ވެލާނާ އެއަރޕޯޓުގެ ޓަރމިނަލް 1އިން ޚިދުމަތް ދިން ފުރަތަމަ ލަގްޒަރީ އެއަރލައިނަކަށް ބިއޯންޑް

Read Time:6 Minute, 47 Second

(ފޮޓޯ ކްރެޑިޓްސް: އެމްއޭސީއެލް)

ވެލާނާ އިންޓަނޭޝަނަލް އެއަރޕޯޓު، ވީއައިއޭގެ ޓަރމިނަލް 1އިން ލަގްޒަރީ އެއަރލައިން ބިއޯންޑަށް ޚިދުމަތް ދީފިއެވެ. ވީއައިއޭގެ ޕެސެންޖަރ ޓަރމިނަލް 1އިން މިހާރު ޚިދުމަތް ދެމުންދަނީ ޤައުމީ އެއަރލައިން މޯލްޑިވިއަން އާއިއެއަރ އަރަބިއާއަށެވެ. ދުނިޔޭގެ ފުރަތަމަ އޯލް ޕްރިމިއަމް ނުވަތަ މަތީ ފެންވަރުގެ ދަތުރުތަކަށް ޚާއްސަ އެއަރލައިން ބިއޯންޑަށް ވެލާނާ އިންޓަރނޭޝަނަލް އެއަރޕޯޓުގެ ޓަރމިނަލް 1އިން ޚިދުމަތް ދޭން ފެށުމަށް މިއަދު އެ ޓަރމިނަލުގައި ޚާއްސަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތު ޝަރަފުވެރި ކޮށްދެއްވީ މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ޕްރެޒިޑެންޝަލް އެފެއާޒް, ޢަލީ ޢާރިފްއެވެ.

މި ރަސްމިއްޔާތުގައި ބިއޯންޑްގެ ޗެކިން ކައުންޓަރުތައް ރަސްމީކޮށް ހުޅުވައި، ބިއޯންޑުން ފުރި 43 ފަސިންޖަރުންނަށް ވަނީ ހަދިޔާ ދީފައެވެ. އަދި ޓަރމިނަލް 1އަށް ކައިރި ކުރި ބިއޯންޑްގެ ފުރަތަމަ މަތިންދާ ބޯޓު، ބީ4091 އަށް ޚާއްސަ ވޯޓާ ސެލިއުޓެއް އަރުވައި، އެ ފްލައިޓުން ރާއްޖެ އައި 35 ފަސިންޖަރުންނަށް ވަނީ ސަގާފީ ހަރަކާތްތަކާއެކު ހޫނު މަރުހަބާއެއް ކިޔާފައެވެ.

މި ރަސްމިއްޔާތުގައި އެމްއޭސީއެލްގެ ބޯޑު މެންބަރުންނާއި، އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުޙައްމަދާއި މުހައްމަދު ލަމްޢާންގެ އިތުރުން ބިއޯންޑްގެ ޖެނެރަލް މެނޭޖަރު އިބްރާހިމް އަހުތަރު އަދި އެއަރލައިންގެ ސްޓޭޝަން މެނޭޖަރު ހުސެއިން ފަޔާޒު ބައިވެރިވެވަޑައިގެންނެވިއެވެ.

(ފޮޓޯ ކްރެޑިޓްސް: އެމްއޭސީއެލް)

ބިއޯންޑަކީ ރާއްޖޭގެ ސިމްޑީ ގުރޫޕާއި އޭވިއޭޝަން ދާއިރާގެ ތަޖުރިބާކާރުން އުފައްދާފައިވާ އިންވެސްޓްމަންޓް ކުންފުނި، އަރަބެކްސް ގުޅިގެން އުފައްދާފައިވާ ލަގްޒަރީ އެއަރލައިނެކެވެ. މި އެއަރލައިނަކީ ލަގްޒަރީ ޓޫރިޒަމް މާކެޓަށް އަމާޒުކޮށްގެން އެންމެ މަތީ ފަންތީގެ ވައިގެ ދަތުރުފަތުރުގެ ޚިދުމަތް ދިނުމުގެ މަގުސަދުގައި އުފައްދާފައިވާ އެއަރލައިނެކެވެ. ބިއޯންޑުގެ ބޯޓުތަކުގައި ބިޒްނަސް ކްލާސްގެ 44 ގޮނޑި ހުރެއެވެ. ވީއައިއޭގެ ޓަރމިނަލް 1 އެންމެ ފުރަތަމަ ބޭނުންކުރަން ފެށީ ޤައުމީ އެއަރލައިން މޯލްޑިވިއަންގެ ބައިނަލްއަޤުވާމީ ދަތުރުތަކަށެވެ. މޯލްޑިވިއަންގެ ފްލައިޓް ތަޖުރިބާއަށްފަހު، ޓަރމިނަލް ދެން ހުޅުވާލީ އެއަރ އަރަބިއާގެ ފްލައިޓްތަކަށެވެ. އެއީ މިމަހުގެ 13ވަނަ ދުވަހުއެެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލުން ވިދާޅުވީ، އެކުންފުނީގެ ސްޓޭކްހޯލްޑަރުންނާއި އެއަރލައިން ޕާޓްނަރުންނާއެކު ބޭއްވި ބައްދަލުވުމުގައި އެއަރ އަރަބިއާއާއި ބިއޯންޑް ހިމެނޭހެން އިތުރު 7 އެއަރލައިނެއްގެ އޮޕަރޭޝަންތައް ޓަރމިނަލް 1އަށް ބަދަލުކުރުމާ ގުޅޭ މަޝްވަރާތައް ކުރެވިފައިވާ ކަމަށެވެ.

މީގެ އިތުރުން، މި ބައްދަލުވުމުގައި އެއަރލައިންތަކަށް އައު ޓަރމިނަލަށް ބަދަލުވުމުގެ ޕްރޮސެސްއާއި އޮޕަރޭޝަންތައް ފުރިހަމައަށް ގެންދެވޭނެ ގޮތުގެ މައުލޫމާތު ދީފައިވާ ކަމަށްވެސް އެމްއޭސީއެލުން ވިދާޅުވިއެވެ. އެމްއޭސީއެލްއިން ހާމަކޮށްފައިވާ ގޮތުގައި ޓަރމިނަލް 1އަށް މިމަހުގެ ތެރޭގައި އިތުރު ހަތަރު އެއަރލައިނެއް ބަދަލުކުރެވޭނެއެވެ. ވެލާނާ އިންޓަރނޭޝަނަލް އެއަރޕޯޓުގެ ޓަރމިނަލް 1 ރަސްމީކޮށް ހުޅުއްވާ ދެއްވީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ.

ވެލާނާ އިންޓަރނޭޝަނަލް އެއަރޕޯޓުގެ ޓަރމިނަލް 1އަކީ ޒަމާނީ ގިނަ ޚިދުމަތްތަކާއެކު ތަރައްޤީކުރެވިފައިވާ ޓަރމިނަލެކެވެ. އެގޮތުން މި ޓަރމިލަނުގައި ޑިޕާޗަރ ހޯލުގައި 47 ޗެކިން ކައުންޓަރު ހުންނައިރު، އަމިއްލައަށް ޗެކިން ކުރެވޭ 6 ސެލްފް ސާވިސް ޗެކިން ކިއޮސްކްވެސް ވަނީ ބަހައްޓާފައެވެ. މީގެ އިތުރުން، މި ޓަރމިނަލުގައި 12 އެއިރޯ ބްރިޖްވެސް ވަނީ ޤާއިމްކޮށްފައެވެ.