Read Time:8 Minute, 4 Second
(ފޮޓޯ ކްރެޑީޓްސް: ރޮއިޓާރސް)
އަފްޣާނިސްތާނާއި ޕާކިސްތާން ގުޅޭ ސަރަޙައްދީ ރޮނގު ކައިރީގައި ވަރުގަދަ ޙަމަލާތަކެއް ބަދަލު ކުރަމުން އެބަދެއެވެ. އަފްޣާނިސްތާނުގައި ވެރިކަން ކުރާ ނިރުބަވެރި ޖަމާޢަތް، ޠާލިބާނުންނާއި ޕާކިސްތާނުގެ އަސްކަރިއްޔާގެ ފައުޖުތަކާ ދެމެދު ޙަމަލާ ބަދަލު ކުރަން ފެށުމާ އެކު، ބައިނަލްއަޤްވާމީ މުޖުތަމަޢުން ވަނީ މި ކަމާ މެދު ކަންބޮޑުވުން ފާޅުކޮށްފައެވެ. އަދި، ޙަމަލާ ބަދަލު ކުރުން މެދުކަނޑައިލުމަށް ގޮވައިލާފައެވެ. ޠާލިބާނުންނާއި ޕާކިސްތާނުގެ ސިފައިންނާ ދެމެދު ބަދަލު ކުރަމުންދާ ޙަމަލާތައް މެދުކަނޑައިލުމަށް ގޮވައިލާފައިވާ ޤައުމުތަކުގެ ތެރޭގައި އީރާން، ޤަޠަރު އަދި ސަޢޫދީ ޢަރަބިއްޔާ ހިމެނެއެވެ. ދެ ފަރާތުގެ ދެމެދުގައި ޙަމަލާ ބަދަލު ކުރަން ފަށާފައި ވަނީ، ހުސްވި ހަފުތާގެ ތެރޭގައި އަފްޣާނިސްތާނުގެ ވެރިރަށް ކާބުލަށް ވައިގެ ޙަމަލާތަކެއް ދިނުމާ ގުޅިގެންނެވެ. އެ ޙަމަލާތަކުގެ ފަހަތުގައި އޮތީ ކޮން ޤައުމެއް ކަން ސާފެއް ނޫނެވެ. ނަމަވެސް، އެއީ ޕާކިސްތާނުގެ އަސްކަރިއްޔާއިން ދީފައިވާ ޙަމަލާއެއް ކަމުގައި ޠާލިބާނުންގެ ސަރުކާރުން ތުހުމަތު ކުރެއެވެ.
ޠާލިބާން ސަރުކާރުގެ ދިފާޢީ ވުޒާރާގެ ތަރުޖަމާނު ޢިނާޔަތުالله އަލް-ޚަވާރިޛްމީ ބުނީ ޕާކިސްތާނުން ދީފައިވާ ވައިގެ ޙަމަލާތަކުގެ ބަދަލު ހިފުމުގެ ގޮތުން ސަރަޙައްދީ ރޮނގު ކައިރީގައި ހަރަކާތްތެރިވާ ޕާކިސްތާނުގެ ފައުޖުތަކަށް އަމާޒުކޮށް ރައްދު ޙަމަލާތަކެއް ދީފައިވާނެ ކަމުގައެވެ. އަދި، ރައްދު ދިނުމުގެ ގޮތުން ޠާލިބާނުންގެ ލަޝްކަރުން ހިންގާފައިވާ އޮޕަރޭޝަން ކާމިޔާބު ކަމާ އެކު ނިންމައިލާފައިވާނެ ކަމުގައެވެ. ނަމަވެސް، ޕާކިސްތާން ސަރުކާރުން ވަނީ ޠާލިބާނުންގެ ޙަމަލާތަކާ މެދު ކަންބޮޑުވުން ފާޅުކޮށްފައެވެ. ޕާކިސްތާނުގެ ދާޚިލީ ވުޒާރާގެ ތަރުޖަމާނު މުޙްސިން ނަޤްވީ ވިދާޅުވީ، ޕާކިސްތާންގެ ސިފައިންނަށް އަމާޒުކޮށް ޠާލިބާނުން ޙަމަލާ ދީފައި ވަނީ އެއްވެސް ޙައްޤު ސަބަބަކާ ނުލާ ކަމުގައެވެ. އަދި، ޠާލިބާނުންގެ ޙަމަލާތަކަށް ޕާކިސްތާނުގެ ފައުޖުން އެކަށޭނަ ރައްދެއް ދެމުންދާ ކަން ވެސް އޭނާ ފާހަގަކުރެއްވިއެވެ.
“އަފްޣާނިސްތާނުގެ ފައުޖުން ޕާކިސްތާންގެ ޢާންމު ރައްޔިތުންގެ އާބާދީއަށް އަމާޒުކޮށް ޙަމަލާ ދިނުމަކީ ބައިނަލްއަޤްވާމީ ޤާނޫނުތަކާ ޚިލާފު ޖަރީމާއެއް. ޕާކިސްތާންގެ ފައުޖުން ވާނީ ހިތްވަރާ އެކު އެ ޙަމަލާތަކުގެ ބަދަލު ހިފުމުގެ ގޮތުން ރައްދު ޙަމަލާ ދީފައި، [ޠާލިބާނުންގެ] މި ފަދަ ޙަމަލާތައް ބަލައެއް ނުގަންނާނަން،” އެކްސްގައި ޝާއިޢު ކުރެއްވި ޕޯސްޓެއްގައި އޭނާ ލިޔުއްވިއެވެ. ޕާކިސްތާންގެ މީޑިޔާތަކުން ބުނީ، އަފްޣާނިސްތާންގެ ސަރަޙައްދީ ރޮނގު ކައިރީގައި އޮތް ހަ ސަރަޙައްދަކަށް ޠާލިބާނުންގެ ފައުޖުން ޙަމަލާތައް އަމާޒު ކޮށްފައިވާ ކަމުގައެވެ. އަދި، އާޓިލަރީ ބަޑި ފަދަ ހަަތިޔާރު ބޭނުން ކޮށްގެން ޕާކިސްތާންގެ އަސްކަރިއްޔާއިން ޠާލިބާނުންނަށް ވަރުގަދަ ރައްދެއް ދީފައިވާ ކަމުގައި ވެސް މީޑިޔާތުން ރިޕޯޓު ކުރިއެވެ. ދެ ފަރާތުގެ ދެމެދުގައި ޙަމަލާ ބަދަލު ކުރުން ހުއްޓައިލާފައިވާ ކަން ކަށަވަރު ކުރެވިފައެއް ނެތެވެ.
ދެ ފަރާތުގެ ދެމެދުގައި ޙަމަލާ ބަދަލު ކުރަން ފަށާފައި މި ވަނީ، ކާބުލަށް ދާދި ފަހުން ވައިގެ ޙަމަލާތަކެއް ދިނުމާ ގުޅިގެންނެވެ. ޠާލިބާނުން ވަނީ އެ ޙަމަލާތަކުގެ ޒިންމާ ޕާކިސްތާނުގެ ކޮނޑުގައި އަޅުވާފައެވެ. ނަމަވެސް، ޕާކިސްތާނުން އެ ޙަމަލާތަކުގެ ޒިންމާ އުފުލާފައެއް ނުވެއެވެ. ޠާލިބާނުންގެ ތުހުމަތުތަކަށް ރައްދު ދެމުން ޕާކިސްތާން ސަރުކާރުން ބުނީ، ޕާކިސްތާނުގައި ހަރަކާތްތެރިވާ ޠާލިބާން ޖަމާޢަތަށް ނިސްބަތްވާ ހަނގުރާމަވެރިންނަށް ކާބުލްގެ ސަރުކާރުން ޙިމާޔަތާއި ރައްކާތެރިކަން ފޯރުކޮށްދެމުންދާ ކަމުގައެވެ. ޕާކިސްތާނާއި އަފްޣާނިސްތާނާ ދެމެދު ޙަމަލާ ބަދަލު ކުރަން ފެށުމާ އެކު، ސަރަޙައްދީ ކަންބޮޑުވުމެއް މި ވަނީ އުފެދިފައެވެ. ޙަމަލާ ބަދަލު ކުރުން ހުއްޓައިލުމަށް ގޮވައިލައްވާފައިވާ ބޭފުޅުންގެ ތެރޭގައި އީރާންގެ ޚާރިޖީ ވަޒީރު ޢައްބާސް ޢަރާޤިޖީ ހިމެނެއެވެ. “އަޅުގަނޑުމެން ދެކޭ ގޮތުގައި ދެ ފަރާތުން ވެސް ޙަމަލާ ބަދަލު ކުރުން ހުއްޓައިލަން ޖެހޭ،” ޓީވީ ޗެނަލަކަށް ދެއްވި ބަސްދީގަތުމެއްގައި އޭނާ ވިދާޅުވިއެވެ. އަދި، އަފްޣާނިސްތާނާއި ޕާކިސްތާނާ ދެމެދު ހަމަޖެހުން ޤާއިމުވެފައި އޮތުމަކީ ސަރަޙައްދީ ސުލްޙައާއި ހަމަޖެހުމަށް މުހިންމު ކަމެއްގެ ގޮތުގައި އޭނާ ފާހަގަ ކުރެއްވިއެވެ. މީގެ އިތުރުން ޤަޠަރާއި ސަޢޫދީ ޢަރަބިއްޔާއިން ވެސް ވަނީ މި ކަމާ މެދު ކަންބޮޑުވުން ފާޅުކޮށްފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0