ގާސިމްގެ ތާއީދު އިސްލާހުތަކަށް، ވިދާޅުވީ ގައުމު ހިންގަންވާނީ ޔުނިޓަރީ ދައުލަތުގެ ވިސްނުމަށް ކަމަށް

Read Time:4 Minute, 26 Second

(ފޮޓޯ ކްރެޑިޓްސް: ރައީސް އޮފީސް)

ލާމަރުކަޒީ ގާނޫނަށް ގެނެސްފައިވާ ބަދަލުތަކަކީ ދިވެހިރާއްޖެއަކީ ޔުނިޓަރީ ދައުލަތެއްކަމަށް ގާނޫނުއަސާސީގައި ބަޔާންކޮށްފައިވާ އުސޫލާ އެއްގޮތްވާ އިސްލާހުތަކެއް ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ވިދާޅުވެއްޖެ އެވެ. މި ބިލް ރައްޔިތުންގެ މަޖިލީހުން ފާސްކޮށް ރައީސް ޑރ. މުހައްމަދު މުއިއްޒު ވަނީ ތަސްދީގު ކުރައްވައިފަ އެވެ. ގާސިމް ވިދާޅުވީ ގާނޫނުއަސާސީގައި ދިވެހިރާއްޖެއަކީ ޔުނިޓަރީ ދައުލަތެއް ކަމަށް ބުނެފައިވާތީ، ލާމަރުކަޒީ ގާނޫނުވެސް އެ ހުދޫދުގެ ތެރޭގައި އޮންނަން ޖެހޭނެ ކަމަށެވެ. ޔުނިޓަރީ ދައުލަތެއްގެ ވެރިކަން ހިންގުމުގެ ބާރުތަކާ ފުށުއަރާ ގޮތަށް އެއްވެސް ގާނޫނެއް ހެދިފައި އޮވެގެން ނުވާނެ ކަމަށް އޭނާ ފާހަގަކުރެއްވި އެވެ.

ގާސިމް ވަނީ މި އިސްލާހުތަކަކީ ލާމަރުކަޒީ ނިޒާމު ހަރުދަނާކުރުމަށް ރައީސް މުއިއްޒު ވިދާޅުވި ފަދައިން ގެންނަންޖެހޭ އިސްލާހުތަކެއްކަމަށް ވިދާޅުވެ، ތާއީދުކުރައްވާފައެވެ. މިސާލެއްގެ ގޮތުން ލޯކަލް ކައުންސިލް އިންތިޚާބާ ދިމާކޮށް ސިޔާސީ ބޭނުމަށް ރަށްރަށުގެ ބިންތައް ދޫކޮށް، ގިނަ އަދަދަކަށް މުވައްޒަފުން ނެގުމުގެ ފުރުސަތު އޮވެގެން ނުވާނެ ކަމަށާއި މިއީ ނާޖާއިޒު ފައިދާއެއް ނެގުން ކަމަށް އޭނާ ވިދާޅުވި އެވެ. ގާސިމް ވިދާޅުވީ މި އިސްލާހުގެ ސަބަބުން ފައިދާވާނީ ސަރުކާރަށް ނޫންކަމަށާއި، ރައްޔިތުންނަށް ކަމަށެވެ.

ލާމަރުކަޒީ ގާނޫނަށް ގެނެވުނު މުހިންމު ބަދަލުތަކުގެ ތެރޭގައި ހިމެނެނީ:

ލޯކަލް އޮތޯރިޓީ ކުންފުނިތަކުން އެރަށެއްގައި އަމިއްލަ ފަރާތަކުން ކުރާ ވިޔަފާރީގެ މަސައްކަތްތައް ނުކުރެވޭނެ ގޮތަށް ގެނައި އިސްލާހު.
10 މިލިއަން ރުފިޔާއަށްވުރެ ދަށުގެ ވިޔަފާރި ލޯކަލް އޮތޯރިޓީ ކުންފުނިތަކުން ނުކުރެވޭނެ ގޮތަށް ގެނައި އިސްލާހު.
ފެނާއި ކަރަންޓު ފަދަ އަސާސީ ބޭނުންތަކަށް ދޫކުރާ ބިންތަކުން ކައުންސިލްތަކަށް ކުލި ނުނެގުން.
ކައުންސިލްތަކުން އާމްދަނީ ހޯދަން ކުރާ މަސައްކަތްތަކުން ސަރުކާރަށް ޓެކްސް ދެއްކުން.
ކައުންސިލްތަކުގެ ފަހު އަހަރުގައި މުވައްޒަފުން ނެގުމާއި ބިންތައް ދޫކުރުމުގައި ފިނޭންސް މިނިސްޓްރީ އާއި އެލްޖީއޭގެ ހުއްދަ ހޯދުން.

މި އިސްލާހުތަކާ ދެކޮޅަށް އިދިކޮޅު އެމްޑީޕީން ވަނީ އަޑުއުފުލާފަ އެވެ. އަދި މި އިސްލާހުތަކުގެ ސަބަބުން ކައުންސިލްތަކުގެ މާލީ ބާރުވެރިކަން ގެއްލޭ ކަމަށް ބުނެ ގިނަ އަދަދެއްގެ ކައުންސިލްތަކުން ބަޔާން ނެރެފައި ވެ އެވެ.