Read Time:4 Minute, 53 Second
ޓެކްނޮލޮޖީގެ ކުރިއެރުމާއެކު ދުނިޔޭގެ ވިޔަފާރިތަކާއި ޚިދުމަތްތައް ޑިޖިޓަލްވެފައިވާއިރު، ނަގުދު ފައިސާއަށްވުރެ ބޮޑަށް އީ-ވޮލެޓްފަދަ އޮންލައިން ވަސީލަތްތައް ބޭނުންކުރެވެއެވެ. ރާއްޖެއިން ބޭރުގެ އީކޮމާސް ވެބްސައިޓުތަކުން ވިޔަފާރިކުރުމުގެ ފުރުސަތު ދިވެހިންނަށް އޮތް ނަމަވެސް، ބައިނަލްއަޤްވާމީ ގިނަ ޕޭމަންޓް ގޭޓްވޭތައް ރާއްޖޭގައި ނެތުމުގެ ސަބަބުން އޮންލައިންކޮށް އާމްދަނީ ހޯދުމަށް ހުރަސްތަކެއް އެބަހުއްޓެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގަތީ ރާއްޖޭގެ އިޤްތިޞާދު ޑިޖިޓަލައިޒްކުރުމުގެ ވަޢުދާއެކުއެވެ. މި ވަޢުދުގެ ދަށުން ޕޭޕަލްފަދަ އީ-ވޮލެޓްތައް ތަޢާރަފްކޮށް ފައިސާގެ މުޢާމަލާތްތައް ފަސޭހަކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. ސަރުކާރުން ޤަބޫލުކުރާ ގޮތުގައި ކުރީ ސަރުކާރުތަކުގައި މިކަމަށް އެކަށީގެންވާ މަސައްކަތެއް ނުކުރެވުމުގެ ސަބަބުން ޕޭޕަލްގެ ޚިދުމަތް ރާއްޖެއަށް ލިބިފައި ނުވަނީއެވެ. މިކަމުގެ މަޝްވަރާތައް ރައީސް މުޢިއްޒުގެ ސަރުކާރުން މިދިޔަ އަހަރު ޕޭޕަލްއާއެކު ފެށިއެވެ.
ސަރުކާރުގެ މަސައްކަތުގެ ނަތީޖާއެއްގެ ގޮތުން، އުރީދޫގެ އެމްފައިސާ ވޮލެޓް މެދުވެރިކޮށް ޕޭޕަލްގެ ޚިދުމަތް ރާއްޖެއަށް ތަޢާރަފްކުރުމުގެ މަސައްކަތް ވަނީ ފަށާފައެވެ. ރައީސް ވިދާޅުވީ ގަތަރުގެ އުރީދޫ ފިންޓެކް މެދުވެރިކޮށް ޕޭޕަލްގެ ޚިދުމަތް ލަސްތަކެއްނުވެ، އަންނަ އަހަރުގެ ތެރޭގައި ރާއްޖެއަށް ލިބޭނެކަމަށް އުންމީދުކުރައްވާ ކަމަށެވެ. ޕޭޕަލްފަދަ ޚިދުމަތްތައް ރާއްޖެއަށް ތަޢާރަފްކުރުމުގައި ސަރުކާރުގެ ދައުރަކީ އެކަމަށް ހުރި ހުރަސްތައް ނައްތާލާ، މަގުފަހިކޮށްދިނުމެވެ. އެގޮތުން، އުރީދޫ ފިންޓެކް ކުންފުންޏަށް ބޭރުން ފައިސާ ގެނައުމުގެ ހުއްދަ (އިންވާޑް ރެމިޓެންސް ހުއްދަ) އެމްއެމްއޭއިން ދޫކޮށްފައިވާތީ، މިހާރު ޓެސްޓިން މަރުހަލާތައް ފަށާފައިވެއެވެ.
ޕޭޕަލްގެ ޚިދުމަތާއެކު ދިވެހި ވިޔަފާރިވެރިންނަށް އެމީހުންގެ އުފެއްދުންތައް ބޭރުގެ ބާޒާރުތަކުގައި މާކެޓްކޮށް، އާމްދަނީ ހޯދުމަށް ފަހި ފުރުސަތެއް ހުޅުވޭނެއެވެ. މީގެ އިތުރުން ކޮންޓެންޓް ކްރިއޭޓަރުންނާއި ޑިޖިޓަލް ޚިދުމަތްތައް ފޯރުކޮށްދޭ ފަރާތްތަކަށްވެސް ބޭރަށް ވިޔަފާރި ފުޅާކޮށް އާމްދަނީ އިތުރުކުރުމުގެ މަގު ފަހިވެގެންދާނެއެވެ. މި ޚިދުމަތް ތަޢާރަފްވުމާއެކު، އަންނަ އަހަރު ރާއްޖޭގެ އިޤްތިޞާދަށް އަންނާނެ ކުރިއެރުން އެންމެ ރަނގަޅަށް ފެނިގެންދާނެއެވެ. މިއީ 2030 ވަނަ އަހަރާ ހަމައަށް ޤައުމުގެ އިޤްތިޞާދުގެ 15 އިންސައްތައަކީ ޑިޖިޓަލް އިޤްތިޞާދަކަށް ހެއްދެވުމުގެ ރައީސްގެ ތަޞައްވުރު ޙާސިލްކުރުމަށް އެޅިގެންދާ މުހިންމު ފިޔަވަޅެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0