Read Time:4 Minute, 22 Second
(ފޮޓޯ ކްރެޑިޓްސް: ރައްޔިތުންގެ މަޖިލިސް)
ފެނަކައިގެ ހާއްސަ އޮޑިޓު ފެށިއިރު ގާތްގަނޑަކަށް 3 ބިލިއަން ރުފިޔާގެ ޕާޗޭސް އޯޑަރު (ޕީއޯ) ސިސްޓަމަށް ނާޅާހުރިކަމަށް އޮޑިޓާ ޖެނެރަލް ހުސެން ނިޔާޒީ ވިދާޅުވެއްޖެއެވެ. މިއީ އޮޑިޓުގެ މަސައްކަތް ލަސްވި އެއް ސަބަބުކަމަށް އޭނާ ފާހަގަކުރެއްވިއެވެ. ކުންފުނިތަކުގައި ހުރި ވޭސްޓޭޖާއި ފްރޯޑުގެ މައްސަލަތައް ހަމައެކަނި ހާއްސަ އޮޑިޓަކުން ހުއްޓުވުމަށްވުރެ، މުޅި ގަވަނަންސް ނިޒާމު ރަނގަޅުކުރަންޖެހޭކަމަށާއި، މެނޭޖިން ޑިރެކްޓަރާއި ބޯޑުގެ އިތުރުން ޕީސީބީއާއި ފިނޭންސް މިނިސްޓްރީގެ ޒިންމާތައް ވެސް ހުރިކަން ނިޔާޒީ ފާހަގަކުރެއްވިއެވެ.
މީގެކުރިން ކުރި އޮޑިޓުތަކުން ވެސް ކޮރަޕްޝަނާއި ވައްކަން ފާހަގަވެފައިވާކަން އޭނާ ހަނދާންކޮށްދެއްވިއެވެ. ފައިނޭންޝަލް އޮޑިޓެއްގެ ނަތީޖާ ގޯސްނަމަ، އެއީ އެތެރޭގެ ކޮންޓްރޯލްތަކާއި ގަވަނަންސްގައި މައްސަލަތައް ހުރިކަން ދައްކުވައިދޭ ކަމެއް ކަމަށާއި، ރަނގަޅަށް ހިސާބު ކިތާބު ބެލެހެއްޓުމަކީ ހިންގުންތެރިކަމާއި ޖަވާބުދާރީވުން ހަރުދަނާކޮށް، ކޮރަޕްޝަން ކުޑަކުރުމަށް އެޅޭ މުހިންމު ފިޔަވަޅެއް ކަމަށް އޭނާ ވިދާޅުވިއެވެ. ރެކޯޑުތައް ރަނގަޅަށް ނުބެލެހެއްޓޭތީ އޮޑިޓު މަސައްކަތްތައް ލަސްވާކަމަށާއި، ކުރިއަށް އޮތް އަހަރުތަކުގައި ވެސް ގިނަ ހާއްސަ އޮޑިޓުތައް ކުރިއަށް ގެންދާނެ ކަމަށް އޭނާ ވިދާޅުވިއެވެ. ފެނަކައިގެ މިދިޔަ ހަފްތާގައި އާންމުކުރި ހާއްސަ އޮޑިޓުން ފާހަގަކުރެވުނު ގޮތުގައި 2021 އިން 2023 އަށް 8.8 ބިލިއަން ރުފިޔާ މުދަލާއި ހިދުމަތަށް ހަރަދުކޮށްފައިވާއިރު، އޭގެ ތެރެއިން މުހިންމު ނޫން ކަންކަމަށާއި، ބީލަމުގެ އުސޫލުން ބޭރުން އަދި އަގު ބޮޑުކޮށް ހަރަދުތައް ކޮށްފައިވެއެވެ.
އަދި 2.22 ބިލިއަން ރުފިޔާގެ މަސައްކަތް ހަވާލުކުރި 674 އެއްބަސްވުމުގެ ތެރެއިން 1.37 ބިލިއަން ރުފިޔާގެ 439 އެއްބަސްވުން ދީފައިވަނީ އިއުލާންނުކޮށް، ވާދަވެރި ބީލަމުގެ އުސޫލުން ބޭރުންނެވެ. އިންޖީނުގެތަކާއި އޮފީސް އިމާރާތް އެޅުމަށް 1 ބިލިއަން ރުފިޔާއަށްވުރެ ގިނަ ހޭދަކޮށްފައިވާއިރު، 41 މަޝްރޫއެއް ނުނިމި، އެ މަޝްރޫއުތައް ނިންމަން އިތުރު 241 މިލިއަން ރުފިޔާ ހަރަދުވާނެ ކަމަށް އޮޑިޓުން ލަފާކުރެއެވެ. މީގެ އިތުރުން އިންޖީނުގެތައް އެޅުމަށް ހަވާލުކުރި މަސައްކަތްތައް މާކެޓް އަގަށްވުރެ ގާތްގަނޑަކަށް 767 މިލިއަން ރުފިޔާ ބޮޑުކޮށް ކޮށްފައިވާކަން ވެސް ފާހަގަކުރެވިފައިވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0