މައި ބަނދަރުގެ ސެކިއުރިޓީ ވަރުގަދަ ކުރަން ޖެހޭ!

Read Time:3 Minute, 40 Second

(ފޮޓޯ ކްރެޑިޓްސް: މިހާރު)

ރާއްޖޭގެ ބަނދަރުތަކުގެ ސަލާމަތީ ކަންކަމާ ގުޅޭ ގޮތުން ސުވާލުތަކެއް ވަނީ އުފެދިފައެވެ. އެއީ ހުޅުމާލޭ އެމްޕީއެލް ބަނދަރުން، ކަސްޓަމްސްގެ ބެލުމުގެ ދަށުގައި ހުރި 13.6 މިލިއަނަށް ވުރެ ގިނަ ސިނގިރޭޓުގެ ދެ ކޮންޓެއިނަރު ގެއްލުނު މައްސަލައާ ގުޅިގެންނެވެ. މި ސިނގިރޭޓުތައް ރާއްޖެ އެތެރެކުރީ ސައުދީގެ ބިންލާދިން ގުރޫޕުގެ މުދަލާއެކު ކަމަށް ބުނެއެވެ. ވަގަށް ނެގީ ދޯންޏެއް ބޭނުންކޮށް، ބައެއް ކެމެރާތައް ފޮރުވައި، އަދި ހުސްކޮށްފައި އަނބުރާ ބަދަލުކޮށްގެންނެވެ. މި ވައްކަން ހިނގާފައިވަނީ އޮގަސްޓް މަހު ކަމަށް ވިޔަސް، ހާމަވީ ނޮވެމްބަރު މަހު ވެރިންނަށް ލިބުނު މެސެޖަކުންނެވެ.

މި މައްސަލައިގައި ދެ މަޝްހޫރު ވިޔަފާރިވެރިއަކާއި ކަސްޓަމްސްގެ ކުރީގެ އިސް މުވައްޒަފެއްގެ އިތުރުން މުއާޒް އަލީ (މިފްކޯގެ ޖެނެރަލް މެނޭޖަރު އިންޖިނިއަރިން ޕްރޮޖެކްޓްސްގެ މަގާމުގައި ހުރި) ހިމެނޭ ހަތަރު މީހަކު ވަނީ ހައްޔަރުކޮށްފައެވެ. އަދި މި މައްސަލައިގެ ތަހުގީގަށް 12 މީހަކު ފުރުން މަނާކޮށްފައިވެއެވެ. އެމްޕީއެލްގެ ބަނދަރުތައް އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ ކޯޑަށް ފައްތާފައި ވިޔަސް، ކުރީގެ ރައީސް ޔާމީންގެ ވެރިކަމުގައި ވެސް ސައިކަލްތަކެއް ވަގަށް ބޭރުކުރި ފަދަ ކަންކަން ހިނގާފައިވާކަން ފާހަގަކުރެވެއެވެ. އެމްޕީއެލްގެ ކުރީގެ އިސް ބޭފުޅަކު ވިދާޅުވީ އެމްޕީއެލްގެ މުވައްޒަފުންގެ ބައިވެރިވުމެއް ނެތި މިފަދަ ބޮޑު ކަމެއް ނުހިނގާނެ ކަމަށާއި، ކަސްޓަމްސްގެ ތަޅު ކެނޑުމުގައި ވެސް އެ މުއައްސަސާގެ މުވައްޒަފެއްގެ ހިއްސާއެއް އޮންނާނެ ކަމަށް ޔަގީންވާ ކަމަށެވެ.

މިފަދަ ކަންކަމުން މިންޖުވުމަށް، ބެސްޓް ޕްރެކްޓިސް އުސޫލުތައް ތަންފީޒުކޮށް، މުވައްޒަފުން ނެގުމުގައި ހަރުދަނާ އުސޫލުތަކެއް ގެންގުޅުން މުހިންމު ކަމަށް ބުނެއެވެ. ބަނދަރުތަކަކީ ގައުމަށް މުދާ އެތެރެކުރާ އެންމެ މުހިންމު ދޮރާށި ކަމަށް ވާތީ، އޭގެ ސަލާމަތީ ކަންކަން ކަށަވަރުކޮށް، ޖަވާބުދާރީވުން ހަރުދަނާކުރުމަށް ގޮވާލާފައިވެއެވެ.