Read Time:4 Minute, 38 Second
މާދަމާ ދިވެހި ފަސްގަނޑަށް ވަޑައިގަންނަވާ ދުނިޔޭގެ ފުޓްބޯޅައިގެ ރައީސް ޖިއާނީ އިންފަންޓީނޯއަކީ، ފާއިތުވި 19 އަހަރު ތެރޭގައި ފީފާގެ ރައީސަކު ރާއްޖެ ވަޑައިގަންނަވާ ފުރަތަމަ ފަހަރެވެ. އުމުރުން 55 އަހަރުގެ އިންފަންޓީނޯގެ އަސްލަކީ އިޓަލީ އެވެ. ނަމަވެސް މިހާރު އެއީ ސްވިޒަލޭންޑް މީހެކެވެ. އޭނާގެ ކުޑައިރުގެ ދިރިއުޅުން ދަތިތަކާ ކުރިމަތިލާން ޖެހުނެވެ. އިޓަލީ ނަސްލަށް ވާތީ ބުލީ ކުރުމާއި ސިއްހީ ބޮޑެތި މައްސަލަތައް ހުރެ ލޭއަޅަން ޖެހުމަކީ އޭނާގެ ދިރިއުޅުމުގެ އެއްބައެކެވެ. ބައްޕައަކީ ރޭލު ދުއްވި މީހެކެވެ. މައިންބަފައިން ބިޑިއާއި ސުއްޓާ ވިއްކައިގެން އުޅެމުން ދިޔައިރުވެސް އިންފަންޓީނޯއަކީ ހިތްވަރުގަދަ އަދި ސާބިތުކަމާއެކު މަސައްކަތްކުރެއްވި ބޭފުޅެކެވެ.
ގާނޫނީ ދާއިރާއިން ކިޔަވާ ވިދާޅުވެ، ފުރަތަމަ އޭނާ މަސައްކަތް ކުރެއްވީ އޭނާ ދިރިއުޅުއްވި އަވަށުގެ ފުޓްބޯޅަ ޓީމެއްގެ ހިންގުން ޒަމާނީ ކުރުމަށެވެ. އެއަށްފަހު ޔޫރަޕުގެ ފުޓްބޯޅަ ޖަމިއްޔާ (ޔޫއޭފާ) އަށް ގާނޫނީ މަސައްކަތް ކުރެއްވުމުގެ ފުރުސަތު ލިބުނެވެ. އަދި 2009 ވަނަ އަހަރު ޔޫއޭފާގެ ޖެނެރަލް ސެކްރެޓަރީ ކަމަށް ވަޑައިގެން، ކުދި ގައުމުތަކަށް މާލީ އެހީތެރިކަން ފޯރުކޮށްދިނުމާއި ފައިނޭންޝަލް ފެއާޕްލޭ ގަވާއިދުތައް ތަރައްގީ ކުރެއްވުމުގައި އިސް ދައުރެއް އަދާކުރެއްވިއެވެ. ފީފާގެ ރައީސްކަން 2016 ވަނަ އަހަރު އިންފަންޓީނޯއަށް ލިބިވަޑައިގަތީ އެތައް ބައެއްގެ ތާއިދާއެކުއެވެ. މިޝޭލް ޕްލެޓިނީއާއި ސެޕް ބްލެޓާ ކޮރަޕްޝަން މައްސަލަތަކުގައި މަގާމުން ވަކިވުމުން، އޭނާ ވަނީ ފީފާގެ ނުތާހިރުކަން ދޮވެ ސާފުކޮށްލާނެ ކަމުގެ ވައުދާއެކު ދުނިޔޭގެ އެކި ގައުމުތަކަށް ދަތުރުކުރައްވައި، ޕްލޭންތައް ހުށަހަޅުއްވައިފައެވެ. އޭނާއަކީ ހަތް ބަހުން ވާހަކަ ދައްކަވާ، ހަރުދަނާ އުސޫލުތަކެއް ގެންގުޅުއްވައި، މައްސަލަތަކަށް ހައްލު ހޯއްދެވުމުގައި ހުށިޔާރު ބޭފުޅެކެވެ. އޭނާގެ މި ސާބިތުކަމާއި ގާތް ގުޅުންތަކުގެ ސަބަބުން، ވާދަވެރިންގެ ތާއީދުވެސް ލިބިވަޑައިގަތެވެ.
އިންފަންޓީނޯގެ ޒައާމަތުގައި ރާއްޖެ ފަދަ ކުދި ގައުމުތަކަށް ކުރިއަށްވުރެ އިތުރު ބާރާއި އެހީ ލިބިފައިވެއެވެ. މި ދަތުރުގެ ބޭނުމަކީ، ދިވެހި ފުޓްބޯޅައިގެ ހާލަތު އަމިއްލަފުޅަށް ބައްލަވައި، އެފްއޭއެމްގެ ރައީސް އަހުމަދު ތޯރިގާއި ޓީމުން ދިވެހި ފުޓްބޯޅަ އަލުން ކޮޅަށް ޖެހުމަށް ކުރައްވާ މަސައްކަތްތައް ދެނެގަތުމެވެ. އިންފަންޓީނޯއަކީ ކަންކަން އަމިއްލަފުޅަށް ތަޖުރިބާކުރައްވައި، އިސްލާހުކުރައްވައި އެހީތެރިވެދެއްވަން ދެނެވަޑައިގަންނަވާ ބޭފުޅެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0