އައްޑޫ ކަރަންޓް މައްސަލަ: އިންޑިއާއިން ގެނައި އިންޖީނު އިންސްޓޯލްކުރުމުގެ މަސައްކަތް ކުރިއަށް

Read Time:3 Minute, 42 Second

(ފޮޓޯ ކްރެޑިޓްސް: ފެނަކަ ކޯރޕަރޭޝަން)

އައްޑޫސިޓީއަށް ދިމާވެފައިވާ ކަރަންޓް ކެނޑުމުގެ މައްސަލަ ހައްލު ކުރުމަށް އިންޑިއާއިން ގެނައި، އިންޖީނު އިންސްޓޯލްކުރުމުގެ މަސައްކަތް ކުރަމުންދާ ކަމަށް ފެނަކަ ކޯޕަރޭޝަނުން ވިދާޅުވެއްޖެއެވެ. ފެނަކައިން ވިދާޅުވީ އައްޑޫ ސެންޓްރަލް ޕަވަރ ސްޓޭޝަންގެ ޖެނެރޭޝަން ކެޕޭސިޓީ އިތުރު ކުރުމަށް އިންޑިއާއިން ގެނެވުނު 1.8 މެގަވަޓް ގެ އައު އިންޖީނު ގެންދިޔަ ދޯނި އައްޑޫއަށް ބަނދަރުކޮށްފައިވާ ކަމަށެވެ. އަދި އަންލޯޑްކޮށް ސެންޓްރަލް ޕަވަރ ސްޓޭޝަނަށް ގެންދިއުމުގެ މަސައްކަތް ކުރަމުންދާ ކަމަށާއި 48 ގަޑިއިރުތެރޭ އެ އިންޖީނު އިންސްޓޯލްކޮށް ޚިދުމަތް ދޭން ފެށުމަށް ޓެކްނިކަލް ޓީމުން މަސައްކަތް ކުރާ ކަމަށްވެސް ފެނަކައިން ވިދާޅުވިއެވެ.

ފެނަކައިން ވަނީ ކަރަންޓުގެ ކެނޑުމުގެ ގިނަގުނަ ތަކުލީފުތަކާއެކުވެސް، އައްޑޫސިޓީގެ ރައްޔިތުން ކެތްތެރިކަން އިސްކޮށް، ދައްކާ ފުރިހަމަ ނަމޫނާއާއި، މައްސަލަތައް ޙައްލުކުރުމަށް ކުންފުނިން ކެނޑިނޭޅި ކުރަމުންދާ މަސައްކަތްތަކަށް ޝުކުރު އަދާކުރައްވާފައެވެ.

އައްޑޫ ސެންޓްރަލް ޕަވަރ ސްޓޭޝަންގެ ޖެނެރޭޝަން ކެޕޭސިޓީ އިތުރު ކުރުމަށް އިންޑިއާއިން ގެނެވުނު 1.8 މެގަވަޓް ގެ އައު އިންޖީނު ގެންދިޔަ ދޯނި މިހާރު ވަނީ އައްޑޫ އަށް ބަނދަރު ކޮށްފައި. އަންލޯޑްކޮށް ސެންޓްރަލް ޕަވަރ ސްޓޭޝަނަށް ގެންދިއުމުގެ މަސައްކަތް ދަނީ ކުރެވެމުން. 48 ގަޑިއިރުތެރޭ މި… pic.twitter.com/RWrnNufxSW

— Fenaka Corporation Ltd (@TeamFenaka) March 26, 2025

މި އިންޖީނުގެ އިތުރުން ވެސް 1،000 ކ.ވގެ އިންޖީނެއް މިމަހުގެ 11 ވަނަ ދުވަހު އައްޑޫއަށް ވަނީ ފޮނުވާފައެވެ. މި އިންޖީނު ފޮނުވި ނަމަވެސް އައްޑޫގެ ކަރަންޓް މައްސަލަ އެއްކޮށް ހައްލުވެފައި ނުވާތީ، ފެނަކައިން އަންނަނީ ކަރަންޓް ކެނޑުމަށް ދިމާވާ މައްސަލަ ހައްލު ކުރުމަށް މަސައްކަތް ކުރަމުން ކަމަށް އެ ކޯޕަރޭޝަނުން ވަނީ ވިދާޅުވެފައެވެ. އައްޑޫގެ ކަރަންޓުގެ މައްސަލައަކީ ޒަމާންތަކަކަށް ދިގުލައިގެން ގޮސްފައިވާ އިހުމާލުތަކެއްގެ ނަތީޖާއެއްކަން ފެނަކައިން ފާހަގަކޮށްފައިވެއެވެ.