ޝަރީއަތާ އެއްގޮތަށް ސްޓޫޑެންޓް ލޯނުތައް ދޫކުރުމަށް ނިންމުމަކީ ހެޔޮ ނިންމެވުމެއް: ޑރ. ޝަހީމް

Read Time:4 Minute, 7 Second

(ފޮޓޯ ކްރެޑިޓްސް: އިސްލާމިކް މިނިސްޓްރީ)

ޝަރީއަތާ އެއްގޮތަށް ސްޓޫޑެންޓް ލޯނުތައް ދޫކުރުމަށް ނިންމުމަކީ ހެޔޮ ނިންމެވުމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ. މިނިސްޓަރު “އެކްސް” ގައި ކުރެއްވި ޕޯސްޓެއްގައި ވިދާޅުވީ، ދަރިވަރުންގެ ތައުލީމަށް ސަރުކާރުން ދޫކުރާ ލޯން އިސްލާމީ ޝަރީއާ އެއްގޮތަށް ދޫކުރަން ރައީސް ޑރ މުއިއްޒު ނިންމެވި ތާރީޚީ ނިންމެވުމަށްޓަކައި ރައީސަށް ޝުކުރު ދަންނަވަންވާ ކަމަށެވެ. އަދި ޒަމާންތަކެއް ވަންދެން ޙައްލުނުވެ އޮތް މި މައްސަލައަށް ޙައްލެއް ލިބިގެން ދިޔަކަމީ ވަރަށް ހެޔޮ ނިންމެވުމެއް ކަމަށް ވެސް މިނިސްޓަރު ވިދާޅުވިއެވެ.

އިސްލާމީ ޝަރީއަތާ އެއްގޮތަށް ސްޓޫޑެންޓް ލޯނުތައް ދޫކޮށް، ދައްކަން ޖެހޭ މިންވަރު ކުޑަކުރަން ރައީސް ޑރ. މުހައްމަދު މުއިއްޒު ވަނީ ނިންމަވާފައެވެ. ރައީސް ރޭ އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެއާއި ރާއްޖެއިން ބޭރުގައި މަތީ ތަޢުލީމާއި ތަމްރީން ހޯދަން ދޫކުރާ އަދި ދޫކޮށްފައިވާ ލޯނުތަކަކީ، އިސްލާމީ ހަމަތަކަށް ފެތޭ، “ޝަރީޢާ ކޮމްޕްލަޔަންޓް” ލޯނުތަކަކަށް ހެދުމަށް ބައެއް ފިޔަވަޅުތައް ތަންފީޒު ކުރުމަށް ކަމާބެހޭ ފަރާތްތަކަށް މިއަދު އަންގަވާފައިވާ ކަމަށެވެ.

އެގޮތުން، ރާއްޖެއާ ރާއްޖޭން ބޭރުން ތަޢުލީމާއި ތަމްރީނު ހޯދުމަށް މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓުން ދޫކުރާ ލޯނު ޝަރީޢާ ކޮމްޕްލަޔަންޓް ލޯނެއްގެ ގޮތުގައި ހަމަޖެއްސުމުގެ ގޮތުން ލޯނާއެކު ހިމެނިފައިވާ %1 އެޑްމިނިސްޓްރޭޓިވް ފީގެ ގޮތުގައި ނަގަމުންދާ އަދަދު އެއްކޮށް އުނިކުރަން އެންގެވިއެވެ. އަދި، ލޯނުގެ ގޮތުގައި ދޫކުރާ ފައިސާގެ އިތުރުން އެއްވެސް މިންވަރެއް އިތުރަށް ނުނަގަން އެންގެވިއެވެ. އޭގެ އިތުރުން، ކުރިން ލޯނު ނަގައިފައިވާ ފަރާތްތަކުން ދައްކަން ހުންނަ ފައިސާއިން ވެސް، އެޑްމިނިސްޓްރޭޓިވް ފީ އުނިކޮށް އެ ދަރިވަރުންގެ ލޯނު އަދަދުތައް އަލުން ބަދަލުކުރަން ރައީސް ވަނީ އަންގަވައިފައެވެ.

ސަރުކާރުން ދޫކުރާ ސްޓޫޑެންޓް ލޯން މިދިޔަ އަހަރު 1،015 ދަރިވަރަަކު ހޮވިފައިވެއެވެ. މިދިޔަ އަހަރު 500 ލޯނު ދޫކުރަން ނިންމި ނަމަވެސް ރައީސް ވަނީ ޝަރުތުހަމަވި އެންމެނަށް ލޯނު ދޫކުރަން ނިންމަވައިފައެވެ.