ސަރުކާރުގެ އެހީއާއެކު ބޭސްފަރުވާއަށް ޔުމްނު މެލޭޝިއާއަށް ގެންދަނީ

Read Time:3 Minute, 18 Second

މާލޭގެ އިމާރާތެއްގެ މަތިން ވެއްޓުނު ހައްވާ ޔުމްނު ރަޝީދު މެލޭޝިއާއަށް ފުރުވާލުމުގެ ހުރިހާ ކަމެއް ސަރުކާރުން ހަމަޖައްސައިދީފިއެވެ. ޔުމްނުގެ އާއިލާގެ ފަރާތުން ބައެއް މީޑިއާތަކަށް މައުލޫމާތު ދީފައި ވަނީ އެންސްޕާގެ ދަށުން ބޭސް ފަރުވާއަށް ދިޔުމުގެ ކަންކަން ސަރުކާރުގެ އެހީއާއެކު ނިމިފައިވާކަމަށެވެ. އޭގެ އިތުރުން، އޭނާ މެލޭޝިއާއަށް ފޮނުވާލުމަށް ފްލައިޓެއްގެ ހަމަޖެއްސުމުގެ މަސައްކަތް ވެސް ސަރުކާރުގެ އެހީއާއެކު ދަނީ ކުރަމުންނެވެ. އަދި ސަރުކާރުގެ ފަރާތުން އެހީތެރިކަން ލިބެމުންދާ ކަމަށް ބުނެފައިވެއެވެ.

ޔުމްނު ވެއްޓުނު ރޭ އޭނާއާއެކު އުޅުނީ ކ.މާލެ، ގ. އެރިޔަދޫ ރައުދު އަހުމަދު ޒިލާލްއެވެ. ފުލުހުން ކުރާ ތަހުގީގާ ގުޅިގެން ރައުދު އިއްޔެ ވަނީ ހައްޔަރުކޮށްފައެވެ. ކޯޓު އަމުރެއްގެ ދަށުން ރައުދު ހައްޔަރުކުރި އިރު، ޔުމްނު ވެއްޓުމުގައި ރައުދުގެ ބައިވެރިވުން އޮތް ކަމަށް ފުލުހުން މިހާރު ތުހުމަތު ކުރެއެވެ. ފުލުހުން ކޯޓު އަމުރަކަށް އެދުނު ތިން ސަބަބުގެ ތެރޭގައި ޔުމްނު ވެއްޓުމުގައި ރައުދުގެ ބައިވެރިވުން އޮތުމާއި ޖިންސީ ބޭނުންހިފުމުގެ ކުށަށް އަރައިގަތް ކަމަށް ތުހުމަތު ކުރެވުމާއި މަސްތުގެ ހާލަތުގައި ހުރުން ހިމެނެއެވެ.

އެ މައްސަލާގެ ބައިވެރިވި ކަމަށް ތުހުމަތުވާ ރައުދު އަހުމަދު ޒިލާލްގެ ބޭބެ ކަމަށްވާ ރައީސް އޮފީހުގެ އަންޑާ ސެކްރެޓެރީ ފޯ ޑިޖިޓަލް ސްޓްރެޓެޖީ ދާއޫދު އަހުމަދު ވަނީ މުސާރަ ނުލިބޭ ގޮތަށް ސަސްޕެންޑުކޮށްފައެވެ. އަދި މި އެންމެންގެ ޕާސްޕޯޓް ވަނީ ހިފަހައްޓައިފައެވެ. މި މައްސަލައާ ގުޅިގެން މއ. މާންދޫގެދެކުނުގެ ޓެރެސް އާއި އެ ގޭގެ ދެވަނަ އަދި ހަތަރުވަނަ ބުރި އާއި ގ. ކަށިވެލީގެ ތިންވަނަ ބުރި ވެސް ފުލުހުން ވަނީ ބަލައި ފާސްކޮށްފައެވެ. ކަށިވެލި ގެ ހުންނަނީ ފެންޓޯނިއާ ގެއާ ފުދޭ ވަރަކަށް ކައިރީގައެވެ.