އަފްޣާނިސްތާނުގެ ޠާލިބާން ޚާރިޖީ ވަޒީރު އިންޑިޔާއަށް، ކާބުލްގައި ހުންނަ އެންބަސީ ވެސް އަލުން ހުޅުވަނީ

Read Time:6 Minute, 15 Second

(ފޮޓޯ ކްރެޑިޓްސް: ރޮއިޓާރސް)

އަފްޣާނިސްތާނުގެ ކާބުލްގައި ހުންނަ އިންޑިޔާގެ އެންބަސީ އަލުން ހުޅުވުމަށް އެ ޤައުމުން ނިންމައިފިއެވެ. އެ ޤައުމުން އެ ނިންމުން ނިންމާފައި ވަނީ އަފްޣާނިސްތާނުގެ ޠާލިބާން ޚާރިޖީ ވަޒީރު، އަމީރު ޚާން މުއްތަޤީ އިންޑިޔާއަށް ކުރަމުންދާ ދަތުރުގެ ތެރެއިންނެވެ. ކާބުލްގައި ހުރި އިންޑިޔާގެ އެންބަސީ ބަންދުކޮށްފައި ވަނީ 2021ވަނަ އަހަރު އަފްޣާނިސްތާނުގެ ވެރިކަމާ ޠާލިބާނުން ޙަވާލުވުމުންނެވެ. އެއީ އަފްޣާނިސްތާނުގައި ތިބި ވިލާތުގެ އަސްކަރީ ފައުޖު، ނޭޓޯގެ ސިފައިން އެ ޤައުމުން ފޭބުމަށް ފަހުގައެވެ. ނަމަވެސް 2022ވަނަ އަހަރުގެ ތެރޭގައި އިންޑިޔާއިން ވަނީ ވިޔަފާރި ބޭނުންތަކަށާއި ޞިއްޙީ ޚިދުމަތާއި އިންސާނީ އެހީތެރިކަން ފޯރުކޮށްދިނުމަށް އެ ޤައުމުގެ މިޝަންއެއް އަފްޣާނިސްތާނުގައި ޤާއިމުކޮށްފައެވެ.

އަފްޣާނިސްތާނުގެ ޚާރިޖީ ވަޒީރު އިންޑިޔާއަށް ކުރަމުންދާ ދަތުރަކީ 2021ވަނަ އަހަރުގެ ފަހުން އެ ޤައުމުގެ އިސްވެރިއަކު އިންޑިޔާއަށް މި ފަދަ ދަތުރެއް ކުރާ ފުރަތަމަ ފަހަރެވެ. އިންޑިޔާއަށް މުއްތަޤީ ކުރަމުންދާ ހަ ދުވަހުގެ ދަތުރެއް ކުރަމުނ ދަނީ އޭނާއާ ދެކޮޅަށް ޤާއިމްކޮށްފައިވާ “ޓްރެވަލް ބޭން”ގެ ވަގުތީ އިސްތިސްނާއެއްގެ ދަށުންނެވެ. އެ ދަތުރުގައި އޭނާ ވަނީ އިންޑިޔާގެ ޚާރިޖީ ވަޒީރު، ސުބްރަމާންޔަމް ޖައިޝަންކަރާ ބައްދަލުކޮށް މަޝްވަރާތަކުގައި ބައިވެރިވެފައެވެ. އިންޑިޔާގެ އެންބަސީ އަލުން ހުޅުވުމަށް އެ ބައްދަލުވުމުގައި ނިންމާފައިވާއިރު، އަފްޣާނިސްތާނުގެ ޚާރިޖީ ވަޒީރު ވެސް ވަނީ އެ ޤައުމުގެ ޚާރިޖީ މުވައްޒަފުން ނިއު ދިއްލީއަށް ފޮނުވާނެ ކަމަށް ބުނެފައެވެ. ޖައިޝަންކަރާ ބައްދަލު ކުރަމުން މުއްތަޤީ ވަނީ އަފްޣާނިސްތާނުން ނިރުބަވެރިކަމާ ދެކޮޅަށް މަސައްކަތް ކުރަމުންދާ ކަމަށް ފާހަގަކޮށް، އެހެން ޤައުމަކަށް ޙަމަލާ ދިނުމަށް އަފްޣާނިސްތާނުގެ ފަސްގަނޑު ބޭނުން ކުރުމަށް ފުރުޞަތު ނުދޭނެ ކަމަށް ބުނެފައެވެ. އަދި އަފްޣާނިސްތާނާއި އިންޑިޔާއިން ރަސްމީ ސިފައެއްގައި ގުޅުން ބަދަހި ކުރާނެ ކަމަށް އުންމީދު ކުރާ ކަމަށް ވެސް އޭނާ ބުންޏެވެ.

އެ ބައްދަލުވުމުގައި ޖައިޝަންކަރު ވިދާޅުވީ އަފްޣާނިސްތާނުގެ ފުރިހަމަ އިސްތިއުލާލާއި ސަރަޙައްދީ ސަލާމަތްތެރިކަމާއި މިނިވަންކަމަށް ވަކާލާތު ކުރާ ކަމަށެވެ. ދެ ޤައުމުގެ ދެމެދުގައި އޮންނަ ގުޅުން ވަރުގަދަ ކުރާ ވަރަކަށް އަފްޣާނިސްތާނުގެ ކުރިއެރުމާއި ސަރަޙައްދީ ހަމަޖެހުމާއި ވިލުންތެރިކަން އިތުރުވާނެ ކަމަށް އޭނާ ވިދާޅުވިއެވެ. ތާރީޚީ ގޮތުން ވެސް އަފްޣާނިސްތާނާއި އިންޑިޔާއާ ދެ ޤައުމަކީ ގާތް ދެ ޤައުމެވެ. ނަމަވެސް އިންޑިޔާއިން އަފްޣަނިސްތާނުގެ ޠާލިބާން ސަރުކާރު ބަލައެއް ނުގަނެއެވެ. މުއްތަޤީ ބުނީ ދެ ޤައުމުން މަސައްކަތް ކުރަމުންދަނީ ގުޅުން ބަދަހިކޮށް ކުރީގެ ގުޅުން އިއާދަ ކުރުމަށް ކަމަށެވެ. އިންޑިޔާއާއި އަފްޣާނިސްތާނާ ގުޅުން ބަދަހިކުރަމުން ދަނީ ދެ ޤައުމާއި، ދެ ޤައުމުގެ ވެސް އަވަށްޓެރި ޕާކިސްތާނާ އޮންނަ ގުޅުން ގޯސްަވެފައި ވަނިކޮށެވެ. އަދި އަފްޣާނިސްތާނުގައި އިންޑިޔާއާ އެންމެ ވާދަވެރި ޗައިނާގެ ނުފޫޒު އިތުރު ކުރުމަށް އެ ޤައުމުން މަސައްކަތްކުރަމުންދާ ދަނޑިވަޅެއްގައެވެ.

ޗައިނާއާއި ރަޝިޔާއާއި އީރާނާއި ޕާކިސްތާނާއި ތުުރުކީވިލާތް ހިމެނޭގޮތަށް 12 ވަރަކަށް ޤައުމުން ވަނީ އަފްޣާނިސްތާނުގައި އެންބަސީ ޤާއިމްކޮށްފައެވެ. ނަމަވެސް އެ ޤައުމުތަކުގެ ތެރެއިން ޠާލިބާން ވެރިކަން ރަސްމީކޮށް ބަަލައިގަނެފައިވާ ހަމައެކަނި ޤައުމަކީ ރަޝިޔާއެވެ.