ޔުމްނުއާއި ރައުދުއާ ދެމެދު ހަމަނުޖެހުމެއް ހިނގި، ކޮބާތޯ އެހުމުން ވެއްޓުނީ ކަމަށް ބެލެވޭ ކަމަށް ބުނި: ފުލުހުން

Read Time:4 Minute, 43 Second

އިމާރާތެއްގެ މަތިން ވެއްޓުނު ހައްވާ ޔުމްނު އާއި ރައުދު އަހުމަދު ޒިލާލްއާ ދެމެދު ހާދިސާ ހިނގި ރޭ ހަމަނުޖެހުންތަކެއް ހިނގި ކަމަށާއި، ހާދިސާ ހިނގި ފަހުން ޔުމްނު ކޮބާތޯ އެހުމުން ވެއްޓުނީ ކަމަށް ބެލެވޭ ކަމަށް ބުނި ކަމަށް ކްރިމިނަލް ކޯޓުގައި ފުލުހުން ވިދާޅުވެއްޖެއެވެ. ކޯޓު އަމުރެއްގެ ދަށުން ރައުދު ހައްޔަރުކޮށް ކްރިމިނަލް ކޯޓަށް ހާޒިރުކުރުމުން ކޯޓުން މިއަދު ވަނީ އޭނާ ފަސް ދުވަހަށް ބަންދުކޮށްފައެވެ. އެ ބަންދު އަމުރު މިހާރު ކްރިމިނަލް ކޯޓުން ވަނީ އާންމުކޮށްފައެވެ.

ކޯޓު އަމުރުގައިވާ ގޮތުން ފުލުހުންގެ އައިއޯ ވަނީ އެ ރޭ ޔުމްނު އާއި ރައުދުއާ ދެމެދު ހަމަނުޖެހުންތަކެއް ހިނގި ކަމަށް ކޯޓުގައި ވިދާޅުވެފައެވެ. ނަމަވެސް، އެކަމުގެ ތަފްސީލުތަކެއް އަމުރުގައި ނެތެވެ. އޭގެ އިތުރުން، ހާދިސާ ހިނގިތާ މާ ގިނަ އިރުތަކެއް ނުވަނީސް ޔުމްނު ކޮބާތޯ ރައުދު ގާތުގައި ސުވާލުކުރުމުން، ނޭނގޭ ކަމަށާއި “ވެއްޓުނީ ކަމަށް ބެލެވޭ ކަމަށް” އޭނާ ބުނެފައިވާ ކަމުގެ މައުލޫމާތު ލިބިފައިވާ ކަމަށް އައިއޯ ވިދާޅުވިއެވެ. ނަމަވެސް އޭނާ އެހެން ބުނީ ކާކު ގާތުގައި ކަމެއް އަމުރުން އެނގޭކަށް ނެތެވެ.

ރައުދު ޔުމްނު ހޯދަން މަސައްކަތް ކުރާ މަންޒަރު ސީސީޓީވީ ފޫޓޭޖުން ފެންނަ ނަމަވެސް އޭނާ ކަމާ ބެހޭ އެއްވެސް ފަރާތަކަށް ރިޕޯޓުކޮށްފައިނުވާކަން ވެސް އައިއޯ ފާހަގަކުރެއްވިއެވެ. އަދި އޭނާގެ ކުޑަކަމުދާތަކެތި ކެނަބިސްއަށް ފައްސިވިކަން ވެސް ފާހަގަކުރެއްވިއެވެ. ރައުދުގެ ވަކީލު ބުނެފައިވަނީ ޔުމްނު ވެއްޓުމާ ރައުދުއާ ގުޅުމެއް ނެތް ކަމަށް ފުލުހުން ކުރިން ވިދާޅުވެފައިވާ ކަމަށެވެ. އޭގެ އިތުރުން ފުލުހުން އަމަލުކުރި ގޮތުން ރައުދުއާ ބައްދަލުކުރަން އެކަށީގެންވާ ވަގުތު ނުލިބޭ ކަމަށް ވެސް ވަކީލު ވިދާޅުވެފައިވެއެވެ. ކޯޓު އަމުރުގައިވާ ގޮތުން ބަންދަށް ކުރު މުއްދަތެއް ދީފައިވަނީ އެކަމަށް ރިއާއަތްކޮށެވެ.

ކޯޓު އަމުރެއްގެ ދަށުން ރައުދު ހައްޔަރުކުރި އިރު، ޔުމްނު ވެއްޓުމުގައި ރައުދުގެ ބައިވެރިވުން އޮތް ކަމަށް ފުލުހުން ތުހުމަތުކުރެއެވެ. ފުލުހުން ކޯޓު އަމުރަކަށް އެދުނު ތިން ސަބަބުގެ ތެރޭގައި ޔުމްނު ވެއްޓުމުގައި ރައުދުގެ ބައިވެރިވުން އޮތުމާއި ޖިންސީ ބޭނުންހިފުމުގެ ކުށަށް އަރައިގަތް ކަމަށް ތުހުމަތު ކުރެވުމާއި މަސްތުގެ ހާލަތުގައި ހުރުން ހިމެނެއެވެ. ނުވަ ވަނަ ފަންގިފިލާއިން ވެއްޓި ޔުމްނުއަށް ބޮޑެތި އަނިޔާތަކެއް ލިބިފައިވާއިރު، ސަރުކާރުގެ އެހީތެރިކަމާއެކު އޭނާ މެލޭޝިއާއަށް ފޮނުވާލުމަށް ދަނީ ތައްޔާރުވަމުންނެވެ. އެގޮތުން އެންސްޕާގެ އެހީ ހަމަޖެހިފައިވާއިރު، ފްލައިޓެއް ޗާޓަރު ކުރުމުގެ މަސައްކަތް ދަނީ ކުރަމުންނެވެ.