Read Time:7 Minute, 14 Second
(ފޮޓޯ ކްރެޑިޓްސް: ރައީސް އޮފީސް)
ތަރައްޤީގެ މަޝްރޫޢުތަކުގެ ތެރޭގައި، ދުޅަހެޔޮ ދިރިއުޅުމަކަށް މަގުފަހިކުރާނެ މަޝްރޫޢުތަކަށް ޚާއްޞަ ސަމާލުކަމެއް ދެއްވާނޭކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. ރައީސުލްޖުމްހޫރިއްޔާ މި ޔަޤީންކަން ދެއްވާފައި ވަނީ، ރައްޔިތުންނާ ވީހާވެސް ގާތުން މަޢުލޫމާތު ޙިއްޞާކުރައްވައި، ރައްޔިތުންގެ ޚިޔާލުތަކާއި ކަންބޮޑުވުންތައް އަޑުއައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދަވާ “ރައްޔިތުންނާ އެކު” ސިލްސިލާ ޕޮޑްކާސްޓްގެ 2 ވަނަ އެޕިސޯޑްގައި ވާހަކަފުޅުދައްކަވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ރަށްރަށުގައި ބިންހިއްކުމާއި އެފަދަ ތަރައްޤީގެ މަޝްރޫޢުތައް މިހާތަނަށް ހިންގާފައިވާއިރު، ރަށުގައި ޤުދުރަތީ ގޮތުން އުފެދިފައިވާ މޫދާއި ގޮނޑުދޮށަށް ބަދަލުއައިސް، ރަށުގެ ރައްޔިތުންނަށް އެކަންކަން ގެއްލިފައިވާކަމުގެ ޝަކުވާ، ރައްޔިތުން، ޚާއްޞަކޮށް އިސްރަށްވެހިން ކުރައްވާފައިވާކަމަށެވެ. އެހެންކަމުން ސަރުކާރުން މިހާރު ހިންގަމުންދާ މަޝްރޫޢުތައް ކުރިއަށްގެންދަވާނީ މޫދަށް އެރުމަށް ޚާއްޞަކުރެވޭ ސަރަހައްދުތަކެއް ހިމަނައިގެން ކަމުގައި އެމަނިކުފާނު ވިދާޅުވިއެވެ. މިއަންނަ އަހަރުގެ ނިޔަލަށް މީހުން ދިރިއުޅޭ ކޮންމެ ރަށެއްގައި އައުޓްޑޯ ޖިމަކާއި ކުޑަކުދިންގެ ޕާކެއް ތަރައްޤީ ކުރައްވާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. މީގެ ސަބަބުން، ރައްޔިތުންގެ ޖިސްމާނީ، އަދި ނަފްސާނީ ޙާލަތު ރަނގަޅުވެ، ޢާއިލީ ގުޅުންތައް ހަރުދަނާވެގެންދާނޭ ކަމަށްވެސް އެމަނިކުފާނު ވިދާޅުވިއެވެ.
(ފޮޓޯ ކްރެޑިޓްސް: ރައީސް އޮފީސް)
އެކަމަށްޓަކައި، މީހުން ދިރިއުޅޭ ކޮންމެ ރަށެއްގައި ޕާކުތައް އެޅުމުގެ އިތުރުން، މާލޭގެ ހަލާކުވެފައިވާ ޕާކުތައް މަރާމާތުކުރުމުގެ މަސައްކަތް ކުރިއަށް ގެންދެވޭނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. މީގެ ތެރޭގައި، ސަލްޓަން ޕާކު މަރާމާތުކޮށް، އިތުރަށް ތަރައްޤީކޮށް، އެ ޕާކަކީ “އެޑްވެންޗެރަސް” އަދި އާންމުންނަށް ފަސޭހައިން ހަރަކާތްތެރިވެ އުޅެވޭނެ ތަނެއްގެ ގޮތުގައި ހެދުމަށް ނިންމާފައިވާ ކަމުގައި ރައީސުލްޖުމްހޫރިއްޔާ ވިދާޅުވިއެވެ.
“އައުޓްޑޯ ޖިމް ހަދައިދިނުން. ކޮންމެ ރަށެއްގައި އިރާދަކުރެއްވިއްޔާ ހުޅުވޭނެ، މި އަންނަ އަހަރުގެ ނިޔަލަށް އިނގޭތޯ. ރިޔާސީ ބަޔާނުގައިވެސް އަޅުގަނޑު ދެންނެވިން، މި އަހަރާއި މި އަންނަ އަހަރުގެ ތެރޭގައި ހުރިހާ ރަށެއްގައި އައުޓްޑޯ ޖިމް ބަހައްޓާނަމޭ. އެއީ، ވަރަށް މުހިންމު ކަމެއް، ކަސްރަތު ކުރުމަކީ ދޮގެއްތޯ. ދެން ކުޑަކުދިންގެ ޕާކުތައް މި ހަދަނީ. އެއީވެސް ޙަޤީޤަތުގައި ބަލިތަކުން ދުރުކުރުވުމަށް ވަރަށް މުހިންމު ކަމެއް. ގޭތެރޭގައި ބަންދުވެފައި މިހެން ތިބުމުގެ ބަދަލުގައި ކުދިންނެރެ، ޢާއިލާއާ އެކީގައި ގޮސްފައި، ތަންކޮޅެއް ހިތްހަމަޖެހޭ ތަނެއްގައި ވަގުތުކޮޅެއް ހޭދަކޮށްލުން، ހަރަކާތްތެރިވެލުން.” ރައީސް ޑރ. މުޢިއްޒު ވިދާޅުވިއެވެ. ވަށައިޖެހޭ ޞިއްޙީ ޚިދުމަތުގެ ސިޔާސަތެއްގެ ދަށުން ރާއްޖޭގެ ޞިއްޙީ ޚިދުމަތް ރަނގަޅުކުރުމުގެ މަސައްކަތް ސަރުކާރުން ކުރައްވަމުން ގެންދަވާއިރު، ރައްޔިތުންގެ ދުޅަހެޔޮ ކަމަށް ޚާއްޞަ އިސްކަމެއް ސަރުކާރުން ދެއްވާނޭކަމުގެ ޔަޤީންކަން އެމަނިކުފާނު ދެއްވިއެވެ.
ރައްޔިތުންގެ އަޑުއައްސަވައި، ރައްޔިތުންނާ ގާތުން، ރައްޔިތުންގެ މަޝްވަރާއާއެކު ސަރުކާރު ހިންގެވުމަކީ، ރައީސުލްޖުމްހޫރިއްޔާ އެންމެ އިސްކަންދެއްވާ އެއް ސިޔާސަތެވެ. އެގޮތުން “ރައްޔިތުންގެ އަޑު” ޕޯޓަލް އާއި “އަހާ ފޯރަމް” ފަދަ މަންސަތަކުގެ އިތުރުން، ރާއްޖޭގައި މީހުން ދިރިއުޅޭ ރަށްރަށަށް ޒިޔާރަތްކުރައްވައި، ސީދާ ރައްޔިތުންނާއި ރައްޔިތުންގެ މަންދޫބުންނާ ބައްދަލުކުރައްވައިގެން ރައްޔިތުންގެ އަޑުއައްސަވައި، ހާލުބައްލަވައި، ކަންކަން ހައްލުކޮށްދެވޭނޭ ފަދައިން ސިޔާސަތުތައް ބައްޓަންކުރެއްވުމަށް އެމަނިކުފާނު ގެންދަވަނީ މަސައްކަތްޕުޅު ކުރައްވަމުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0