އީދުގައި ދިއްލުންތައް ދިއްލަނީ ކުދިންނަށް އުފާވެރިކަން ގެނެސްދީ ދީނަށް ލޯބިޖެއްސުމަށް:ރައީސް

Read Time:4 Minute, 13 Second

(ފޮޓޯ ކްރެޑިޓްސް: ރައީސް އޮފީސް)

މި ސަރުކާރުން އީދާއި ދިމާކޮށް މަގުތައް ލައިޓްތަކުން ޖަރީކޮށް ދިއްލުންތައް ދިއްލަނީ ހާއްސަކޮށް ކުޑަކުދިންނަށް އުފާވެރިކަން ގެނެސްދީ ދީނަށް ލޯބި ޖެއްސުމަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ފޮޑްކާސްޓުގައި ރައީސް ވިދާޅުވީ ރޯދަ މަސް ނިމުމަށް ފަހުގައި އަންނަނީ އީދު ކަމަށާއި އިސްލާމްދީނުގައި މުސްލިމުންނަށް މުނާސަބަތެއްގެ ގޮތުގައި އުފާ ފާޅު ކުރުން އޮންނަނީ ދެ ދުވަހެއްގައި ކަމަށް ބަޔާންކޮށްފައިވާ ކަމަށެވެ. އެއީ ދެ އީދު ކަމަށް ވިދާޅުވިއެވެ.

(ފޮޓޯ ކްރެޑިޓްސް: ރައީސް އޮފީސް)

“100 އިންސައްތަ އިސްލާމީ ގައުމެއްގައި ދެ އީދުގައި ސަރުކާރުން އިސްނަގައިގެން އުފާ ފާޅުކުރުމުގެ އެންމެ ފުރިހަމަ ފުރުސަތު ދޭން ޖެހޭނެ ކަމަށް އަޅުގަނޑު ގަބޫލް ކުރަނީ. އީދުގެ ދިއްލުންތައް ދިއްލައި އުފާފާޅުކޮށް. ހާއްސަކޮށް ކުޑަކުދިންނަށް އިސްލާމް ދީނުގެ ލޯބި ޖެއްސުމަށްޓަކައި މިކަން ކުރަނީ. އެންމެ ފުރަތަމަ އަޅުގަނޑު މިކަން ފެށީ މާލޭގައި. މިކަން މުޅި ރާއްޖެއަށް ފުލާކުރުމަކީ އަޅުގަނޑުގެ ވައުދެއް އެގޮތުން ފުރަތަމަ އަހަރު ވެރިކަން ކުރާ ރަށްތަކުގައި މި އަހަރު އިތުރު ރަށްތަކުގައި މި ހަރަކާތް ކުރިއަށް ގެންދާނެ. އޭގެ މަގްސަދަކީ ހާއްސަކޮށް ކުޑަކުދިން ދީނަށް ލޯބި ޖެއްސުން.”، ރައީސް ވިދާޅުވިއެވެ. ދީނުގެ އެފަދަ މުހިންމު މުނާސަބަތުތައް ފާހަގަކުރަނީ ހާއްސަކޮށް ކުޑަކުދިންނާއި ރައްޔިތުން ދީނާ ލޯބިޖައްސައި އިސްލާމް ދިނުގައިވާ ގޮތަށް މުނާސަބަތުތައް ފާހަގަ ކުރުމުގެ ފުރުސަތު ދިނުމަށް ކަމަށް ރައީސް ވިދާޅުވިއެވެ.

އީދަށް ދިއްލުމުގެ ހަރަކާތަކީ ރައީސް ޑރ. މުހައްމަދު މުއިއްޒު މާލޭގެ މޭޔަރު ކަމުގައި ހުންނެވިއިރު ފެއްޓެވި ހަރަކާތެކެވެ. މުޅި ރާއްޖެ ދިއްލުމުގެ ހަރަކާތް ފެށުނީ އެ މަނިކުފާނުގެ ވެރިކަމުގެ ޒައާމަތުގައި މިދިޔަ އަހަރުގައެވެ.

މިދިޔަ އަހަރު ދިއްލި ރަށްތަކާއި، ސިޓީތަކުގެ އިތުރުން މި އަހަރު އިތުރު 36 ރަށަކަށް އީދުލައިޓްތައް ދިއްލާނެއެވެ. މި އަހަރު “އީދު އަލި” ދިއްލުމުގެ ބޮޑު އިވެންޓް ބޭއްވުމަށް ހަމަޖެހިފައި ވަނީ މި މަހުގެ 29 ވަނަ ދުވަހުގެ ރޭ ހުޅުމާލޭ ސެންޓްރަލް ޕާކުގައެވެ. މި އިވެންޓްގައި ރައީސް މުއިއްޒު ބައިވެރިވެވަޑައިގަންނަވާނެ ކަމަށް ސިޓީތަކާއި ބެހޭ މިނިސްޓްރީން ވިދާޅުވެއެވެ.