ތަރައްގީގެ މަޝްރޫއުތައް ފެށުމުން އެމްޑީޕީން އުޅެނީ ހިތަށް ކުޅަދާނަ ނުވެގެން: ސިނާން

Read Time:5 Minute, 23 Second

(ފޮޓޯ ކްރެޑިޓްސް: ވަގުތު)

ތަރައްގީގެ މަޝްރޫއުތައް ފެށުމުން އެމްޑީޕީން އުޅެނީ ހިތަށް ކުޅަދާނަ ނުވެގެން ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު މުހައްމަދު ސިނާން ވިދާޅުވެއްޖެއެވެ. “އެކްސް”ގައި ކުރެއްވި ޕޯސްޓެއްގައި ސިނާން ވިދާޅުވީ އެމްޑީޕީގެ ސިޔާސަތަކީ އެބައިމީހުން ނޫން އެހެން އެއްވެސް ބައެއް ވެރިކަން ކުރާނަމަ ރަނގަޅު ހަމަ އެއް ކަމެއް ވެސް ކުރެވޭ ކަމަކަށް ނުހެދުން ކަމަށެވެ. ރޯމާއި ދުވާލު ބޮޑެތި ވައްކަންތައްކޮށް ދިވެހިން ނިކަމެތި ވަމުން އަައި ދުވަސްވަރެއްގައި ހިތްވަރުގަދަަ ރައީސް ޑރ. މުހައްމަދު މުއިއްޒު ނުކުމެވަޑައިގަތީ އެ ނުލަފާ މީހުން ރައްޔިތުންނަށް ވަމުން ދިޔަ ހިޔާނާތްތަކުންނާއި އަނިޔާވެރިކަމުން ގައުމު ސަލާމަތް ކޮށްދެއްވުމަށް ކަމަށް ވެސް ވިދާޅުވިއެވެ. “ނުހަނު ފަސޭހަކަމާއެކު ބޮޑު ތަނުން ބޮޑު ނޯ އެއް ޖަހާ އެމްޑީޕީ ވެރިކަމުން ދިވެހިން ދުރުކުރީ އެހެންވެ. މިއަދު ހަރަދު ކުޑަކޮށް ތަރައްގީގެ އެތައް މަޝްރޫއުތަކެއް ފައްޓަވައި ދެއްވާތަން ފެނުމުން ހިތަށް ކުޅަދާނަ ނުވެގެން ކިޔޭ ނުކިޔޭ އެއްޗެއް ނޭނގޭ ހިސާބަށް މި ބައިގަނޑުގެ ކަންތައް ބޮޑުވެއްޖެ. ހަގީގަތަކީ މިއަދު އެމްޑީޕީ އޭ ކިއުނު ވަގުންގެ ބައިގަނޑަށް އެއްވެސް ތާއީދެއްވެސް ނެތްކަން” ސިނާން ވިދާޅުވިއެވެ.

މެމްބަރު ސިނާން މިގޮތަށް ވިދާޅުވެފައިވަނީ ރާއްޖޭގެ ވެރިކަމަށް ދެން ވަޑައިގަންނަވާ ރައީސަކު ކެމްޕެއިން ކުރައްވާއިރު ވައުދުވެ ވަޑައިގަންނަވަންވީ “މަޑުޖެހިލަން” ކަމަށް ކުރީގެ ރައީސް މުހައްމަދު ނަޝީދު ވަނީ ވިދާޅުވެފައެވެ. ނަޝީދު ވިދާޅުވީ ދައުލަތުގެ ދަރަނި ހަމަޖައްސައި، ރައްޔިތުންގެ ތަނަވަސްކަން އިތުރުކުރުމަށް ކުރިއަށް އޮތް ހަތަރު، ފަސް އަހަރަށް އުމްރާނީ ތަރައްގީގެ މަޝްރޫއުތައް ހުއްޓާލަން ޖެހޭ ކަމަށެވެ. އެގޮތުން، ކުރިއަށް އޮތް އިންތިހާބުތަކުގެ ޝިއާރަކަށް ވާންވީ، “އިހަށް މަޑުކޮށްލާ” ކަމަށާއި ދެން ވެރިކަމަށް އިންތިހާބުވާ ރައީސަކު ވައުދުވާންވީ މަޝްރޫއުތައް ހިންގުމުގައި “މަޑުޖެހިލަން” ކަމަށް ނަޝީދު ވިދާޅުވިއެވެ. ކޮންކްރީޓަކީ ތަރައްގީ ނޫން ކަމަށާއި ގިނަ ފަހަރު އެއީ ދައުލަތަށް އިތުރުވާ ދަރަނި ކަމަށް އެމަނިކުފާނު ވިދާޅުވިއެވެ. ރައްޔިތުންގެ ތަނަވަސްކަން އިތުރުވަނީ ބަޖެޓު ސާޕްލަސް އިތުރުކުރެވި ދަރަނި ކުޑަކުރެވިގެން ކަމަށާއި ދިވެހިންނަކީ ތަންދޮރު ދަންނަ، ހޭލުންތެރި ބައެއް ކަމަށް ނަޝީދު ވިދާޅުވިއެވެ.

ރައީސް ޑރ. މުއިއްޒު ވެރިކަމާ ހަވާލުވެވަޑައިގަތުމަށްފަހު، ސަރުކާރަށް ނިސްބަތްވާ ސުޕަމެޖޯރިޓީ މަޖިލީހަކާއެކު ފާސްކުރި ފުރަތަމަ ބަޖެޓު މި އަހަރަަށް ފާސްކުރިއިރު އެއީ 56 ބިލިއަން ރުފިޔާގެ ރެކޯޑު ބަޖެޓެކެވެ. ނަމަވެސް ބަޖެޓުގެ ތަފާސްހިސާބުތަކަށް ބަލާއިރު، ޕީއެސްއެއައިޕީ މަޝްރޫއުތަކަށް 12 ބިލިއަން ރުފިޔާ ބަޖެޓުކޮށްފައި އޮތަސް، އެންމެ ފަހުން ހަރަދުތަކުގެ ހިސާބުތައް އާންމުކުރި ތާރީހުކަމަށްވާ ނިމިދިޔަ މަހުގެ 18ވަނަ ދުވަހާ ހަމައަށް ހޭދަކުރީ 7.1 ބިލިއަން ރުފިޔާއެވެ.