Read Time:8 Minute, 15 Second
(ފޮޓޯ ކްރެޑިޓްސް: ރައީސް އޮފީސް)
އެކި ދާއިރާތަކުން ކުރިއެރުންތައް ހޯދުމަށް އިސްލާމީ ޤައުމުތައް ގުޅިގެން މަސައްކަތް ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ. އެމަނިކުފާނު މިކަމަށް ގޮވާލެއްވީ އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާ، އައިއައިޔޫއެމް އިން އެމަނިކުފާނަށް އޮނަރަރީ ޑޮކްޓަރޭޓްގެ ޝަރަފު އެރުވުމަށް ބޭއްވި ރަސްމިއްޔާތުގައި ދެއްވި ތަޤުރީރުގައެވެ. އެމަނިކުފާނު ވަނީ އައިއައިޔޫއެމުން އެރުވި ޝަރަފަށް ޝުކުރު އަދާކުރައްވައި އެއީ ދެ ޤައުމު ގުޅިގެން އިސްލާމީ ހަޟާރަތް ކުރިއެރުވުމަށް ކުރަމުން އަންނަ މަސައްކަތްތަކުގެ ރަމްޒެއްކަމަށް ވިދާޅުވެފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ދުނިޔޭގެ ތާރީޚުގައި މުސްލިމް ސްކޯލަރުންނަކީ ފާހަގަކުރެވޭ އެތައް ކާމިޔާބީއެއް ހާސިލް ކުރައްވާފައިވާ ބައެއް ކަމަށާއި މިއަދު އެކި ދާއިރާތަކުން ދުނިޔެ ހޯދަމުންދާ ކުރިއެރުންތަކުގެ އަސްލަކީ އެ ބޭފުޅުން ކުރެއްވި މަސައްކަތްތައް ކަމަށެވެ. އަދި އިސްލާމްދީނަކީ ދިރިއުޅުމުގެ އަސާސް ކަމަށާއި އިސްލާމީ މުޖުތަމަޢުތަކުން އުނގެނުމަށް އިސްކަންދޭކަން ތާރީޚު ހެކި ދޭ ކަމަށް އެމަނިކުފާނު ވިދާޅުވިއެވެ.
(ފޮޓޯ ކްރެޑިޓްސް: ރައީސް އޮފީސް)
ރައީސް ވިދާޅުވީ ތާރީޚުން އެނގޭގޮތުގައި އިސްލާމީ މުޖުތަމަޢުތަކުން ތަޢުލީމު ކުރިއެރުވުމަށާއި ރައްޔިތުންގެ ދިރިއުޅުމުގެ ފެންވަރު ރަނގަޅު ކުރުމަށް އިންފްރާންސްޓްރަކްޗަރއަށް އިންވެސްޓް ކޮށްފައިވާ ކަމަށާއި މިއަދު އިސްލާމީ ޤައުމުތަކުން އެ މުޖުތަމައުތަކުން ކުރިއަށްދާންވީ އެ މުޖުތަމައުތަކުން ނަމޫނާ ނަގައިގެން ކަމަށެވެ. އަދި ކަނޑިއަށްވުރެ ގަލަމަކީ ބާރު ގަދަ އެއްޗެއްކަން ކާބަފައިން ގަބޫލުކުރި ކަމަށްވެސް ވިދާޅުވިއެވެ. އިސްލާމީ ހަޟާރާތް އިތުރަށް ކުރިއެރުވުމަށް ޒުވާނުންގެ ހިތްތަކުގައި ލޯބި ޖެއްސުމާއި އިސްލާމްދީނަކީ ހުރިހާ ޒަމާނަކަށްވެސް ފެތޭ ދީނެއްކަން ސާބިތުކޮށްދިނުމާއި އިސްލާމީ ޤައުމުތަކުގެ ގުޅުން ބަދަހިކުރުން މުހިންމުކަމަށް ރައީސް ވިދާޅުވިއެވެ.
އެގޮތުން، ދުނިޔޭގެ ފެންވަރުގެ ޔުނިވަރސިޓީތަކާއި ރިސަރޗް ސެންޓަރުތަކާއި ޑިޖިޓަލް ޕްލެޓްފޯމްތަކަށް އިންވެސްޓް ކުރަންޖެހޭ ކަމަށާއި މިހާރުވެސް ދުނިޔޭގައި ކެންސަރ ރިސަރޗާއި އޭއައި އާއި ކްލައިމެޓް ޓެކްނޮލޮޖީގައި ކުރިއެރުންތައް ހޯދަމުންދާ މުސްލިމުންގެ ވާހަކަތައް ކިޔައިދީ އެއީ ނަމޫނާތަކުގެ ގޮތުގައި ދަރިންނަށް ދައްކަންޖެހޭ ކަމަށް ވިދާޅުވިއެވެ.
ރައީސް ވިދާޅުވީ އުނގެނުމުގައި އިސްލާމް ދީނުގައި ހައްދެއް ކަނޑައަޅާފައިނުވާ ކަމަށާއި ސައިންސާއި ދީނާ ނުގުޅޭކަމަށް ދެކެވޭ ވާހަކަތައް ދޮގުކުރަންޖެހޭ ކަމަށެވެ. އަދި މުސްލިމް މުޖުތަމަޢުތަކުން ކުރިއަށްދާންވީ ދެ ކަމަކީވެސް އެކުގައި ކުރިއަރައިގެން ދެވޭނެ ކަންކަން ސާބިތުކޮށްދެމުންކަމަށް ރައީސް ވިދާޅުވިއެވެ.
(ފޮޓޯ ކްރެޑިޓްސް: ރައީސް އޮފީސް)
އިސްލާމީ އުއްމަތް އެކި ކަންކަމުގެ ސަބަބުން މިއަދު ބައިބައިވެފައިވާކަން ފާހަގަކުރައްވައި ރައީސް ވިދާޅުވީ އިސްލާމީ ޤައުމުތަކުގެ ގުޅުން ބަދަހިކުރަންޖެހޭ ކަމަށެވެ. އެގޮތުން، އެކި ދާރިއާތަކުން ގުޅިގެން މަސައްކަތް ކުރަން އޯއައިސީ ފަދަ ބައިނަލްއަގުވާމީ ޖަމާއަތްތަކުން އިސްނަގައިގެން މަސައްކަތް ކުރަންޖެހޭ ކަމަށާއި އައިއައިޔޫއެމް ފަދަ ޔުނިވަރސިޓީތައް ކުރިއަރުވައި ދީންވެރި އަދި ތައުލީމީ ބޭފުޅުން އުފައްދާ ތަންތަން ކުރިއަރުވަން މަސައްކަތް ކުރަންޖެހޭ ކަމަށްވެސް ރައީސް ވިދާޅުވިއެވެ.
ފިކުރީ ޚިޔާލުތަކަށް އައި ދިރުމެއް ގެނައުމުގެ ވާހަކަތައް ދައްކާއިރު ފަލަސްތީނުގެ މުސްލިމް އަޚުންނާއި އުޚުތުންގެ ކެކުޅުންތަކުގެ ވާހަކަތައް ދައްކަންޖެހޭކަން ފާހަގަކުރައްވައި ރައީސް ވަނީ ޔަހޫދީ ދައުލަތުން އެ ޤައުމުގެ ރައްޔިތުންނާ ދެކޮޅަށް ހިންގާ ލާއިންސާނީ އަމަލުތައް ކުށްވެރިކުރައްވާފައެވެ. އަދި ކޮންމެ މުސްލިމް ކުއްޖަކަށްވެސް އުނގެނުމުގެ ފުރުސަތު ލިބޭނެ މުޖުތަމައުތައް ބިނާ ކުރަންޖެހޭ ކަމަށާއި އިސްލާމްދީނަކީ ހަމަޖެހުމަށް ލޯބި ކުރާ ތަޢުލީމަށް އިސްކަންދޭ ދީނެއްކަން އަޅުގަނޑުމެން ސާބިތުކޮށްދޭންޖެހޭ ކަމަށްވެސް އެމަނިކުފާނުވިދާޅުވިއެވެ.
މެޑިސިން އާއި ކްލީން އެނަރޖީ އަދި ކުއަންޓަމް ކޮމްޕިއުޓިންގެ ދާއިރާއިން ދެން ހޯދާ އެންމެ ބޮޑު އީޖާދީ ކުރިއެރުން އިސްލާމީ ޤައުމަކުން ހޯދުމަކީ މުހިންމު ކަމެއް ކަމަށް ރައީސް ވިދާޅުވިއެވެ. މިކަން ހާސިލް ކުރުމަށް ބޭނުންވަނީ ޤައުމުތައް ގުޅިގެން މަސައްކަތް ކުރުން ކަމަށްވެސް އެމަނިކުފާނު ވިދާޅުވިއެވެ.
Happy
0 %
Sad
0 %
Excited
100 %
Sleepy
0 %
Angry
0 %
Surprise
0 %
0
0