ޔަމަނަށް ބޮންއަޅަން ބޭނުންކުރާ ހަނގުރާމަމަތީ މަތިންދާބޯޓެއް ރަތް ކަނޑަށް ވެއްޓިއްޖެ

Read Time:4 Minute, 59 Second

(ފޮޓޯ ކްރެޑިޓްސް: ރޮއިޓާރސް)

ޔަމަނުގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމަށްވާ ޙޫޘީންނަށް ޙަމަލާދިނުމުގައި އެމެރިކާއިން ބޭނުންކުރާ މަތިންދާބޯޓު އުފުލާ މަނަވަރުން، ހަނގުރާމަމަތީ މަތިންދާބޯޓެއް ކަހާލައިގެން ރަތްކަނޑަށް ވެއްޓިފައިވާ ކަމަށް އެމެރިކާގެ އަސްކަރިއްޔާއިން ބުނެފިއެވެ. އެމެރިކާގެ ކަނޑުގެ ސިފައިންގެ އޮފިޝަލަކު ވިދާޅުވި ގޮތުގައި، ޙޫޘީންގެ ޙަމަލާއަކުން ރެކެންވެގެން އެމެރިކާގެ މަތިންދާބޯޓު އުފުލާ މަނަވަރު، ޔޫއެސްއެސް ހެރީ އެސް ޓްރޫމަންގެ މިސްރާބު ކުއްލިއަކަށް އަނބުރައިލި ވަގުތު، އެ މަނަވަރު މަތިން ކަހާލައިގެން ހަނގުރާމަމަތީ މަތިންދާބޯޓެއް ކަހާލައިގެން ރަތް ކަނޑަށް ވަނީ ވެއްޓިފައެވެ.

އެ ހާދިސާ ހިނގީ، އެ މަތިންދާބޯޓު ކަފުޖަހައިގެން ހޭންގަރަށް ގެންދަނިކޮށް، މަނަވަރުގެ މިސްރާބު ކުއްލިއަކަށް އަނބުރާލުމުން، ކޮންޓްރޯލް ގެއްލިގެން ކަމަށް ވެސް ބުނެފައިވެއެވެ. މަތިންދާބޯޓު ކަފުޖަހައިގެން ގެންދިޔަ ޓްރެކްޓަރު ވެސް ވަނީ ކަނޑަށް ވެއްޓިފައެވެ. ރަތްކަނޑަށް ވެއްޓިފައިވަނީ، އެމެރިކާގެ އެފްއޭ 18 ސުޕަރ ހޯނެޓް ފައިޓަރ ޖެޓެކެވެ. އެ މަތިންދާބޯޓުގެ އަގު 60 މިލިއަން އެމެރިކާ ޑޮލަރަށް އަރައެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާކަމަށް އެ އޮފިޝަލް ވިދާޅުވިއެވެ.

ޔަހޫދީ އިސްތިޢުމާރީ ފައުޖުގެ ޢޫދުވާނީ ޙަމަލާތަކުން ފަލަސްޠީނުގެ ރައްޔިތުން ދިފާޢުކޮށްދިނުމަށް ހޫޘީން ދަނީ ޔަހޫދީ ދައުލަތަށް އަމާޒުކޮށް ތަކުރާރުކޮށް ޑްރޯންނާއި މިސައިލު ޙަމަލާތައް ދެމުންނެވެ. އޭގެ އިތުރުން ރަތް ކަނޑުން ދަތުރުކުރާ ޔަހޫދީންނާ ގުޅުން އޮންނަ އަދި ޔަހޫދީންގެ ރަށްތަކަށް ދަތުރުކުރަމުންދާ އާގުބޯޓުތަކަށް ޙޫޘީން ދަނީ ޙަމަލާ ދެމުންނެވެ. އެއީ, ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ދެކޮޅަށް އެ ޖަމާޢަތުން ފަށާފައިވާ ޙަރަކާތްތަކެކެވެ.

‎އެ ޙަމަލާތަކުގައި ޙޫޘީން ދަނީ އެންމެ ފަހުގެ ޒަމާނީ އަސްކަރީ ޑްރޯންތަކާއި ބެލިސްޓިކް މިސައިލް ފަދަ ނުރައްކާތެރި ހަތިޔާރުތައް ބޭނުން ކުރަމުންނެވެ. އެ ޖަމާޢަތުން ވަނީ ޢަދަން ކަނޑާއި, މެޑިޓެރޭނިޔަން ކަނޑުގެ އިތުރުން އިންޑިޔާ ކަނޑަށް ވެސް އަސްކަރީ ޙަރަކާތްތައް ފުޅާ ކޮށްފައެވެ. އެ ޙަމަލާތަކުގެ ސަބަބުން ބައިނަލްއަޤްވާމީ ވިޔަފާރި މަގުތަކަށް ބުރޫއަރައި, އެ މަގުތައް ބޭނުންކުރާ ވިޔަފާރިތަކަށް ވަނީ ޚަރަދު ބޮޑު އަދި ދިގު މަގުތަކުން ދަތުރުކުރުމަށް މަޖުބޫރު ވެފައެވެ. އޭގެ ނަތީޖާއެއްގެ ގޮތުން ދުނިޔޭގެ ބާޒާރުގައި ތަކެތީގެ އަގުތައް އުފުލެން ވަނީ ފަށައިފައެވެ. މި ސަބަބުތަކަށްޓަަކައި އެމެރިކާއާއި ޔަހޫދީ ދައުލަތުގެ ފަރާތުން ޔަމަނަށް އަމާޒު ވަމުންދާ ޙަމަލާތައް ވަނީ ގިނަ ވެފައެެވެ.