Read Time:2 Minute, 54 Second
(ފޮޓޯ ކްރެޑިޓްސް: ދައުރު)
އައްޑޫ ސިޓީ ކައުންސިލް ދަށުގައި ފޭދޫ ދެމިތިބުމަށް އެ ރަށު ރައްޔިތުން ނިންމި ނިންމުމަށް އިހުތިރާމުކުރައްވާ ކަމަށް، މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ. ފޭދޫގައި ވަކި ރަށު ކައުންސިލެއް ހެދުމަށް މިނިސްޓަރު އިހުސާނާއި އޭނާގެ ބައްޕާފުޅު އަދި ފޭދޫ ދެކުނު ދާއިރާގެ މަޖިލިސް މެންބަރު އިބްރާހީމް ދީދީ (އައިބީ) ވަނީ ކެމްޕެއިން ކުރައްވާފަ އެވެ. ނަމަވެސް މިއަދު ނެގުނު ފެންނަ ނުފެންނަ ވޯޓުގައި ފޭދޫގެ ވޯޓުލީ މީހުންގެ ގާތްގަނޑަކަށް %75 ވޯޓު ދިނީ ވަކި ރަށު ކައުންސިލެއް ހެދުމަށް ނުފެންނަ ކަމަށެވެ.
ވޯޓުގެ ނަތީޖާއާ ގުޅިގެން އިހުސާން ވިދާޅުވީ އޭނާ ކެމްޕެއިން ކުރެއްވީ މިނިސްޓަރެއްގެ ހައިސިއްޔަތުން ނޫން ކަމަށާއި، އެއީ ފޭދޫއަށް އުފަން މީހެއްގެ ހައިސިއްޔަތުން އެ ރަށުގެ ކުރިމަގާ ގުޅޭ ގޮތުން އޭނާ ދެކެވަޑައިގަންނަވާ ގޮތަކަށް ކުރެއްވި ކެމްޕެއިނެއް ކަމަށެވެ. ފޭދޫ ރައްޔިތުން ސިޓީ ކައުންސިލްގައި ތިބުމަށް ނިންމީ، ސިޓީ ކައުންސިލް ދަށުގައި އޮވެގެން ވެސް ކުރިއެރުންތައް ލިބުނު ކަމަށް ގަބޫލުކުރެވޭތީ ކަމަށް އޭނާ ވިދާޅުވި އެވެ. އެ ނިންމުން ރަނގަޅުކަމަށާއި، އެ ނިންމުމަށް ފުރިހަމައަށް އިހުތިރާމު ކުރައްވާ ކަމަށް އިހުސާން ވިދާޅުވި އެވެ. އަދި އޭނާ އުންމީދުކުރައްވަނީ ސިޓީ ކައުންސިލްގެ ދަށުގައި ފޭދޫ އޮވެގެން ކުރިއެރުންތައް ލިބިގެން ދިއުން ކަމަށާއި، މިހާރު ވެސް ރަށް ތަރައްގީވެ ކުރިއެރުންތައް ލިބިގެންދިޔަ ކަމަށް ރައްޔިތުން ގަބޫލުކުރާ ގޮތަށް، ހަމަ އެ ސްޕީޑުގައި ކުރިއަށް ދިއުން އެންމެ ރަނގަޅު ކަމަށް އޭނާ ވިދާޅުވި އެވެ.
Happy
0 %
Sad
0 %
Excited
40 %
Sleepy
0 %
Angry
0 %
Surprise
60 %
0
0