ރަމަޟާން މަހުގެ ފުރަތަމަ 10ގައި ފިތުރު ޒަކާތުގެ ގޮތުގައި 2.9 މިލިޔަން ރުފިޔާ

Read Time:6 Minute, 58 Second

(ފޮޓޯ ކްރެޑިޓްސް: އިސްލާމިކް މިނިސްޓްރީ)

ރަމަޟާން މަހުގެ ފުރަތަމަ 10 ދުވަހުގެ ތެރޭގައި ޒަކާތު ހައުސްއަށް ފިތުރު ޒަކާތުގެ ގޮތުގައި 2.9 މިލިޔަން ރުފިޔާ ލިބިއްޖެއެވެ. ފިޠުރު ޒަކާތަކީ ރަމަޟާން މަސް ނިމުމާއެކު ޒަކާތް ޙައްޤުވާ މީހުންނަށް ދޭންޖެހޭ މާއްދީ އެހީތެރިކަމެކެވެ. ފިތުރު ޒަކާތް ބަލައިގަންނަން ފަށާފައިވަނީ ރަމަޟާން މަހުގެ ފުރަތަމަ ދުވަހުން ފެށިގެންނެވެ. ޒަކާތު ހައުސްއިން ވަނީ އެކި ގޮތްގޮތުން ފިތުރު ޒަކާާތް ދެއްކޭނެ އިންތިޒާމުތައް ހަމަޖައްސަވާފައެވެ. އެގޮތުން، އެކި ޕްލެޓްފޯމުތައް މެދުވެރިކޮށް އޮންލައިންކޮށް ޒަކާތް ދެއްކޭއިރު ޒަކާތު ހައުސްގެ ކައުންޓަރަށް ޒިޔާރަތްކޮށްގެންވެސް ފިތުރު ޒަކާތް ދެއްކޭނެ އިންތިޒާމުތައް ވަނީ ހަމަޖައްސާފައެވެ.

އިސްލާމީ ކަންތައްތަކާބެހޭ ވުޒާރާއިން އާންމުކޮށްފައިވާ ތަފާސްހިސާބުތަކުން ދައްކާގޮތުގައި މިއަހަރުގެ ރަމަޟާން މަހުގެ ފުރަތަމަ 10 ދުވަހުގެ ތެރޭގައި އޮންލައިންކޮށް އަދި ޒަކާތު ހައުސްގެ ކައުންޓަރުތަކުން ފިތުރު ޒަކާތުގެ ގޮތުގައި ޖުމްލަ 2،913،839.61 ( ދެމިލިއަން ނުވަސަތޭކަ ތޭރަހާސް އަށްސަތޭކަ ތިރީސް ނުވަ ރުފިޔާ ފަސްދޮޅަސް އެއް ލާރި) ވަނީ ބަލައިގެންފައެވެ. މިއީ ފާއިތުވެދިޔަ ފަސް އަހަރުގެ ރަމަޟާން މަހުގެ ފުރަތަމަ 10 ދުވަހަށް ބަލާއިރު ބޮޑު އިތުރުވުމެކެވެ. ތަފާސްހިސާބުތަކުން ދައްކާގޮތުގައި 1442ވަނަ އަހަރުގެ ރަމަޟާން މަހުގެ ފުރަތަމަ 10 ދުވަހު ފިތުރު ޒަކާތުގެ ގޮތުގައި ލިބިފައިވަނީ 977،301 ( ނުވަސަތޭކަ ހަތްދިހަ ހަތްހާސް ތިންސަތޭކަ އެއް) ރުފިޔާއެވެ. 1443ވަނަ އަހަރުގެ މި މުއްދަތުގައި ފިތުރު ޒަކާތުގެ ގޮތުގައި 1.09 މިލިޔަން ރުފިޔާ ލިބިފައިވާއިރު 1444 ވަނަ އަހަރު 1.39 މިލިޔަން ރުފިޔާ އަދި 1445ވަނަ އަހަރު ލިބިފައިވަނީ 1.6 މިލިޔަން ރުފިޔާއެވެ. ޒަކާތު ހައުސްއިން ވިދާޅުވެފައިވާގޮތުގައި ރަމަޟާންމަހުގެ 27 ވަނަ ދުވަހުގެ ހެނދުނު 6 ޖެހުމާހަމައަށް އޮންލައިންކޮށް ޒަކާތް ބަލައިގަންނަމުން ދާނެއެވެ. އެގޮތުން މިފަހަރުވެސް އޮންލައިންކޮށް 5 ޕްލެޓްފޯމަކުން ޒަކާތް ދެއްކޭނެއެވެ.

އޮންލައިންކޮށް ޒަކާތް ދެއްކޭނެ ގޮތްތައް

* ދިރާގު އެޕް/ ދިރާގު ޕޭ (ވެބްސައިޓް)
* އުރީދޫ، އެމް ފައިސާ (އެޕްލިކޭޝަން)
* މޯލްޑިވްސް އިސްލާމިކް ބޭންކު (އެޕްލިކޭޝަން)
* ބޭންކް އޮފް މޯލްޑިވްސް މޯބައިލް އެޕްލިކޭޝަން
* ފަހިޕޭ (އެޕްލިކޭޝަން)
* ބަނޑޭރި ޕޭ

ޒަކާތު ހައުސްއިން ވިދާޅުވީ ބަނޑޭރި ޕޭ އަދި ފަހިޕޭ މެދުވެރިކޮށް ރަމަޟާންމަހުގެ އެންމެ ފަހު ދުވަހާހަމައަށްވެސް ފިތުރު ޒަކާތް ދެއްކޭނެކަމަށެވެ. އަދި ޢުމުރުން ދުވަސްވީ މީހުންނާއި އޮންލައިންކޮށް ޒަކާތް ދެއްކުމަށް އަހުލުވެރިނޫން ފަރާތްތަކަށް ޚާއްސަކޮށް އިސްލާމީ މަރުކަޒުގެ ޖަލްސާކުރާ މާލަމުގައި ޒަކާތް ބަލައިގަތުމުގެ އިންތިޒާމް ވަނީ ހަމަޖައްސާފައެވެ. އަދި ރަށްރަށުގައި ނަޤުދު ފައިސާއިން ފިތުރު ޒަކާތް ބަލައިގަތުމުގެ އިންތިޒާމްތައް އެރަށެއްގެ ރަށު އަދި ސިޓީ ކައުންސިލުން ވަނީ ހަމަޖައްސާފައެވެ. މީގެ އިތުރުން އަންނަ ހޮނިހިރު ދުވަހުން ފެށިގެން ގޮވާމުގެ ބާވަތްތަކުން ޒަކާތް ބަލައިގަންނަން ފަށާނެ ކަމަށްވެސް އިސްލާމީ ކަންތައްތަކާބެހޭ ވުޒާރާއިން ވަނީ ވިދާޅުވެފައެވެ.

ފިޠުރު ޒަކާތުގެ ގޮތުގައި ދައްކަންޖެހޭ ފައިސާގެ ޢަދަދު

* އާދައިގެ ހަނޑޫ: 12 ރުފިޔާ
* ތައިލެންޑް ހުދު ހަނޑޫ: 62 ރުފިޔާ
* ރަތް ހަނޑޫ: 86 ރުފިޔާ
* ބާސްމަތީ ހަނޑޫ (އާދައިގެ): 74 ރުފިޔާ
* ބާސްމަތީ ހަނޑޫ (މޮޅު) : 100 ރުފިޔާ
* ބާސްމަތީ ހަނޑޫ (އެންމެ މޮޅު): 133 ރުފިޔާ
* އާދައިގެ ފުށް: 10 ރުފިޔާ
* އާޓާ ފުށް: 75 ރުފިޔާ

ފިތުރު ޒަކާތް ދެއްކުން ކޮންމެ މުސްލިމެއްގެ މައްޗަށް ވާޖިބުވެގެންވެއެވެ. ފިތުރު ޒަކާތް ދެއްކުމަށް ހަމަޖެހިފައި އޮންނަނީ އެބަޔަކު އެޤައުމެއްގައި ޢާއްމުކޮށް ކައިއުޅޭ ގޮވާމުގެ ބާވަތަކުންނެވެ. އޭގެ މިންވަރަކީ ޞާޢެއް، ނުވަތަ ދެއަތް ގޮށިން ނެގޭ މިންވަރެވެ. މިގޮތުން ބަލާއިރު އެކި ބާވަތުގެ ގޮވާމުގެ ބަރުދަން ތަފާތުވެއެވެ.