Read Time:3 Minute, 2 Second
ފީފާގެ ރައީސް ޖިއާނީ އިންފަންޓީނޯ، އެފްއޭއެމްގެ ރައީސް އަހުމަދު ތާރިގް (ޓޮމް)ގެ ދައުވަތަކަށް މާދަމާ ރާއްޖެ ވަޑައިގަންނަވާނެއެވެ. އިންފަންޓީނޯގެ ޒައާމަތުގައި ރާއްޖެއަށް ފީފާއިން ގިނަ އެހީތަކާއި ފައިސާ ލިބިފައިވީ ނަމަވެސް، އެ ފައިސާއިން މާބޮޑު ކަމެއް ކުރެވިފައި ނުވާކަން ފާހަގަކުރެވެއެވެ.
ހުޅުމާލޭގައި އަޅަން ފެށި ފުޓްބޯޅަ ސްކޫލާއި، މާފަންނު ކުޅިވަރު އެކުވެނީގައި އަޅަން ފެށި އެފްއޭއެމްގެ ވަގުތީ އޮފީސް އިމާރާތް ހުރީ ނުނިމި، އެތަންތަން ވަނީ އެކި ފަރާތްތަކަށް ކުއްޔަށް ދީފައެވެ. މި މައްސަލަތައް މިހާރު ހުރީ ކޯޓުގައެވެ. މީގެ އިތުރުން، މިފްކޯ ކުރިމަތީގައި ހުރި އެފްއޭއެމްގެ މައި އޮފީސް އިމާރާތް ވެސް ވަނީ ހަލާކުވެ، އެތަނުގައި އަޅަން އުޅުނު 20 ބުރީގެ އިމާރާތުގެ މަސައްކަތް ހުއްޓި، ފައިސާގެ މައްސަލަތައް ވެސް ކުރިމަތިވެފައެވެ. ގަލޮޅު ދަނޑު ވެސް ހުރީ ވީރާނާވެ، އެފްއޭއެމް މިހާރު މަސައްކަތްކުރަނީ ވެސް ވަރަށް ދަތިކޮށެވެ. އިންފަންޓީނޯއަށް ރާއްޖޭގެ ފުޓްބޯޅައިގެ މި ހާލަތު ފެނިވަޑައިގަންނަވާނެއެވެ.
ނަމަވެސް، އެފްއޭއެމްގެ މިހާރުގެ ރައީސް ޓޮމްއަކީ ހުށިޔާރު ބޭފުޅެއް ކަމުންނާއި، އިންފަންޓީނޯއަކީ ވެސް ކުދި ގައުމުތަކަށް އެހީތެރިވެދެއްވުމަށް އަބަދުވެސް ތައްޔާރަށް ހުންނަވާ ބޭފުޅެއް ކަމުން، މި ދަތުރަކީ ދިވެހި ފުޓްބޯޅަ ކުރިއެރުވުމަށް ބޭނުންވާ ފައިސާއާއި ވަސީލަތްތައް ފީފާ މެދުވެރިކޮށް ހޯދުމަށް ލިބޭ ރަނގަޅު ފުރުސަތެކެވެ. ފީފާގެ އެހީގައި ފުޓްބޯޅަ ފުޅާކުރުމަށް ބޭނުންވާ ހުނަރާއި ވަސީލަތްތައް ހޯދައި، އަދި އައު ސްޓޭޑިއަމެއް ބިނާކުރުމަށް ވެސް ފީފާއިން އިންވެސްޓް ކުރުމުގެ ފުރުސަތު ވަރަށް ގާތެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0