ލިވަޕޫލްގެ ޕާޓްނަރެއްގެ ގޮތުގައި ރާއްޖެ ހަމަޖެހިގެންދިޔުމަކީ ލިބިވަޑައިގެންނެވި ބޮޑު ޝަރަފަކާއި އުފަލެއް: ރައީސް މައުމޫން

Read Time:3 Minute, 49 Second

(ފޮޓޯ ކްރެޑިޓްސް: މިހާރު)

އިނގިރޭސި ކުލަބު ލިވަޕޫލްގެ އޮފިޝަލް ޓޫރިސްޓް ޑެސްޓިނޭޝަން ޕާޓްނަރުގެ ގޮތުގައި ދިވެހިރާއްޖެ ހަމަޖެހިގެންދިޔުމަކީ ލިބިވަޑައިގެންނެވި ބޮޑު ޝަރަފަކާއި އުފަލެއް ކަމަށް ލިވަޕޫލްގެ ރާއްޖޭގެ އެއް ނަންބަރު ސަޕޯޓަރު ރައީސް އަލްއުސްތާޛް މައުމޫން ޢަބްދުލްޤައްޔޫމް ވިދާޅުވެއްޖެއެވެ. އެކްސްގައި ކުރެއްވި ޓުވީޓެއްގައި ރައީސް މައުމޫން ވިދާޅުވީ މިރޭ ލިވަޕޫލްގެ ދަނޑު އެންފީލްޑްގައި ވިޒިޓް މޯލްޑިވްސް ލޯންޗުކުރެވިގެންދާތީ އެ ކަމަށް ރާއްޖޭގެ ރައީސުލްޖުމްހޫރިއްޔާއަށް ޝުކުރުއަދާކުރައްވާކަމަށެވެ. ރައީސް މައުމޫންއަކީ 1970 ވަނަ އަހަރުން ފެށިގެން އިނގިރޭސި ކުލަބު ލިވަޕޫލަށް ސަޕޯޓުކުރައްވަމުން އަންނަ ބޭފުޅެކެވެ. އަދި ސަޕޯޓަރުންގެ ގުރޫޕުން މާލޭގައި ރަވާހިންގާ ބައެއް ހަރަކާތްތަކުގައި މީގެ ކުރިން އަމަލީ ގޮތުން އެމަނިކުފާނު ވަނީ ބައިވެރިވަޑައިގެންފައެވެ.

އިނގިރޭސިވިލާތުގެ ލިވަޕޫލް އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އާ ގުޅިގެން، ދިވެހިރާއްޖޭގެ ފަތުރުވެރިކަން އިސްތިހާރު ކުރުމަށް ކުރިއަށްގެންދާ ކޯ-ބްރޭންޑް ކެމްޕޭން ހަރަކާތް ފެށުމުގައި ބައިވެރިވެވަޑައިގަތުމަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އިނގިރޭސިވިލާތުގެ ލިވަޕޫލް ސިޓީއަށް ވަޑައިގެންފައެވެ. މި މަސައްކަތް އިތުރަށް ހަރުދަނާ ކުރެއްވުމަށް، އެލްއެފްސީ ޕާޓްނަރޝިޕްގެ ދަށުން، ވިޒިޓް މޯލްޑިވްސްއިން ވަނީ، މާރިޗު 27 ވަނަ ދުވަހު، އިނގިރޭސިވިލާތުގައި އައުޓްޑޯ ކެމްޕެއިނެއް ފައްޓަވާފައެވެ. ތިން މަސް ދުވަހުގެ މުއްދަތަށް މި ހަރަކާތް ކުރިއަށްދާއިރު، އިނގިރޭސިވިލާތުގެ މުހިންމު ތަންތަނުގައި ހައި އިމްޕެކްޓް އައުޓްޑޯ އަދި ޑިޖިޓަލް އިޝްތިހާރުތައް ބޭނުންކުރެވޭނެއެވެ.

މި ކެމްޕެއިނަށް ޚާއްޞަކޮށް ބްރޭންޑްކުރެވިފައިވާ 100 އަށް ވުރެ ގިނަ ޓެކްސީގެ އިތުރުން ބަސްތަކާއި، ލަންޑަން އަންޑަގްރައުންޑާއި ބޮޑެތި އެއާޕޯޓުތަކާއި ބިޒްނަސް ކްލާސް ލައުންޖްތަކުގައި ދިވެހިރާއްޖޭގެ ފަތުރުވެރިކަން އިޝްތިހާރު ކުރެވޭނެއެވެ.