Read Time:6 Minute, 53 Second
(ފޮޓޯ ކްރެޑިޓްސް: ވަގުތު)
އަންނަ އަހަރުން ފެށިގެން ރަމަޟާން މަހު ސްކޫލްތައް ބަންދުކުރެވޭތޯ ބައްލަވައި ދިނުމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އަށް ދަންނަވާފައިވާނެ ކަމަށް ރައީސް ޑރ. މުހައްމަދު މުއިއްޒު މިއަދު އިއުލާން ކުރައްވައިފިއެވެ. “ރައްޔިތުންނާއެކު” މި ނަމުގައި ކުރިއަށް ގެންދިޔަ ޕޮޑްކާސްޓްގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އިސްލާމުންނަން ވީތީ އަބަދުވެސް އަޅުކަން ކުރަން ޖެހޭނެ ކަމަށާއި ވަކިން ބޮޑަށް ރޯދަ މަހަކީ އަޅުކަމަށް ހާއްސަ މަހެއް ކަމަށެވެ. ރޯދަ މަހުގެ ފަހު 10 އަށް އިތުރު ސަމާލުކަމެއް ދިނުމަށް ދީނުގައި ވެސް ސާފުކޮށް ބަޔާންކޮށްފައިވާ ކަމަށާއި އެއީ ލައިލަތުލް ގަދުރިއަށް މަސައްކަތްކޮށް އެ ރޭގައި ދަރުމަ އާއި ސަވާބު ލިބިގަތުމަށް ކަމަށް ރައީސް ވިދާޅުވިއެވެ.
ރާއްޖެއަކީ 100 އިންސައްތަ އިސްލާމީ ގައުމެއް ކަން ފާހަގަކުރައްވަމުން ރައީސް ވިދާޅުވީ ބޭނުންވަނީ އިސްލާމްދީނުގައި ހުންނަ ކަންކަމަށް މަގުފަހިކޮށްދިނުން ކަމަށެވެ. އެއީ އެމަނިކުފާނުގެ ޒިންމާއެއް ކަމަށް ވިދާޅުވިއެވެ. އެގޮތުން ފަހު 10 ގައި ސަރުކާރުގެ އޮފީސްތައް ބަންދު ކުރުމުން މުޅި ރޭ އެއްކޮށް ބޭނުންވާ ކޮންމެ ގަޑިއަކު ރޭ އަޅުކަމުގައި އުޅުމަށް ފުރުސަތު ލިބިގެންދާނެ ކަމަށް ވިދާޅުވިއެވެ. “ދުވާލު އޮފީހަށް ގަޑިނުޖެހި ދާން ޖެހޭނެ ކަމުގެ ކަންބޮޑުވުން އޮވެގެން ރޭގަނޑު ރޭ އަޅުކަމުގައި ނޫޅެވި ހިނގައިދާނެ. ހާއްސަކޮށް ފަހު 10 ގައި. އެހެންވެ އެ ފުރުސަތު މި ދިނީ. އެހެންވީމަ އިރާދަކުރެއްވިއްޔާ މި ސަރުކާރުގެ ކޮންމެ ދައުރެއްގައި ވެސް އެކަން އޮންނާނެ.” ރައީސް ވިދާޅުވިއެވެ.
(ފޮޓޯ ކްރެޑިޓްސް: ރައީސް އޮފީސް)
އޭގެ އިތުރުންް ސްކޫލްތައް މި ފަހަރު ރޯދަ މަހަށް ބަންދުކުރީ ކުރިން އޮގޮތަށް ކަނޑައަލައިގެނެއްނޫން ކަމަށާއި އެއީ އަންނަ އަހަރުގެ ދިރާސީ އަހަރު ޖެނުއަރީގައި ފެށުމަށް ގެނައި ބަދަލުގެ ތެރެއިން ނިންމި ނިންމުމެއް ކަމަށް ރައީސް ވިދާޅުވިއެވެ. ” އަޅުގަނޑު މިހާރު ވާނީ އެޑިއުކޭޝަން މިނިސްޓްރަަށް ދަންނަވާފައި ދެން އަންނަ ކޮންމެ ރޯދަ މަހެއްގައި ވެސް ސްކޫލްތައް ބަންދުކުރެވޭނެ ގޮތެއް ހަމަޖެއްސޭތޯ. އެއްވެސް ވަރަކަށް ކިޔަވައިދޭ ގަޑިތައް ނުގެއްލޭނެ ގޮތަކަށް.” ރައީސް ވިދާޅުވިއެވެ.
ރޯދަ މަހަށް ސްކޫލްތައް ބަންދުކުރުމުން އެކަން ބެލެނިވެރިން ވަރަށް ބޮޑަށް ބަލައިގަންނަ ކަމަށާއި މިއީ ރޯދަ މަހަށް ދެވޭ ހާއްސަ ކަމެއްގެ ގޮތުން ސަރުކާރުން ނިންމާ ނިންމުމެއް ކަމަށް ރައީސް ވިދާޅުވިއެވެ. މިއަހަރު އެކަޑެމިކް ކަލެންޑަރުގައި ހަމަޖެއްސުމަށް ކުރިން އޮތީ މިއަހަރުގެ ރަމަޟާން މަހުގެ އެއް ހަފުތާ ފިޔަވައި މުޅި ރަމަޟާން މަސް ބަންދުކުރާ ގޮތަށެވެ. ނަމަވެސް ފަހުން އެކި ކަންކަން ހަމަޖެއްސުމަށްފަހު މުޅި ރަމަޟާން މަސް ބަންދުކުރާ ގޮތަށް ކަންކަން ހަމަޖެއްސެވުމުން ގިނަ ބެލެނިވެރިންގެ ފަރާތުން އެކަމަށް އެދެވޭ، ރަނގަޅު ހިޔާލު ތަކެއް ލިބިވަޑައިގެންނެވިކަން އެމަނިކުފާނު ފާހަގަކުރެއްވިއެވެ. އަދި ރަމަޟާން މަސް ބަންދުކުރުމަކީ ގިނަ ބެލެނިވެރިން އެދޭކަމެއް ކަމުގައި އެމަނިކުފާނަށް ފާހަގަވާތީ ކުރިއަށްއޮތް އަހަރުތަކުގައިވެސް އެކަމަށް މަގުފަހިކޮށްދެއްވުމަށް މަސައްކަތް ކުރައްވާކަމުގައި އެމަނިކުފާނު ވިދާޅުވިއެވެ.
ރައީސް ވަނީ ރަމަޟާން މަސް ސްކޫލްތައް އެއްކޮށް ބަންދުކުރުމުން ލިބޭ ފައިދާތަކުގެ މައްޗަށްވެސް އަލިއަޅުއްވާލައްވާފައެވެ. މިގޮތުން މިކަމުގެ ސަބަބުން ދަރިވަރުންނާ ބެލެނިވެރިންވެސް އަޅުކަމުގައި ވަގުތު ހޭދަކުރުމަށް މަގުފަހިވެގެންދާނެކަމުގައި އެމަނިކުފާނު ވިދާޅުވިއެވެ. ރައީސް ވިދާޅުވީ، ރަމަޟާން މަހަށްފަހު އީދު ބަންދާ ގުޅިގެން، ސަރުކާރުން އިސްނަގައިގެން، މުސްލިމުން އުފާފާޅުކުރުމަށް މަގުފަހިކުރަން ޖެހޭނެކަން އެމަނިކުފާނު ގަބޫލުފުޅު ކުރައްވާ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0