“މުޖުތަމަޢުގައި ދިމާވާ ގިނަ ދަތިތައް ގުޅިފައިވަނީ މުދަލާމެދު ދީނުގައިވާ އުސޫލުތަކަށް އިހުމާލުވުމާ”

Read Time:4 Minute, 34 Second

މިއަދު މުޖުތަމަޢުގައި ދިމާވާ ގިނަ ދަތިތައް ގުޅިފައިވަނީ، މުދަލާމެދު ދީނުގައި އަންގަވާފައިވާ އުސޫލުތަކަށް އިހުމާލުވުމުންކަމަށް ހުކުރު ޚުތުބާގައި ވިދާޅުވެއްޖެއެވެ. ހުކުރު ޚުތުބާގެ މަޢުޟޫއަކީ “މުދަލުގެ ޙުރުމަތް” މި މަޢުޟޫއެވެ. އަދުގެ މުޖުތަމަޢުގެ ޙާލާމެދު ފިކުރު ހިންގާލާއިރު، އަހަރުމެންނާ ދިމާވާ ގިނަ ދަތިތައް ގުޅިފައިވަނީ މުދަލާމެދު ދީނުގައި އަންގަވާފައިވާ އުސޫލުތަކަށް އިހުމާލުވުމާއެކުގައިކަމަށާއި، މުޖްތަމަޢުގައި މިހާރު އާންމުވެފައިވާ ކޮރަޕްޝަންގެ މައްސަލަތަކާއި، ރިޝްވަތާއި، އަމިއްލަ މަސްލަހަތު އިސްކުރުމާއި، އާމްދަނީ ހޯދުމަށް މަސައްކަތްކުރުމަށް ފަސްޖެހުންފަދަ އެންމެހައި ކަންކަމުން ދުރުހުލިވުމަށް ދީނުގައި ބާރުއަޅުއްވާފައިވާކަން ހުކުރު ޚުތުބާގައި ފާހަގަކުރެއްވިއެވެ.

އަދި ހަލާލު ގޮތުގައި މުދާ ހޯދުމަކީ، މުދަލުގައި ބަރަކާތްލައްވާނެ ކަމެއްކަމަށާއި، އަދި އެއީ އަހަރުމެންގެ ޢަމަލުތައް މާތްﷲގެ ހަޟްރަތުގައި ޤަބޫލުވެވޭނެ ކަމެއްކަން ޚުތުބާގައި ފާހަގަކުރެއްވިއެވެ. “އިސްލާމްވުމާއެކު، މާތްﷲ އެމީހަކަށް ފުދުންތެރިކަންދެއްވައި، އަދި އޭނާއަށް އެކަލާނގެ ދެއްވި އެއްޗެއްގެ މައްޗަށް ރިހިގެންވާ މީހާ، ހަމަކަށަވަރުން ކާމިޔާބުވެއްޖެއެވެ.” ޚުތުބާގައި ވިދާޅުވިއެވެ. މާތްﷲ އިންސާނާއަށް ދެއްވާ މުދަލަކީ ހުރުމަތްތެރިވެގެންވާ އެއްޗެއްކަން ފާހަަގަކުރައްވާ ހުކުރު ޚުތުބާގައި ވިދާޅުވީ، އެއްވެސް މީހަކު އަނެކާގެ މުދަލަށް ހައްޤަކާނުލައި އަރައިގަތުމަކީ އިސްލާމްދީނުގައި ޙަރާމްކުރައްވާފައިވާކަމެއްކަމަށެވެ. އަދި ބާތިލު ގޮތުގައި އެހެން މީހުންގެ މުދާ ނުކެއުމަށާއި، ހެޔޮގޮތުގައި ވިޔަފާރިކޮށްގެން ނުވަތަ ދީނުގައި ހުއްދަ ކުރައްވާފައިވާ މަސައްކަތެއްކޮށްގެން މުދާ ހޯދުމަށް ހުކުރު ޚުތުބާގައި ގޮވާލެއްވިއެވެ.

(ފޮޓޯ ކްރެޑިޓްސް: އިސްލާމިކް މިނިސްޓްރީ)

ހުކުރު ޚުތުބާގައި ވަނީ، އެއްވެސް އިންސާނަކަށް މާތްﷲ ކަނޑައަޅުއްވާފައިވާ ރިޒުޤު ފުރިހަމަވުމުގެ ކުރީން އޭނާގެ އަޖަލާ ބައްދަލެއް ނުކުރާނެކަން ހަނދާންކޮށްދެއްވާފައެވެ. އަދި ޙަރާމްގޮތުގައި މުދާ ހޯދުމަކީ މުދަލުގެ ބަރަކާތްކެނޑޭނޭކަމެއްކަމަށާއި، ކުރާ ހެޔޮ ޢަމަލުތައް ޤަބޫލުކުރެއްވުމަށް ހުރަސްއެޅޭކަމެއްކަން ޚުތުބާގައި ފާހަގަކުރެއްވިއެވެ. އަދި ޙަރާމް ގޮތުގައި ހޯދާ ތަނަވަސްކަމަކީ އެމީހެއްގެ ރިޒުޤުކަމުގައިވެއްޖެ މީހަކަށް ހުރި އަބާއްޖަވެރިކަމުގެ ބޮޑުކަމުގެ މައްޗަށްވެސް މިއަދުގެ ހުކުރު ޚުތުބާގައި އަލިއަޅުއްވާލެއްވިއެވެ.