Read Time:4 Minute, 42 Second
(ފޮޓޯ ކްރެޑިޓްސް: މިހާރު)
ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް، އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ދާއޫދުގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއް ކުރައްވައިފި އެވެ. މިކަން ހާމަކުރެއްވީ މަޖިލީހުގެ މާލިއްޔަތު ކޮމިޓީގެ ސަބް ކޮމިޓީ ބައްދަލުވުމެއްގަ އެވެ.
ނާޒިމް ހުށަހެޅުއްވި ރިޕޯޓެއްގައި ބުނެފައިވާ ގޮތުގައި 2023 އަދި 2024 ވަނަ އަހަރު ދާއޫދުގެ އަދި އާއިލާގެ ބައެއް މެންބަރުންގެ އެކައުންޓުތަކަށް އާމްދަނީ ލިބުނު ގޮތް ނޭނގޭ ފައިސާ ޖަމާވެފައިވެ އެވެ. އަދި ފުލުހުންނަކީ ވިޔަފާރިކުރުން މަނާ ބަޔަކަށް ވާއިރު، ދާއޫދުގެ ނަމުގައި ވިޔަފާރިއެއް ނެތެވެ. މީގެ އިތުރުން އެމްއެމްޕީއާރުސީ ކޮރަޕްޝަނާ ގުޅޭ އެސެޓް ރިކަވަރީ ކޮމިޝަންގެ ރިޕޯޓުގައި ވެސް ދާއޫދު ހިމެނޭ ކަމަށް ނާޒިމް ވިދާޅުވި އެވެ. ވިސްލްބްލޯވަރުން ދިން މައުލޫމާތުތަކަށް ބަލާއިރު، ދާއޫދާއި ވިޔަފާރިވެރިޔާ ހަސަން ތައުފީގު ގުޅިގެން ދެ ބޭފުޅުންގެ އަނބިކަނބަލުންގެ ނަމުގައި 10.5 މިލިއަން ރުފިޔާގެ ރިއަލް އެސްޓޭޓް އިންވެސްޓްމެންޓެއް ކޮށްފައިވެ އެވެ. އަދި 4.1 މިލިއަން ރުފިޔާގެ އެޕާޓްމެންޓެއް ނަގުދު ފައިސާއިން 10 އިންސްޓޯލްމެންޓަށް ބަހާލައިގެން ދައްކާފައިވާ ކަމަށް ވެސް ނާޒިމް ވިދާޅުވި އެވެ.
ނާޒިމްގެ މި ވާހަކަތަކަށް ރައްދު ދެއްވަމުން ދާއޫދުގެ ގާނޫނީ ވަކީލުން ބުނީ، އެއީ ހަގީގަތާ ހިލާފު ވާހަކަތަކެއް ކަމަށެވެ. ދާއޫދުގެ އެކައުންޓަށް ގޮތް ނޭނގޭ އެއްވެސް ފައިސާއެއް ޖަމާވެފައި ނުވާނެ ކަމަށާއި ގާނޫނާ ހިލާފު އެއްވެސް މުއާމަލާތެއް ހިންގާފައި ނުވާނެ ކަމަށް ޔަގީންކަން ދިނެވެ. އަދި އެމްއެމްޕީއާރުސީގެ އެއްވެސް ފައިސާއެއް ދާއޫދަށް ލިބިފައި ނުވާކަން ތަހުގީގުތަކުން ސާފުވާނެ ކަމަށާއި، ކުރީގެ ޕޮލިސް ބޯޑުގެ ނިންމުންތައް ކޯޓުން ބާތިލުކޮށްފައިވުމުން ދާއޫދުގެ ނަޒާހާތްތެރިކަމާ މެދު ސުވާލު އުފެއްދޭނެ ޖާގައެއް ނެތް ކަމަށް ވެސް ވަކީލުން ބުނެ އެވެ. އަދި ތުހުމަތު ރައްދުވާ ފަރާތަށް ޖަވާބުދާރީވުމުގެ ފުރުސަތު ނުދީ މަޖިލީހުގެ ކޮމިޓީއެއްގައި ސާބިތު ނުހިފޭ ވާހަކަތައް ދެއްކުމަކީ ޒިންމާދާރު ކަމެއް ނޫން ކަމަށް ވެސް ދާއޫދުގެ ގާނޫނީ ވަކީލުން ފާހަގަކުރެ އެވެ.
މި ތުހުމަތުތައް ދާއޫދުގެ މައްޗަށް ކުރިއިރު، އޭނާ މިއަދުން ފެށިގެން ޗުއްޓީއަކަށް ވަޑައިގެންފައިވާ ކަމަށާއި، ހުޅުމާލެ ޕޮލިސް ހިންގުން ވަގުތީ ގޮތުން އެސިސްޓެންޓް ކޮމިޝަނަރު އަހުމަދު މުހައްމަދު (ޓޫފޯ) އާ ހަވާލުކޮށްފައިވާ ކަމަށް ވެސް މައުލޫމާތު ލިބެ އެވެ. ނަމަވެސް ދާއޫދާ މެދު އަދި އެއްވެސް ފިޔަވަޅެއް އެޅި ކަމެއް ސާފެއް ނުވެ އެވެ.
Happy
100 %
Sad
0 %
Excited
0 %
Sleepy
0 %
Angry
0 %
Surprise
0 %
0
0