ރެސިޑެންސް ވިސާއާ ގުޅޭ ޤާނޫނީ އޮނިގަނޑާއި ސިޔާސަތުތައް އެކުލަވާލުމުގެ މަސައްކަތް ފަށައިފި

Read Time:4 Minute, 9 Second

(ފޮޓޯ ކްރެޑިޓްސް: އިކޮނޮމިކް މިނިސްޓްރީ)

ރެސިޑެންސް ވިސާ ދިނުމާއި ގުޅޭ ޤާނޫނީ އޮނިގަނޑާއި ސިޔާސަތުތައް އެކުލަވާލުމުގެ މަސައްކަތް ކުރައްވަމުންދާކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. މިއީ މި މަސައްކަތް ކުރިއަށްގެންދިޔުމަށް ބޭއްވުނު މިފަދަ ދެވަނަ މަޝްވަރާ ބައްދަލުވުމެވެ.

އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، ރެސިޑެންސް ވިސާއާ ގުޅޭ މިބައްދަލުވުންތައް މިއަހަރުގެ އޯގަސްޓް މަހުގެ ތެރޭގައިވެސް ކަމާ ގުޅުންހުރި ފަރާތްތަކާއެކު ބާއްވާފައިވާކަމަށެވެ. އަދި ދެވަނަ ބުރުގެ ބައްދަލުވުންތަކުގައި ހެންލޭ އެންޑް ޕާރޓްނަރސްގެ އިތުރުން ވިޔަފާރިއާއި އިޤްތިޞާދާ ބެހޭ ވުޒާރާއާއި ސަރުކާރުގެ އެހެން މުވައްސަސާތަކާއި، ޕްރައިވެޓް ސެކްޓަރގެ ބައެއް ފަރާތްތަކުން ބައިވެރިވެފައިވާކަމަށް ވަޒީރު ވިދާޅުވިއެވެ.

Building on the stakeholder consultation meetings held in August 2025 for the Residency by Investment Program, Henley & Partners and the Ministry held a second round of consultations with relevant government agencies and key private sector stakeholders from 14th – 18th September… pic.twitter.com/YwQzlNbA9D

— Mohamed Saeed (@em_saeed) September 18, 2025

މަޝްވަރާގެ މިމަރުޙަލާގައި ކުރިއަށްގެންދިޔައީ، ރާއްޖޭގައި ރެސިޑެންސް ވިސާ ދިނުމުގެ ޕްރޮގްރާމްގެ ޑިޒައިންކުރުމާއި ސިޔާސަތުތަކާއި އަދި މިކަމަށް ބޭނުންވާ ޤާނޫނީ އޮނިގަނޑު އެކުލަވާލުމާއި ގުޅޭ މަޝްވަރާތައްކަމަށް ވަޒީރު ސަޢީދު ވިދާޅުވިއެވެ. ސަރވިސް އެގްރިމަންޓް ފޯރ އަ ރެސިޑެންސް ބައި އިންވެސްޓަމަންޓް ޕްރޮގްރާމް ކުރިއަށްގެންދިޔުމުގެ އެއްބަސްވުމުގައި ހެންލޭ އެންޑް ޕާރޓްނަރސްއާއެކު ދިވެހި ސަރުކާރުން އެއްބަސްވުން އެކުލަވާލާފައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ސިންގަޕޫރަށް ކުރެއްވި ދަތުރުފުޅުގެ ތެރެއިން ބޭއްވި ބިޒްނަސް ފޯރަމްގައެވެ.

ރާއްޖޭގައި އިންވެސްޓަރ ރެސިޑެންސީ ވިސާ އަދި މިހާތަނަށް ދިނުމުގެ މަސައްކަތްކޮށްފައި ނުވިނަމަވެސް މިއީ ދުނިޔޭގެ ކުރިއަރާފައިވާ ޤައުމުތަކުގައި ވަރަށް ފުޅާކޮށް ހިންގާ ޕްރޮގްރާމެއްކަމަށް ސަރުކާރުން ވިދާޅުވެއެވެ. އަދި މިމަޝްރޫޢު ހިނގައިގަތުމުން 5 އަހަރުގެ ތެރޭގައި 6 ބިލިއަނާ ހަމައަށް ރާއްޖެއަށް އިންވެސްޓްމަންޓް ގެނެވޭނެކަމަށް ސަރުކާރުންވަނީ ކުރިން އަންދާޒާކުރައްވާފައެވެ.