވާކަން ރިޕޯޓުގައި ފާހަގަކޮށްފައިވެއެވެ. އެ މުއްދަތުގެ ތެރޭގައި ރަށް ބޭނުންކޮށްފައިވަނީ ތިމާވެއްޓާ ރައްޓެހި ގޮތަކަށްކަން ކަށަވަރު ނުކުރެވޭ ކަމަށް އޮޑިޓް އޮފީހުން ބުންޏެވެ. މީގެ އިތުރުން އެންވަޔަމެންޓް މިނިސްޓްރީން ރަށް ރައްކާތެރި ސަރަހައްދަކަށް ކަނޑައެޅިއިރު، އެރަށަކީ ކުއްޔަށްދީފައިވާ ރަށެއްކަން ބަލާފައިނުވާކަން ރިޕޯޓުގައި ފާހަގަކޮށް، މިފަދަ ނިންމުންތަކުގެ މައުލޫމާތު ފަސޭހައިން ކަށަވަރުކޮށް، އަޕްޑޭޓްތައް ބެލޭނެ ނިޒާމެއް ނެތްކަން އަންގާފައިވެއެވެ.
ޓޫރިޒަމް މިނިސްޓްރީން ބަތަލާ ރިސޯޓު ހެދުމަށް އެއްބަސްވުން ހެދީ އޮކްޓޫބަރު 2013 ގައެވެ. އެކަމަކު މީރާއަށް އެ މައުލޫމާތު ލިބުނީ ޖުލައި 2016 ގައެވެ. އަދި އޭގެ އެއް މަސް ފަހުން އެ އެއްބަސްވުން އުވާލެވުނެވެ. އެރަށް ފަހުން އެއްކޮށް ގިރައިގެން ގޮސްފައިވެއެވެ. މީރާއަށް މައުލޫމާތު ލިބުމާއެކު ކުލި ހޯދުމަށް މަސައްކަތްކޮށް، ކުންފުނިން ދިން މައުލޫމާތުގެ މައްޗަށް ބިނާކޮށް ކުލި ދައްކާފައިވެއެވެ. ނަމަވެސް ޓޫރިޒަމް މިނިސްޓްރީން ރަށުގެ ބިން މިނެޓް މައުލޫމާތު ހުށަހަޅާފައިނުވާތީ، ދެއްކި ކުލީގެ ސައްހަކަން އޮޑިޓް އޮފީހަށް ކަށަވަރެއް ނުކުރެވުނެވެ.
ރަށް ކުއްޔަށް ދިން މުއްދަތުގައި އެރަށަކީ ހިމާޔަތްކޮށްފައިވާ ސަރަހައްދަކަށްވާތީ، އެރަށުގައި ކުރުން މަނާ ކަންތައްތަކެއް ކަނޑައަޅާފައިވީ ނަމަވެސް ގޮނޑުދޮށް ހިމާޔަތް ކުރުމުގެ މަޝްރޫއުއެއް ހިންގާފައިވާކަން ބަޔޮސްފިއާ ރިޒާވް އޮފީހުން އަންގާފައި އޮތް ނަމަވެސް، ސަރުކާރުން އެކަން ބަލައި ފިޔަވަޅު އަޅާފައި ނުވާ ކަމަށް ރިޕޯޓުގައިވެއެވެ. އެހެންކަމުން، އެ ރަށް ކުއްޔަށް ދިނުމުގައި ޓޫރިޒަމް މިނިސްޓްރީގެ ޒިންމާތައް އެންމެ ފުރިހަމައަށް އަދާކޮށްފައި ނުވާ ކަމަށް އޮޑިޓުގައި ބުނެފައިވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0